Saturday, September 13, 2008

المعلم عفيفى أبو ركبة


أفرجوا عن هشام طلعت مصطفى من أجل مصر .

ان القبض على هشام طلعت مصطفى و الزج به فى السجن و تحويله لمحاكمة " عادلة " , يسىء الى سمعة النظام و سمعة الحكومة و بالتالى سمعة مصر . أفرجوا عن هشام من أجل الحفاظ على فساد مصر .

---

أفرجوا عن هشام طلعت مصطفى من أجل مصر .

أن أنخفاض سهم مجموعة طلعت مصطفى الى أقل من خمسين بالمائة من ثمنه الحقيقى ,  أدى خراب بيوت ناس كتير و خاصة بيت صديقى رامى . أفرجوا عن هشام من اجل الحفاظ على فلوس رامى .

---

أفرجوا عن هشام طلعت مصطفى من أجل مصر .

إن كان من ساهم فى قتل 1000 شخص من الأبرياء غرقاً قد اخذ براءة , فكم بالأحرى من قتل " راقصة " عارية ؟ . فلتكن عقوبته واحد على الف مما أرتكبه الأخر . أفرجوا عن هشام من أجل الحفاظ على راقصات مصر .

---

أفرجوا عن هشام طلعت مصطفى من أجل مصر .

أن الحاجزين فى مشروع مدينتى من أبو المتر بخمسة الاف جنيه صاروا قلقين متوترين و مش مطمنين على مستقبل المدينة العالمية التى هى على أرض مصرية . أفرجوا عن هشام من أجل أطمئنان سكان مدينة مدينتى .

---

أفرجوا عن هشام طلعت مصطفى من أجل مصر .

اذا كان القاتل قد وضع المبلغ المتفق عليه فى البوتاجاز من أجل " تطهير المبلغ " بنار الفرن . فان القبض عليه يسىء الى تلك النار المطهرة . افرجوا عن هشام من أجل بوتاجازات مصر .

---

أفرجوا عن هشام طلعت مصطفى من أجل مصر .

أن تهديد دولة الأمارات بسحب السفير و سحب 20 مليار دولار من الأستثمارات فى مصر لو خرج هشام لهو عدوان سافر على السيادة المصرية و حقوق القتل للجميع . أفرجوا عن هشام من أجل مهرجان القتل للجميع .

========

الحوار الأخير للسيد هشام مع صاحب هذه المدونة

صاحب المدونة : جمهورك الحبيب اللى قاعد فى الرحاب و اللى بيحجز فى مدينتى و اللى أتخرب بيتهم فى الأسهم , بيسألوك .. ليه قتلتها ؟

هشام : انا مقتلتهاس .. ده جهل .. دى مغنية و رقاصة و منحرفة .... انت متعرفش ان ضربة المعلم هشام طلعت مصطفى تبقى " قضاء و قدر " ؟

صاحب المدونة : لأ , دى معروفة و زى ما هو معروف برضه فى قانون العقوبات فى المادة 5 بتقول " يخرج المتهم و يبرأ فى الحال أذا كان فى القضية سوزان " .

هشام : شفت بقى ,,, مظلوم و شرفك مظلوم .

صاحب المدونة : الرب يباركك , أمضى بسلام و سلام الرب معك , فلتحرسك الألهة .. أمين .

---

 

 

27 comments:

Alkomi said...

بالنوسبة لموقف صاحب المدونة من الاعلانات اللي ليل نهار على حساب الشعب المتكاظي عشان مانبيعش اسهم ؟

TAFATEFO said...

