![](https://blogger.googleusercontent.com/img/b/R29vZ2xl/AVvXsEjSxtJ5Le8lxloywdbdcHXEq4VtSjmKBun8G1Xk6fswiApfZ2crXPu1QP99GjOvDZfxG8Yl6do5zkCN-H5YRDKNGsVlirIGny6JA01co1UHxqp1Qoy8FtXSqOqWZgbIVFK2nZxO/s320/funny_sport.jpg)
احتفالاً بنادى بشتكة ( الأهلى سابقاً ) , قرر أتحاد الكرة المصرى أرسال حداشر توك توك الى المطار بدلاً من الأوتوبيسات لأستقبال اللاعبين و أعادتهم الى النادى ( و حيبعتلهم التكاتك من غير كاسيت كمان ) . و ستكون التكاتك ماركة " البطة الشقية .. للزفلطة اليابانية " .
و يظل السؤال حائراً معلقاً و لم نجد له اجابة :
هل نادى بشتكة , معاه حاجة ياخد فيها ؟ و لا نلفله فى قراطيس ؟
---
هشتكم يا باتشوكا ..و بشتكم
حبيب قلبى
--
تحديث :
وصل الى علمنا أن بشتكة ( الأهلى سابقاً ) حينزل فى مطار امبابة بطائرات شراعية علشان مش عايزين وجع دماغ فى مطار القاهرة الدولى . و قيل أيضاً تتمة للأحتفال انهم حيودوهم يفسحوهم عند عم شنكليح بتاع المراجيح , و كان حيدبحلهم خروف , بس للأسف الخروف اتسرق من المعلم زلاؤطة . و قيل أيضاً و العهدة على الراوى , ان الهدف الضائع من بشتكة حيبعتو المفتش " كرومبو " يدور عليه .
54 comments:
ههههههههه فرحانه فيهم عارف كل مصر صحيت الساعه 6 الصبح لو لشغلهم مش هيعملوا كده ابدا بجد مبسوطه مقولتش ليه ماركه البطه مينفعش وز يعنى ولا ايه ويا حبشتكه يا حبشتكه والاهلى من خيبته اشتكي
ههههههههههه
اللهم ما لا شماته
انت جبت بشتكه دى منين :) على رأى المثل : يا شماتة طنط "ظاظا" فيهم :))
صديق زملكاوى متكيّف أوى إن "أبو تريكه" اللاعب المثالى البار خد إنذار هههههههه ..
اه ماهو السبع لما يتعب
يا عم طيب الاهلي لاعب باتشوكا انتوا عملتوا ايه طلعتوا حصالة في المرحلة اللي الاهلي بطل فيها
طب الاول خللي فرقتكوا الموكوسة دي حتى كان يبقى موقفها عدل عشان تتريقوا و انتوا واقفين على رجل ثابتة انما تتريقوا و انتوا مشعلقين في الهوا
اخص على ده ماتش
الاهلي بشتكة برضه
على كدة بقى انتوا فريق زينب عصفور
بص انا عارف انك زملكاوي و بتحب زيزي بس ماكنتش متخيل ابدا - دموعي بتنزل على خدي من قسوتك الكتابية هع هع هع هع - انك تبقى زملكاوي شمتان للدرجة دي
بالنسبة لبنزين التكاتك بترول اسيوط هيخش يدعم بلترين لكل توك توك ولا ايه؟
نياه نياه نياه نياه هاهاهاهاهاها
مسا يا رامز
هو سيادتك زمالكاوى ..........!
