Wednesday, April 29, 2009

يا مرحب بأم حسن

-1-

جيل محظوظ

هذا الجيل محظوظ و ينبغى ان يعترف بحظه و يشكر ربه و ينتظر " يوم القيامة " فى تمهل و إيمان و عن قناعة انه لن يرى أكثر مما رأى و أنه ليس بالأمكان أفضل مما كان , " ان ما لم تراه عين و لم تسمع به أذن و لم يخطر على قلب بشر " , قد حدث و تم و أُكمل . هذا الجيل بعد أن يستغفر ربه و يشكره , عليه ان يقذف بكتب التاريخ من أقرب شباك . فما حاجتنا الأن الى التاريخ ؟ " ما أحنا شفنا كل حاجة " .....

مجاعات زى القرون الوسطى و شفنا فى أفريقيا و شفنا طوابير العيش عندنا !

انهيار اقتصادى زى بداية القرن , عايشنه و أتخرب بيتنا و الحمد لله !

محاكم تفتيش و حرق كتب و مصادرتها زى القرون الوسطى , شغال على ودنه و على عينك يا تاجر و مش محرومين من حاجة  !!

بطالة و سرقة و قتل و أغتصاب و تحرش .. اللهم بارك و زيد , هو احنا عندنا غير الحاجات دى !!

حروب نووية !! .. قريب إن شاء الله , كوريا بتهدد و طالبان فاضلها شوية و تاخد ترسانة و ربنا يقدم ما فيه الخير و نعوم فى النووى .

حرائق زى حريق القاهرة و روما .. شغال الله ينور بيتنا .. ينور بيتنا بحريقة !!

فاضل إيه يا واد يا عبس ؟ فاضل إيه يا واد يا عبس ؟ أه .. فاضل " وباء يحصد مليون و لا أتنين من البشر " .. الحمد لله جالنا الوباء أهه و فاضل بس ان الناس تموت  , و بكده يبقى الجيل ده شاف كل حاجة , و ملوش حجة .

-2-

يا مرحب بالوباء يا مرحب

واحد صديقى متزوج و عنده أسرة و من اللى فقدوا وظايفهم ( و فقدان الوظيفة ده طيرله مخه فى الغالب ) , فرحان قوى بالوباء اللى شغال دلوقتى , و بيقول لو التوقعات بتاعة منظمة الصحة العالمية تصدق و يموت خلال 6 أشهر مليار بنى أدم حيبقى سعيد جداً و أخر أنبساط . و لما سألته ليه ؟ .. ضحك و قاللى :

ما هو انت أصلك مش فاهم , لو مات مليار واحد حيحصلى حاجة من الأتنين .. يا اما اموت و أستريح , يا اما لو الناس ماتت و انا عايش , عدد الناس حيقل , الأيد العاملة تقل , فيزيد الطلب على العمالة تانى و ساعتها الاقى وظيفة بدل اللى راحت منى .. فهمت ؟ يعنى يا اما اموت و استريح يا اما الاقى شغل ... يا مرحب بالوباء يا مرحب !! .

-3-

دعاء

اللهم انى لا أسئلك رد القضاء و لكنى أسئلك اللطف فيه ! .. يعنى يا رب هى مصر ناقصة ؟

-4-

دعاء

اطلق عبدك بسلام فأن عينى قد رأت خلاصك

-5-

شر البلية ما يضحك

حسب تصريحات جريدة اليوم السابع , ان اللانشون و البولوبيف اللى سعرهم رخيص بتوع الغلابة , دول معمولين من لحم الخنزير !! ..

يعنى بما ان خط الجريدة تخصص كلام فى الأضطهاد فهى عايزة تقول : أن المسلمين بيضطهدوا المسيحيين و المسيحيين بياكلوهم لحم خنزير , يعنى خالصين .. ههههههههههه .

-6

للمجانين

برضه علشان اخوتنا بتوع نظرية المؤامرة يلاقوا لقمة عيش , حسب تصريحات جريدة اليوم السابع , أشهر مربى خنازير فى مصر أسمه " إسرائيل عياد "  ..  واخد بالك من إسرائيل دى ؟

يعنى من اسمه كده ,, مسيحى صهيونى صليبى .. يكونش الوباء ده مؤامرة على الأسلام ؟ ههههههه .

-7-

من احمد عدوية الى أم حسن فى المكسيك :

سلامتك يا أم حسن 




Salamtaha oum hassan [mawaly.com] - Ahmad adawya

8 comments:

Anonymous said...

بالذمة لو الخنازير عندهم حلال و اللى شغالين فيها مسلمين كان مبارك امر بدبحها كده بمنتهى السهولة؟؟

على باب الله said...

فعلاً إحنا شفنا كل حاجة .. بس كل حاجة وحشة ...هو لمؤخذة يعني .. مش من حقنا نشوف شويتين حلوين كده قبل ما نتوكل ؟

على رأي الواد التخين بتاع فيلم ثقافي

" ربنا ما يرضاش بالظلم "
----

فرعون said...

حتى لو لحم الخنزير كان محلل عند المسلمين برضو كان هيكون نفس الوضع لان هذا شئ لصحة الانسان ... بلاش تلزيق

Unknown said...

الله يسترنا من انفلونزا الحمير
اهي دي تبقى جامدة علينا
يعني وباء هيقتل ملايين

fawest said...

جبت من الاخر والله يا رامز

عباس العبد said...

بسطاويسى
القصة مش فى الدبح .. لأن الدبح فى حالة الخطر مبرر
لكن مش القصة فى الدبح
اقرا اللى كتبه مراقب مصرى يمكن يكون فيه فايدة
===
على باب الله
يا ريت نشوف حاة حلوة بجد
احسن الدنيا بقت سوااااااااد
===
فرعون
تلزيق إيه ؟

عباس العبد said...

المنفى
ربنا يستر دى مش حنخلص منها
===
طه عبد المنعم
الله يخليك يا باشا

أبوفارس said...

طب خليها ف سرك يارامز ...احسن الخبرا فى كندا بيقولوا ان البنى آدميين هما اللى بيعدوا الخنازير مش العكس
فلو حكومتنا الرشيده ومجلس الأنس الموقر شموا خبر المقدس "أسرائيل عياد" وشلته حيروحوا ف الكازوزه
ماهم لزمن يدبحوا حد أمال حكومه نايمه مثلا لاسمح الله
مساء التنفس والهلفطه تحياتى خالد