ناس بتقول ان رجال أعمال وأمراء لبسوه القضية علشان مشاريعه اللي في مصر ودبي .. والتسارع في مركزه السوقي .. وأمهلوا الحكومه المصريه لآخر السنه علشان هشام يعرف حجمه ويتلم (على حد تعبير من سمعت منه الحديث)

ودلوقتي .. بتقول ان دبي هددت بسحب استثماراتها لو متحبسش

مممممممممممممم

أنا رأيي ان كل ده أقوال متضاربه هدفها زعزعت الاعتقاد اللي ترسخ عند الشعب من الإدانه .. للشك .. وبعدين إقناع الناس ان دي كانت مؤامره مره من عز ومره من رجال أعمال علشان نجاح هشام .. علشان الناس تتعاطف معاه ولما يخرجوه يهللوله .. أو على الأقل ميحتجوش

مش فاهم حاجه من كلامي .. صح؟ أصلي أنا كمان مش فاهم .. بس من أول يوم وأنا بقول ان احنا عندنا عقول قانونيه جباره سواء في النيابه أو المحامين هيخرجوه بكل سهوله .. والسينارريو اللي شايفه بيحصل يسقفله كتير

هو هيخرج .. هيخرج .. بس الاشاعات هنا وهناك مش شايف هدفها غير إثارة الشك لدى الجمهور .. بس برضه لازم الجمهور يسقف في آخر العرض .. والجمهور برضه اللي ينحني كالعاده

abderrahman said...

و شعب المنوفية يناشد السيد الرئيس والقضاء المصري الافراج عن ابن المنوفية البار هشام طلعت مصطفى

عنهم : عفيفي ابوركبة

الـسـيـدة نـون said...

قتلها او مقتلهاش او حتى إستأجر واحد يقتلها

متهيالى ان الموضوع كله
رجال اعمال واتخانقوا مع بعض

شافوا ان اسهم هشام فى البورصة فى الطالع
قالوا لا خليها فى النازل علشان كلنا ناكل عيش
وكفاية على هشام الجاتوه اللى اكله

وحتى لو هشام هو اللى مخطط لقتلها لاى سبب من الاسباب
متهيالى هو كان هيكون اذكى من كدة وهيعرف يختار حد مايفتنش عليه

بس تصدق الراجل ده لو ماطلعش براءة
انا كمان هاستغرب

ياترى هل فعلا الالهة زعلانة مع هشام الايام دى
ولا الالهة فجأة كدة قررت انها تكون عادلة


ملحوظة
انا مابشربش لا كابتشينو ولا حتى بشرب نسكافيه
ما بالك بقى بالكابتشينو بالبندق والكاكاو ويز نو اويل

انا بشرب شاى بالنعناع
وساعات شاى بلبن

إذن أنا بيئة يا عباس


سلام
اختك خيخة

زمان الوصل said...

لعلمك هيطلع إن "سوزان" وقعت على سكّينه فرقبتها اتقطعت لأنّها توقّفت عن تدريبات "الرقص" من زمان !! ولو أنصفوا يلمّوا شلّة المنتفعين من "سوزان" و تضم أزواجها السابقين و اللاّحقين و طبعا صاحب الفخامه المبجّل الأخ "عب ستّار تميم" اللىّ أنا شخصيا نفسى أضربه بالجزمه بعد ما شفت اللىّ اتعمل فى جنازتها ..

77Math. said...

"إن كان من ساهم فى قتل 1000 شخص من الأبرياء غرقاً قد اخذ براءة , فكم بالأحرى من قتل " راقصة " عارية ؟ . فلتكن عقوبته واحد على الف مما أرتكبه الأخر . أفرجوا عن هشام من أجل الحفاظ على راقصات مصر"

ليكن حبسه عظة وعبرة لكلّ من تسوّل له نفسه أن يؤذي أو يجرح أو ينهي حياة أي سوزي من السوزيات !

بس بجد أنا مستغربة !
ازاي يحبسوا رجل أعمال ؟؟

قلم جاف said...

كما أن هناك لاعبين يجيدون التحول من الهجوم إلى الدفاع وبالعكس .. هناك صحفيون يجيدون التحول من القبض من رجل الأعمال إلى القبض عليه..