هه
معلش
حبة سخافه على المسا
مش غنت قلت المكان مكانى
استحمل بقى يا بطل
مساءك ورد يارب
واحده وحيده تحكييك
و تتمنى لك مساء هادىء
طب تصدق أول مرة يارامز أزعل منك بجد
أنا عارف من قبل كده انك زملكاوى لكن كنت متخيلك زملكاوى راقى مش من نوعية القرعة اللى بتتباهى بشعر اللى ماتقربلهاش خالص..ده انتم متدهولين بقالكم 6 مباريات وطوب الأرض علم عليكم وعبى كرامتكم المبعترة فى قراطيس لب مخرومة..جايين دلوقتى تفرحوا فى أسياد القارة؟
وحياة ربنا كل اللى يشمت فى الأهلى ويقول عليه خايب يبقى لامؤاخذة (....) ولابلاش
قال بشتكة يا اللى فرقتكم كلهاسهوكة
يالا معلش ادينا عملنا اللى فرقتكو الدرجه التانيه دى معرفتش تعمله وفرحناكو وخلينا الزملكاويه طلعلهم صوت على اخر الزمن
بشتكهم يا باتشوكا
دلعهم يا باتشوكا
و أوووووه باتشوكا
أوووووه باتشوكا
وقالك ايه
احنا رايحيين نجيب اول او تانى
خخخخخخخخخخخخ
او تالت او رابع
او خامس
هيهيهيهيهيهيهيهي
اللهم لا تجعلها آخر احزنهم ووريني فيهم عشر سنين هزايم يا قادر على كل شئ
باتشوكا فى القلب
باتشوكا فى العين
باتشوكا ساكن فى الاتنين
اوووووه باتشوكا
وقال ايه صاحيين من الفجر يا جمالهم قاعدين فى القهاوي هيهيهيهيههيهي
أمير عبدالحميد ده عثل عثل عثل
الهي ما يحرمكو منه
:))
ايه يا نسرين
ان كنتي نسيتي افكرك
الاهلي مرتين و اسيك بالتلاتة و ديناموز زبط فرقة كفر ابو اتاتة
و الجيش فاق عليكوا و الاولمبي مش ناسيكو
و الحرس و البترول و الاسماعيلي خلوا الزمالك يقول اه يا ويلي
يالا الاهلي يا بنتي اتغل عشان يخفف احزان الزملكاوية بالخسارة من بترول اسيوط
و ان شاء الله نشوفكم في ستاد بلدنا السنة الجاية
و تصريح احمد رمزي بعد الهزيمة من سرس الليان
الصعود للممتاز ما زال في االملعب
على فكره تعليق "محمد الكومى" الأخير يحمل الرد على التساؤل الدائم : ليه الزمالكاويه بيفرحوا أمّا الأهلى يتغلب؟
كمراقب محايد بما إنّى لا باشجّع دول ولا دوكهمّه باشوف إن مشكلة الأهلى أنّه دائما يرد هزيمته لأسباب قدريه أو عبثيه و نادرا ما يعترف بخطئه و مسئوليته عن الهزيمه !!
يعنى شويّه يقول لك اتغلبنا عشان نفرّح الزمالكاويه !! شويه يقول لك الكوره غالب و مغلوب و الدنيا من ده و ده !! و شويات أخريات لا يستنكف أن يرد على هزيمته بالحديث عن هزائم الأنديه الأخرى التى لا يضع نفسه معها فى مقارنه أصلا !! لكن اتفرّج بقى أمّا "الأهلى" يغلب !! محدّش بيفتكر القدريات دى خالص ولا بيفتكر إن الكوره غالب و مغلوب ولا بيفتكر إن فيه فرق أخرى بتلعب و تكسب .. لأ بيبقى الحديث كلّه عن روعة "الأهلى" و عظمة لاعبيه و الخطّه اللىّ حطّها الخواجه "كوزيه" و أبصر مادرك و حاجه بجد تحرق الدم .. عشان كده أمّا بتنهار كل هذه الضجّه و يتكبس "الأهلى" و لاعبيه و جماهيره تلاقى اللىّ مسخسخ على نفسه من الضحك حتى لو كان مالوش لا فى التور ولا فى الطحين زيّى و يقول فى عقل باله عشان ينبطّوا و يعرفوا إن الله حق هههههه
للتوضيح ليس الا يا زمان الوصل
الكورة بالنسبة لي فانتازيا و كوميديا ليس الا خصوصا فيما يتعلق بالاهلي و الزمالك
بس برضه الكورة فوز و خسارة
و يوم ليك و يم عليك
الخ الخ الخ
لما نتغلب بس
انما لما نكسب فحنا فريق عنترة اللي مخلي فرقة زيزي مسخرة
نياهاهاهاهاهاهاه
حتى انتى يا نسرين؟؟؟
ياللفاجعة الكبرى
رامز ونسرين... طب فاضل مين؟
يا "محمد" أصل الكلام اللىّ بتقوله هو اللىّ بيقوله غالبية مشجّعى "الأهلى" وقت أى هزيمه لفريقهم فأنا قلت فرصه أستغل وجود ردود الأهلاويه بالتدوينه عشان أدلى بدلوى !! قليل جدّا أمّا تلاقى حكم موضوعى على المكسب أو الهزيمه !! المكسب دائما سببه إن الفريق خرافه و ماحصلش و إمكانياته و إدارته و مش عارف إيه لكن الخساره دائما أسبابها هلاميه قدريه عبثيه .. ما علينا أدينا انبسطنا و ضحكنا شويّه ههههه
زمان الوصل
..........
معلش اسمح لى أتدخل بما انك أشرت الى ردود الأهلوية بالتدوينة وأرد عليك من كلامك عن الحكم الموضوعى
هل الحكم الموضوعى ياعزيزى انك كمواطن مصرى وبيفهم يفرح فى الأهلى ويقولك خليهم يتبطوا ونضحك عليهم ولا خيبة الأهلى ولا بشتكة وحبشتكة وباتشوكا فى القلب وفى العين؟ دى أصول و حكم موضوعى؟
الحكم الموضوعى يقول ان الأهلى فريق كبير وفريق بطولات مافيش فريق من العجزة اللى فى مصر جابها ولا حايقدر يجيبها فى عشرين سنة جايين عالأقل وان الأهلى حاليا يمر بمرحلة اختلال وزن لكبر سن لاعبيه وشدة اجهادهم ومحتاج راحة واحلال وتجديد فى أسرع وقت
الحكم الموضوعى انك كمصرى تواسينى وتقف جنبى لأنى كأهلى رافع راسك دايما ولما تحصللى كبوة يبقى احنا كمصريين نحلها مش نقول باتشوكا فى القلب وفى العين
خللينا نتريق ونعمل الهيافات دى فى الدورى بتاعنا..لكن مع الغريب لازم نبقى غير كده
وشكرا ليك
يا جماعة احنا بس بنهزر
او تحديدا انا شخصيا بهزر فارجو ان ماحدش يزعل مني خالص
منك لله يا رامز
المقالات النفيخة و العلامات الثقافية اللي كنت عمال تنقلها كانت اريح
يعني لما تيجي تكتب تولع خناقة في البلوج
فعلا غواية و قلبت لفتنة كمان
هع هع هع هع هع هعهع هع هع هع هع هع
و بعدين بالراحة شوية يا عم m5m
ده هزااااااااااااااااااااااااااااااااار
الهي يولع في الزمالك اللي خللا ليه مشجعين يشمتوا فينا بالشكل ده
وده دعاء من باب تعليق شماعة الخطا على الاخرين
هع هع هع هع
m5m
:)
يا عزيزى أنا قلت أسبابى السابقه على الضحك قبل أن أسمح لنفسى بالضحك ..
وهو ليس ضحك قهقهه لكن أنا الغرور من الصفات التى تستفزّنى جدّا فأمّا ألاقيه بيتحطّم طبيعى يكون رد فعلى إزاء هذا ساخرا .. نعم بكل صراحه أنا أضحك سخرية من أى شخص أو مؤسسه تتخيّل أنّها غير قابله للهزيمه و حين تهزم ترد هزيمتها لأسباب أخرى غير مسئوليتها هى عن الهزيمه .. أيّا كانت هذه المؤسسه !!