"هشام طلعت مصطفى" في رأيي هو واحد من "أخيب" رجال الأعمال في تعامله مع الميديا رغم إنفاقه على الدعاية الذي لا يفوقه سفهاً إلا إنفاق "نجيب ساويرس".. المجرم الخايب هو الذي يذهب إلى السجن .. غيره .. سواء "عز" المدلل لدى الحزبوطني ، أو "ساويرس" أحد القوى العظمى في جبهة المال السياسي المعارض .. سيجد ألف قلم وألف قناة يعملون ليل نهار على تبرير خطاياه وجرائمه..

بالمناسبة.. شعرت بالقرف من كثير مما كتب عن "سوزان تميم".. ليست هي الوحيدة من المطربات أو أنصاف المطربات العرب المسنودات في مصر من قبل مؤسسات صحفية ورجال أعمال.. هناك مثل مصري أصيل يقول: العجل لما يقع بتكتر سكاكينه..

ويبدو أن رؤوس العجول قد أينعت.. واستوت على "السجر".. ويوم يقع رأس منها ستكثر فضائحه ،وسيظهر من كان يحميه في مصر ويسنده..وعلى رأي إعلان جبن لا فاش كي ري: بكرة تشوف!

^ H@fSS@^ said...

طيب ما تجيب لنك صاحب المدونة الجبار اللي اقام الحيوار
ولا قولك اروح اكمل قراءة روزاليوسف و اسخسخ ضحك لوحدي؟؟

شفت انت العدد بتاعهم عن هسام و شوزانة؟؟
مكنتش اعرف ان الصحافة عندنا بقى دمها خفيف كده
بلعن يحرق يا شيخ
و سلام لي على الحاج عفيفي ابو ركبة

بنت القمر said...

هشام اسكندراني اصيل يا عبدو باشا
علي فكرة من يوم الحادث تمتلأ الشوارع السكندريه باليافطات العريضه التي يهنئ فيها هشام شعب الاسكندريه برمضان والعشر اوائل وعيد الفصح وشم النسيم يفط غير طبيعيه
ولو اني مش مستوعبه انه غبي كده الي الان لكن ايش تعمل اليفط في الوش العكر:))
اقصد لهشام طلعت!! تحياتي
======================
سؤال للجمهور
هو مش كان في خبر من سنوات ان ابن طلعت مصطفي تزوج نورا الممثله المعتزله لا اعرف ان كان هشام ولا طارق...؟؟

abderrahman said...

مع كامل تقديري لشعب الاسكندرية
لكن برضو قوانين العبقرية تحتم انه انسان ناجح زي ده وفي مركز لازم يكون من أصل منوفي
والمثل بيقول لو لم أكن منوفيا لوددت ان اكون منوفيا
http://www.youm7.com/News.asp?NewsID=39117

^ H@fSS@^ said...

عبده باشا
ممكن يكون بيعمل الاتنين
يعني هو بيحب شوزان الله يرحمها و نفس الوقت هو و عيلته بيتبرعوا للمجتمع بتاعهم
و صحيح هو افترى لما دفع فيها بلاوي متلتلة و جاب لهاالنابوليا بالشئ الفلاني
لكن ده ميمنعش انهم في مراكز القوى الكبيرة بيخبطوا في بعض و هو كبش فدا لكل اللي بيحصل
و تاني ااكد ان ده لا يعني اني بدافع عنه مثلا او بببررله تصرفاته
انا لغاية دلوقتي مش مستوعبة حجم المبالغ اللي بيتكلموا عليها
سواء ورثتها هي
و لا اللي هو قدمهولها
و ارجع اقول
ليه مخلتنيش اغني و انا صغيرة يا بابا
و ده انا بتنشق على مين يدفعلي تمن رسالة الماجستير اللي نفسي اعملها
و لا جيب لمن تطالب

حسرة علينا
فعلا العلم لا يكيل بالبتنجان

الف حسرة عليكي يا مصر

عباس العبد said...