ومن ثمّ أستغرب جدّا حديثك -وحديث من سبقوك- عن الفرق الأخرى و وصفها بالعجزه على طريقة مساحيق الغسيل اللىّ بتجيب لك قميصين واحد نظافته عاديه و الآخر متّسخ و تقول لك شوف مسحوقنا نظافته ماحصلتش إزّاى بينما هى تقارنه بما لا يجب المقارنه به أصلا .. لا أفهم لماذا يضع نادى القرن نفسه فى مقارنه مع الفرق العجزه -مع كل الاحترام للعجزه و ليس للفرق- و لماذا تكون هذه المقارنه فقط وقت خسارته بينما وقت مكسبه مفيش مقارنه طبعا و "الأهلى" فوق الجميع !! :)
أنا قلت فى السابق أنّى لا أشجّع أى فريق و من ثمّ لا يمسّنى كثيرا موضوع بيمثّل "مصر" أو بيمثّل علينا .. خاصة و هو حين يكسب مش بنقول ولا انت ولا أى مشجّع بيقول "مصر" كسبت لأ بيقول "الأهلى" كسب و ارجع حتى لمداخلتك دى هتلاقى هذا المعنى الذى يفصل بين "مصر" و بين "الأهلى" فلماذا إذن حين يخسر "الأهلى" نقول عيب عليكم ده كان بيمثّل "مصر" بينما حين يكسب يكون بيمثّل نفسه و "مصر" دى تيجى كحليه فى آخر الحوار؟
على أى حال يا عزيزى لك كل مواساتى لأن الأمر يهمّك و يعنيك كشخص و لأى إنسان الهزيمه تؤلمه بهذا القدر نفس المواساه لكن بعيدا عن الأشخاص أنا باشوف "الأهلى" بيمثّل نموذج بطلجة المؤسسات فى "مصر" و ده يمكن محتاج موضوع لوحده .. لكن فى نفس الوقت هل يمكن أن نحلم بين أن يفصل جهور "الأهلى" بين ذواتهم و بين فريقهم ولا يأخذوا أى نقد يوجّه إليه بهذه الحساسيه !! ما باقى الفرق بتتلطّش تريقه و سلخ و محدّش بيزعل جامد كده زيّكم؟ :)
تحيّاتى و يا رب ماتكونش زعلان
زمان الوصل
هههههههههههههههههههههه
و يظل الاهلي فوةق الجميع و بلطجة مش بلطجة اللي مش عاجبه يهج من البلد
ناقص كمان تبقي ناشطة حقوقية مدافعة عن الاقلية البيضاء في مصر
ههههههههههههههههههههه
والله ده بالراحة ياكومى..أصل طول اليوم الواحد مرارته مفقوعة وفى الشغل مع الزملكاوية اللى من عينة هشتوكا وبشتوكا والكلام الفاضى اللى بيداروا بيه خيبتهم القوية مع فرق المظاليم..فمش طالبة أخر الليل كمان نلاقى المدونين والمدونات اللى هما المفروض الصفوة بيتكلموا نفس اللغة
تحياتى واحترامى للجميع والهى المكسيك تولع
يا إخوانى إيه الصوره اللىّ "رامز" حاططها دى؟ أنا أوّل مرّه آخد بالى منها .. مين دول؟
يا عم مين قال ان المدونين و المدونات صفوة
ولو هما كدة مين اللي صفاهم لا سمح الله
انما نحن بشر نئكل و نصرف في الحماما كاي بني ادم تاني
زمان الوصل
كنت أرد على محمد الكومى حين أدخلت أنت ردك الأخير
أشكرك على ردك و أعتقد لو فتحنا باب النقاش حول اعتقادك ببلطجة مؤسسة الأهلى فلن ننتهى..اذن أنتظر تدوينتك عن هذا الموضوع لنتناقش عندك براحتنا واحنابنشرب القهوةعشان هنا رامز بخيل زى مانت عارف
زمان الوصل
يسلم فُمك
تعرفى انا زمان كنت متعصب للاهلى زى بعض الاخوة كدة لانى ببساطة ورثت حب الاهلى زى حب الدين كدة
بس الحمد لله ربنا شفانى و عرفت اننا فى دولة الاهلى المسيطر على الإعلام والحكام و النقاد و كل شئ و بقيت اشجع منتخب بلدنا و بس و إن كنت متعاطف مع الزمالك ، اصلك دايما بتتعاطفى مع الغلبان و تتمني انه يشم نفسه شويه و يفوق
لان ضعف الزمالك و هزايمه تشعرى انها ضعفات بشريه
انما قوة الاهلى وإنتصارته الدايمه و تعاليه على الكل (الاهلى فوق الجميع) تحسسك ان الاهلى ده إله من الهة الاغريق
تحياتى
زمان الوصل
...........
أنا أسف لعدم انتباهى للبروفايل الخاص بكى ولفت نظرى رد ابن المليونير ..فلتسمحى لى باضافة ياءمخاطبة المؤنث الى كل ردودى السابقة
ابن المليونير
..............
تقول انك ورثت حب الأهلى - وان كنت أشك فى ذلك- كحب الدين ثم تقول انك شفيت من حب الأهلى..فما أخبار حب الدين؟
أنا زعلان منك بجد
ماكنتش متوقع بوست فقير زي ده
يا راجل ده من قبل الماتش ما يخلص و أنا بقول يا ترى رامز حيكتب إيه و حيعمل إيه .. هو احنا بنخسر كل يوم علشان تعمل البوست السيس ده
عايزين حاجة قوية كده يا رامز على قد إمكانياتك و على قد مستوى الحدث .. عايزك تبعبع كده و تطلَّع من جوه و لو أي أهلاوي اتعرضلك أنا كفيل بيه
و بالنسبة لأعزائي الأهلاوية فياريت تاخدوهم و تسكتوا .. كل واحد لما ييجي دوره لازم يبقى مؤدب و ميفتحش بقه
:))
ضحكتني و انا مش عايزة اضحك
أنا ميهمنيش اهلي ولا زمالك و لا القنال حتى..انا يهمني بس اعرف انت جبت "بشتكة" و "البطة الشقية .. للزفلطة اليابانية " دول منين؟؟ :))
===
m5m
===
للأسف لا أظن تدوينه عن "الأهلى" كمؤسسه ستصدر قريبا على مدوّنتى لأنّى فقدت الحماس للمتابعه و التعليق على هذا الأمر من فتره ليست قصيره :) بس فيه حاجه كتبتها من فتره أيّام أزمة "الحضرى" -هاضيف اللينك بتاعها- ممكن يكون فيها جزء كبير ممّا أردت أن أقوله .. و مايهمّكش فيما يتعلّق بضمير المخاطب :)
http://zamanalwasl.blogspot.com/2008/02/blog-post_26.html
تحيّاتى
===========
ابن المليونير
===========
فعلا ناس كتير بتبتدى أهلاويه مش عشان همّا حكموا و حللّوا أداء "الأهلى" فوجدوه الأكثر استحقاقا للتشجبع و الانتماء لأ همّا ورثوه مثلما ورثوا دينهم .. و بعد هذا الإرث بقى صعب تغيير الانتماء ده لأن هذا معناه الانتماء لفرق أضعف و محدّش بيحب يكون منتمى للطرف الأضعف .. يمكن لأن الانتماء للأقوى بيخلّيه يتخيّل أنّه جزء من هذه القوّه !! زى ألعاب الفيديو جيم كده أمّا تلاقى اللىّ بيلعبوها و من قبلهم اللىّ بيصمموها بيختاروا أن يضعوا فرق فائزه فى مواجهة بعضهم البعض و اللىّ بيعلبوا دايما بيختاروا فرق من اللىّ بتكسب دايما و كأن مكسب هذه الفرق -التى لا ننتمى إليها ولا تعرف عنّا أى شئ من الأصل- بيضيف لهم همّا شخصيا حاجه !!
و كما قلت أنت هناك ما يثير الضيق فى محاولة تصوير كل انتصار على أنّه راجع لروعة البشر القائمين عليه بينما الهزيمه مانعرفهاش و مالناش يد فيها ..
تحيّاتى
ساندريل
يا سلام عليك يا احمد بتقول حكم والله
:)
حبيبى يا ابو اشرف
جرعة الدلع كانت قوية حبتين
و يا حلوة يا بلحة يا مقمعة شرفتى اخواتك بالاربعة
مدونه جميله و الجميل ايضا ردود العزيزة زمان الوصل انا زيها باكره البلطجه و الصلف و الغرور و باكره النادى الأوحد و الحزب الأوحد بس للأسف مش زيها على الحياد انا زملكاويه
بص انت مؤكد عارف ان مالياش في الكورة
و اخر عهدي بيها ايام الخطيب و مصطفى عبده و الجيل العظيم ده
لكن يا قداستك عيب اوي تشمت في الاهلي و الزمالك قبلها بيوم مهزومة هزيمة موكوسة زي بتاعت بترول و لا اسمنت اسيوط
بجد عيب يعني كنت افضل عشان مسداكيتك انك تحزن على الزمالك في بوست و تبهدل ميتين اللي جابوه و تيجي تشمت بعد كدا في الاهلي
لكن شمتان طوالي كدا مش حلوة في حقك
عيب
يعني متخليناش نتلكم
انا تلات ارباع عيلتي زملكاوية بس خلاص
طهقوا من الفضايح اللي بيمروا بيها كل يوم على ايد الزمالك
لين دماغك و سيب الفريق الخسران ده و فكك منه
سلام
أنا كمان شمتان
تضامناً مع رامز و نسرين و كل الزملكاوية.. في وجه الكومي و محمد ( m5m ) .و كل الأهلاوية .