محمد الكومى
حقولك على سر بورصجى قديم . المفروض ان دلوقتى مع أنخفاض سعر السهم هذا الأنخفاض المريع , تشترى و تنام على السهم , لأنه اقل من قيمته الفعلية و تنتظر الأجانب لما يخشوا يشتروا و شوف الجمال اللى حتكسبه . المتوقع انه ينط من 6 جنيه الى 16 جنيه . بس المشكلة فى " الزمن " , عامل الوقت حتفضل تشترى و تبيع و تقلب السهم لمدة قد أيه و بعدين تشترى و تسقع قد أيه ؟ هى دى المشكلة الحقيقية و خصوصاً بعد التصريح الخرى عن أحتمالية " تجميد ارصدته لحين صدور الحكم " . و مقدرش أفيدك اكتر من كده . ربنا يستر !!! .
=======
مصطفى
شوف يا سيدى الفاضل
الجرائد المستقلة بتقول و الخبر اللى جى ده من الدستور :
ان الأخت سوزى كانت فى حماية شخص مهم مقرب من العائلة المالكة فى الامارت و لما حصل اللى حصل و ركبت سوزى الصاروخ و طيرت الطيارة , الشخصية المهمة دى غضبت و عملت اتصالاتها و حصل اللى حصل .. و الكلام ده نقلاً عن الدستور الأسبوعى .
بس النقطة المحور اللى مش قادر أفهمها و هى اهمية الاخت سوزى دى لرجال الأعمال , لا هى مشهورة و لا معروفة و لا حد فاهملها , يعنى فى الأخر هى بالنسبة ليهم مجرد جسد للمتعة و بالتالى الخناقات دى كلها مش مفهومة , لانه المفروض انه لما يخلصوا تسلية حيسيبوها و يشوفوا غيرها و المفروض انها متضحكش عليهم , من الأخر كده حقولك كلمة اللمبى :
محدش فاهم حاجة !!! .

عباس العبد said...

عبده باشا
عملت أيه فى الكتاب ؟
الكتاب ده هو اللى فاضلى و أبقى من المثقفين . انت كده بتحرمنى من أنى اكون مثقف . لو فاضى فى اى يوم كلمنى و نروح نجيبه و لو جيبته قولّى علشان انا كلمت الاخوة فى ديوان و احتمال يجيبهولى . لازم أبقى مثقف يا عبده لازم , دى مسئلة هشام او سوزى , قصدى حياة او موت .
--
يعنى الباشا طلع منوفى , هى المحافظة دى عاملة عمل للمصريين و لا أيه ؟ الله يخرب بيت عفيفى أبو ركبة
=======
بنت خيخة
الألهة مقلبتش عليه و لا حاجة , القصة انه الالهة درجات . و فى الهة كبيرة و الهه صغيرة . الألهة الكبيرة امرت الألهه الصغيرة أنه المواطن المذكور هشام لازم " يدلع شوية " فدلعوه . و بعدين تقريباً اكتشفوا انه ادلع زيادة فقالوا يشدوا ودانه شوية أحسن يطلع ولد بايظ و تفسد اخلاقه .
يعنى من الأخر كده , القضية مش قتل سوى , قد ما انه فعل القتل نفسه على أرض متخصش الألهه بره جبال الأوليمب المصرية يعنى .
انسى حكاية عدل الألهه دى . انسيها خالص .
--
و بعدين مش انتى بس لوحدك اللى بيئة , دا انا ضايع نوهائى . فى التراوة البيئية لو دققنا فى التعبير .
=======

عباس العبد said...