مش عارفه ليه بعد ما قريت التحديث افتكرت إعلان "شيفروليه" الدبّابه اللىّ بيؤكّد على حب المصريين للمكايده و الغيظ :) طيب يا ترى الكابتن "سنّيح عضل" أخو الكابتن "شديد عضل" هيكون لهم دور فى الاستقبال التاريخى ده؟
ههههههههه
بجد فرحانه فيهم ..مش فى الفريق لكن فى المشجعين ...اغلبيه على الفاضى زى اغلبية الحزب الوطنى "ماشيين مع الرايجة" ...لنا الله نحن مشجعى الزمالك ...يالله من ميت عقبة للجزيرة ياقلبى لا تحزن .. وصلت الشغل متأخرة وكان الماتش تقريبا بيخلص وكل ما اقابل اهلاوى اقوله مبروك ..النهارده بقى نصهم عيان ونصهم مش بينطق تقريبا من اثر الصدمة ..تقريبا بيدعوا فى سرهم ربنا ينصفهم يوم الخميس ...هيفضلوا على كده.. يا اما الاهلى يغلب يا اما يفضلوا على الوضع الصامت الى اجل غير مسمى..بصراحة الجو جميل جدا وهادى ومش عاوزين دوشة..مشجع الزمالك يستحق جائزة افضل مشجع لانه رغم الهزائم والكوارث متمسك بفريقه وهو امر صعب فى ظل غوغائية_ عفوا_ " معظم" مشجعى النادى الاهلى ..يوم حلو وعشرين مر.ننتظر رجوع مدرسة الفن والهندسة من سفرها البعيد لتطرد اشبال نادى مركز شباب ابو الغيط الذين ضلوا طريقهم الى القناطر ليذهبوا الى قلعة ميت عقبة.
تحياتى لك
مشمشة
Towtor
.......
أظن عيب توصل الأمور للشتيمة..الأهلاوية ليسوا غوغائيين ولا ماشيين مع الرايجة وليس مطلوبا منهم تشجيع فريق واقع و فاشل زى فريقكم لكى ينالوا الرضا السامى لجنابك و من شابهك..الأهلى فريق محترم بانجازاته وجمهوره وسيظل كذلك دائما ان شاء الله رغم أنف و حقد الفاشلين
أستاذى حنا السكران
...................
كم أحزننى أنك لست فى معسكرنا..بس معلش... لسه فيه أمل فى التوبة : P
جوو
ربنا يخليك يا جو
:)
محمدm5m
كفاية يا ابني حيحصلك حاجه من الزعل و العصبيه ده غير انك بتخبط جامد فى الكلام واخدها جد بزياده
نسرين بسيونى
باخبط جامد فى الكلام؟
شكرا على ذوقك يا نسرين
اه ماهو السبع لما يتعب القرود تتنطط على ضهره
تم القبض على رامز شرقاوي صاحب المدونة بتهمة اثارة الفتنة الكروية بين الاهلاوية و الزملكاوية
و بعدين يا جماعة يكفي ان انتو اسمكوا البلانكو
يعني البيييييييييييييييييييض
في احسن من كده
نياهاهاهاهاهاهاهاهاهاها
ياعم خليك واقعى
الكبير كبير وخساره ماتش مش نهايه الدنيا
الدور والباقى على الناس المهدده بالهبوط
ربنا يستر عليكم
الفرق بينكم وبين الاخير يادوب 6 نقط
يعنى فركه كعب
ومش بعيد نلاقيكم السنه الجايه فى دورى المظاليم مع دسوق ودمياط وكفر البطيخ
ياعالم يمكن ساعتها تفوزوا
خبر حصري - مش حصري يعني محصور في حمام مع ان العلاقة قريبة -
فايزر تورد طن اقراص فياجرا كروية للاعبي الزمالك لمعالجة حالة العقم التهديفي للاعبيه التي استمرت لست مباريات كاملة كما تواردت انباء عن تركيب اي وسيلة لمنع الاهداف اللي عمالة ترخ على مرمى الزمالك غير ان عبد الحميد الترزي تبرع بعشر قفاطين كاستور للعيبة و جه عم احمد الخيام و اتبرع بخيمة لحارس المرمي
اصدرت ادارة النادي امرا بمنع سماع اللاعبين لاغنية مروى الصراحة راحة يا روحي و انت مبتعرفش
هع هع هع هع
البادي أظلم وانتم بدئتم و إن عدتم عدنا
نياهاهاهاهاهاهاهاهاهاها
يعنى تدوينة عن بشتكة ( الأهلى سابقاً ) توصل تعليقاتها لفوق الأربعين تعليق و تدوينات عن كتب و موضوعات هامة , متجبش عُشر عدد المعلقين !!