زمان الوصل
انتى لسه ما عرفتيش انها وقعت على السكينة , ده انتى متأخرة قوى . دى وقعت لما اتخرمت و كل شوية تقوم و تقع لغاية ما السكينة ماتت هى كمان .
ربنا يسهل و يكرم الكل
=======
77 رياضة
الا السوزيات , كله الا السوزيات . و احنا عندنا كام سوزى , ده هى سوزى واحدة .
هم ما سجنوش رجل أعمال , هم اضطروا لسجن رجل أعمال . فى فرق .
و محدش فاهم حاجة .
=======
قلم جاف
الفكرة مش انها هى الوحيدة المسنودة من صحفيين و رجال أعمال . الفكرة هى ليه مسنودة ؟ . ما هى لو جسد للمتعة , ليه ما تبقاش زى ما بيتقال " قلبة و قومة " ؟ ليه الفلوس دى و المصاريف دى و السذاجة دى ؟ أصله برضه هو مش اهبل و أكيد محباش . ما هو دماغى كده حتبوظ ما يصحش يعنى .
--
كنت بتكلم مع صديق و قعد يشرحلى نظرية مكنتش فاهمها . النظرية بتتكلم عن " المافيا " و العلاقة بين المال و السلطة و السياسة داخل أطار " الأسرة الواحدة " !!! . سئلته انه يشرح . ضحك و قاللى امسك صفحة الوفيات فى حالة وفاة شخصية كبيرة و حتلاقى ان فلان متجوز بنت علان , و علان قريب ترتان , اما ترتان ده بقى مصيبة لأن ابنه متجوز بنت زفتان اللى هو قريب جوز بنت عم محناك . شبكة معقدة , و ليها أرض لازم تلعب عليها . و اللعب بره الأرض يدخلك فى الشبكة الدولية اللى فيها بقى انه لازم تعرف انك مافياوى صغير و حتمشى عليك قوانين المافياوية الكبار .
--
الميديا .. سر برضه
بس هو مش خيبان قوى . هو له تقله برضه . ده لما عز رفع سعر الحديد , هشام قاله امك اسمها أم ترتر و راح استورد من الصين . يعنى هو واصل برضه , بس خبط مع حد بره الملعب فعض معاه جامد . فجلت منه المرة دى .

عباس العبد said...

حفصة
روزاليوسف دى .. أهم مجلة كوميكية فى مصر بلا وجع دماغ يا شيخة .
=======
بنت القمر
مش عارف طبعاً موضوع الجواز . بس لو اتجوزها الف مبروك .

أبوفارس said...

مساء الفل ياهندزه..
طبعا مش حاأتكلم ف الموضوع ولا العلاقات المافياويه ولاحجيب سيرتها..
لسبب بسيط فعلا ماعنديش معلومات ولو أشاعات لها ظل من الصحه..
ومش متابع وبصراحه مش مهتم أتابع..
لكن أنت جبت التايهه..
هشام باشا خبط فى مين..؟؟
فى عز باشا..
طب وهو عز باشا ده قليل ده زاجل واصل..
وسيبك أنه واصل هنا..
سمعت والله أعلم أنه منفد على بره..
تجمع من التجمعات المخيفه بره..وشغال الله ينور معاهم ..
فى أيه؟؟
دى تضاربت فيها اﻷموال..أقصد اﻷقوال..فهمت ياصديقى..والا لسه؟؟
أما أن الموضوع مخيف..فهو مرعب..ومرشح للأزدهار واﻷستمرار لزمن طوووويل قادم..
تحياتى ومودتى..خالد
ملحوظه
فى التدوينه اللى حطيت لك لينك عليها..أخدت بالك من نقطه "قيادات من حزب الله تزور القاهره.." فهمت العلاقه ولا ضاعت منك..

Abu Shahin said...

ربنا يرجعلك فلوسك كلها غير منقوصة مليم يا رامى

ولتذهب اى حاجة بعد كده الى الجحيم

Alkomi said...