عجبت لك يا تدوين .
--
انا مش زملكاوى بالمفهوم الكروى المباشر . لأنى مش بحب الكرة و لا بشجع فريق معين . الماتشات الوحيدة اللى بتفرج عليها هى ماتشات مصر . انا متعاطف مع الزمالك بس , لكن الأكيد و بقولها و انا مستريح الضمير , انا مبحبش الأهلى و بكررها انا ما بحبش الأهلى . و السبب أنه بيفكرنى بالحكومة و حركاتها القرعة , لو كسب يبقى علشان فريق عبقرى و لازم مصر كلها تشجعه . لو خسر يبقى ظروف خارجة عن أرادته و غصب عنه و كبوة تفوت و لا حد يموت .
--
بيقولك خبر هام
علشان كان الأهلى يكسب الماتش لازم يكون التحكيم مصرى .
هههههههه
--
بالنسبة للسؤال الخاص عن مصدر كلمة بشتكة
هى من فعل رباعى المصدر و هو " بشتك " و بشتك فى عبد المجيد الصحاح معناها حطله فى المحطوط و شيله تمام مظبوط . و الفاعل " المُبشتِك " و المفعول به " المٌتبشتِك " . و يقال " تبشتك الأهلى " من باتشوكا المكسيكى , و المكسيك دولة مشهورة بالشطة المكسيكى , أى أن الفريق المكسيكى حطله الشطة فى .... فى ... فى جنبه , و الأهلى بينام على الجنب اللى يريحه . ههههههه .
آبى
كلامك صح تمام
لو اشغالهم مكنوش صحيوا بدرى و لا عملوا كده أبداً . و انا كمان مبسوط صدقينى .
===
مهرة
فعلاً , اللهم لا شماتة
ههههههه
===
زمان الوصل
انا ضهرى وجعنى من كتر الأنحاء , لكن لازم انحنى مرة كمان لحضرتك , تحليل حضرتك للموقف هو نفس رأيى تمام . شكراً بجد بجد أنى مدون فى نفس الفضاء التدوينى اللى حضرتك بتدونى فيه , متتصوريش انا سعيد قد أيه .
===
محمد باشا الكومى
يعنى نزعل من بعض علشان الأهلى يرضيك انت برضه الكلام ده . و بعدين يا سيدى الزمالك اتغلب من فريق مصرى و اتطرطش عليه من اسيوط , ماشى مفيش مشكلة , لكن شطة مكسيكى !!! ... دى صعبة أوى . هههههههههه
سبع الليل
انا لسه عند كلامى , المكان مكانك و بعدين انا مش زملكاوى . انا فقط مبحبش الأهلى .
===
م5م
يا باشا , انت أكبر من كده و زعلك يعز علىّ . بس الأهلى يستاهل الصراحة . و متزعلش منى .
===
انت حرة
يا ريت بقى تكملى جميلك و زى ما خلتونا نفرح مرة و صوتنا يعلى مرة , يا ريت بقى تكملوها علطول و تفرحونا علطول و تكملوها كده علطول . ههههههههه
===
نسرين
ايه الغيبة دى كلها , فينك يا بنتى ؟ لو هزيمة الأهلى حتخليكى تيجى هنا علطول , يبقى يا رب يتغلب علطول . هههههههه
ابن الناس الأغنياء
منورنى
===
ساندريل
صدقنى , انا بس مشغول فحط اليومين دول و متبهدل اخر بهدلة , لكن انت عارف لو كنت فاضى , كنت ظبط المسائل , و فعلاً على كلامك , لازم لما الواحد يقع , يحط لسانه فى بقه .
===
مون بيبى
عرفتى اصل كلمة بشتكة ؟ . تمام كده ؟
===
جيمى
شفت الشطة المكسيكى عملت ايه ؟
ههههههه
مش فاهمه
منورانى و انا معاك و مؤيد تماماً لكلام زمان الوصل
===
حفصت
انا لا اشمت و لكنى اتجمل .