انا فاهمك يا بوب خصوصا اني في بكالريوس تجارة السنة دي قسم محاسبة بس انا بسال عن سئالة تليفزيون الحكومة اللي بيعمل اعلانات على حسابنا بيقولنا انقذوا عفيفي ابو ركبة و النبي ماتبيعوا لحسن عفيفي هيموت من الجوع

Anonymous said...

معلوم لازم يفرجوا عن هشام طلعت و الا سمعه مصر حتكون في خطر
شكلنا حيكون عامل ازاي في المحافل الدوليه لما يقولوا ان مصر بتعاقب المجرمين؟دأحنا مش حنقدر نفتح عنينا بعد كده في اي حد
مابطلتش ضحك من اول البوست لحد اخره
تشكر علي البوست اللذيذ ده ياجميل

mostafa rayan said...

وقائع القتل المنشورة في الجرائد تؤكد انها تمت بطريقة غبية جدا معقول يكون غبي بالشكل دة علشان يستأجر قاتل يحتاج لتدريب على القتل
زي ماقولت ماحدش فاهم حاجة بس اكيد هو طالع برأة طالع امال يعني سكان مدينتي يروحو فين دول كانو يهدوالدنيا يا عم
بالنسبة لطريقة كتابة البوستانا معجب بيها جدا صحيح شر البلية ما يضحك

Alkomi said...

حاجة كمان يا رامز بعيدة عن الموضوع

اعلان بنك مصر طلع حقييييييييييييييييييييييييييييييييييييييييقة


و حاليا بنسعى نجيب شريطه من التليفزيون

بس العملية دي صعبة كيييييييييييك

هشام علاء said...

اهو انت كده زعلت المعلم عفيفى ابو ركبة مننا

افرجوا عن هشام طلعت مصطفى من اجل سمعة المعلم عفيفى ابو ركبة

Alkomi said...

و انا بتفسح عالفيسبوك لاقيتك

و لاقيت في فيسبوكك ان انت كنت جوالة

بصرة يا زميل

عشيرة جوالة كلية التجارة جامعة اسكندرية

شارة خشبية من الجمعية البحرية

انت بقى ايه ظروفك في الحركة الكشفية ؟

عباس العبد said...

أبو فارس
منور المدونة . و ليك وحشة ..
فى حاجات الواحد عقله لا يقدر على أستيعابها .
بس بالنسبة لموضوع عز و هشام اللى خبط فيه :
النقطة دى مش منطقية لأنه اكيد عز مش حيقنع هشام انه يقتل سوزى علشان عز يفضحها . الا بقى لو كانت القصة انها مزقزقة عليه من الأول , و ساعتها يبقى العبط اكتمل لما رجال أعمال يتسنكحوا على مزة .
=======
أجندة حمرا
أنتى تأمرى يا فندم .
و بعدين فعلاً يقولوا إيه على مصر و على الحكومة .. يقولوا انها اتجننت و بقت عادلة و تعاقب المجرمين . نودى وشنا من الناس فين ؟
=======
مصطفى ريان
منور المدونة . و سعيد أنها عجبتك .

عباس العبد said...

هشام
منونى
=======
محمد الكومى
شوف يا سيدى
انا كشاف من سنة 92 حتى 97 .
و مرشح جوال من 97 حتى 99
و جوال فى الخدمة من 99 حتى 2004 .
و من 2006 حتى الأن جوال منطلق بلا خدمة ( متقاعد ) .
خدمت كقائد وحدة فى الزمرة و الفرقة و العشيرة .. و قعدت فترة مساعد مدير مجموعة و فترة كنت قائد تدريب لقادة الوحدات .
بس كده ...
بس كده .

Alkomi said...

ايوة الكلام ده كله فين

في انهي عشيرة

في انهي جمعية

كدة يعني

انا بقى وصلت رائد اكبر و نائب قائد عشيرة و لاني ماليش في الموالسة او بمعنى اصح ماحبش انها تدخل مجال زي الكشافة

مابقيتش قائد عشيرة

Anonymous said...
This comment has been removed by the author.