===
حنا السكران
كلنا هذا الرجل
===
توتر
منورانى و دى مدونتك و تشرفينى فى أى وقت
===
الشارد
ما هو علشان انا واقعى , ففرحان و بضحك على الأهلى . مش مناسبة تضحك برضه ؟
لما حد تانى يقع نضحك برضه , هى دى الواقعية . ههههههه
طب طالما ظهرت اقولك حاجة
بالنسبة للتعليق
لاحظ انك بتتكلم عن عدد االتنعليقات مش عدد المدونين
يعني انا و زمان الوصل و ام فايف ام مثلا واخدين نص التعليقات ايجار جديد و مفروش
انما برضه اللي بيعلقوا هما هما
و ان كان ده لا يمنع برضه انها حاجة تحرق الدم يا عزيزي
مساك احمر يا عم
اه حاجة كمان
عيب يا راجل لما تقول نزعل من بعض
دي فيها يا دوبك قطع رقاب
ههههههههههههههههههههه
46 هزيمه في 4 مواسم , حصالة افريقيا , هزائم من الأهلي عرض مستمر , هزائم من طوب الأرض في الدوري , مرشح وبقوه للمنافسه على الهبوط مع اول هزيمه .. ولسا مشجعين الزمالك لهم عين يفتحو في الأهلي بطل الدوري وأفريقيا اللي بيلعب في كاس العالم للأنديه :))
"يعنى تدوينة عن بشتكة ( الأهلى سابقاً ) توصل تعليقاتها لفوق الأربعين تعليق و تدوينات عن كتب و موضوعات هامة , متجبش عُشر عدد المعلقين !!
عجبت لك يا تدوين " ...
أضف إلى ذلك الحذاء الطائر ومراوغه بوش السريعه له..والهليله حوله..أجد نفسى أبتسم وأنا أتنهد قائلا كما يقول أهلنا فى المغرب العربى "الله غالب" تحياتى..خالد
يااااااااااااااااااااااه فرقت معايا علي بوست واحد لو كنت جيت بدري بوست ولا متاخر تلاتاشر خمستاشر بوست .. معلش داخل كده بزفه . بس اصلي متقالي كلام قد كده في محاسن المدونه واسلوب المدونه وجمال امدونه .. اوم اجي اشوف الاقيني اتخبط في البوست ده
بس ماهو هو زملاكوي ختي النخاع .. كان لازم اعرف
يلا مش مهم
امشي اتفسح في الللي ورا لحد ما يبقي فيه جديد
او الزمالك يكسب سرس الليان
العزيزة زمان الوصل :
أنا باشوف "الأهلى" بيمثّل نموذج بطلجة المؤسسات فى "مصر"
وماذا عن الآخرين؟ وعن الميديا البيضاء؟ وعن أعضاء مجلس الشعب عن أنديتهم؟ وعن.. وعن.. وعن..؟
ماذا عن البعاد عن عين العاصمة المدللة الذين جعلوا أنديتهم مشاعاً للساسة والهووليجانز، وجعلوا من أنفسهم متحدثين باسم "شعب المحافظة"؟ بقى عندنا ستين شعب .. دة حقنا نسمي نفسنا "الولايات المتحدة المصرية"!
من الصعب أن نحكم على نموذج دون أن ننسى باقي النماذج الأخرى..لنتحدث بموضوعية..
بعيداً عن كوني أهلاوياً متعصباً.. أرى أنه لا الاهلي هو الحزبوطني ، ولا الزمالك هو نادي الناصريين والإخوان.. وأن الكثير من الصراخ في هذا الموضوع خاصةً في صحف ما يسمى بـ"ضار التحرير" يندرج تحت بند تسبيب ما لا سبب له.. والتخبيط في العلب..
يااااة
زملكاويه
من زمان والواحد كان ناسي الكلمه دى
زملكاويه وبيتكلموا كمان
طب طمنتوتى الحمد لله
انا هبلغ كل الناس ان اخوانا الزملكاوية رجعوا يتكلموا تانى زينا وبطلوا يشاوروا
وفى المناسبه السعيدة دى احب اهدى للجميع الأغنيه العاطشفيه
اجمل احساس فى الكون
بيبو وبشير
بيبو والجون
ويمسيك بالخير يا اوسه
Post a Comment