Saturday, November 24, 2007

سى احمد الصعيدى



اعانى من حالة اكتئاب منذ حوالى اسبوع

و هى حالة شبه متكررة

اعانى منها كل فترة

اليوم كانت نهاية تلك الحالة

نزلت لأشترى جرائد اليوم

فوجدت العنوان الرئيسى لجريدة الدستور

بالبنط الاحمر فى صدر الصفحة الاولى

( مش بهرج و انزلوا اشتروا الجريدة )

ما ان قرأته حتى اصابتنى حالة من هستيريا الضحك

هى كانت السبب فى خروجى من تلك الحالة

...............

كان العنوان كالتالى

الجماعة الاسلامية تعلن تأييدها لأستقالة شاهينازالنجار

من البرلمان و تفرغها لرعاية زوجها احمد عز

الخبر

اعلنت الجماعة الاسلامية تأييدها لشاهيناز النجار

النائبة السابقة عن المنيل فى استقالتها من مجلس الشعب

و البقاء فى البيت لرعاية زوجها

النائب احمد عز امين التظيم بالحزب الوطنى

....

و قال الشيخ اسامة حافظ القيادى فى تنظيم الجماعة الاسلامية

فى كلمته التى نشرتها له الجماعة على موقعها بشبكة الانترنت

ان المنظمات النسائية و مؤيديها من الرجال الذين يروجون للأفكار الغربية

صبوا جام غضبهم على النائبة المستقلة شاهيناز النجار

بسبب قراراها للتفرغ لبيتها و زوجها

قطب امانة السياسات و امين التنظيم بالحزب الوطنى

....

و حيا الشيخ اسامة حافظ السيدة شاهيناز النجار

التى ضحت بكل البهرجة و الاضواء

و فضلت التفرغ لبيتها و وزوجها و اولادها

..............................

بالمختصر احمد عز طلع صعيدى و قعد مراته فى البيت

ده ملخص الخبر

........................

جريدة الدستور

لقد ابهجتينى و صنعتى يومى

دعك طبعا من ان الخبر ساذج لأقصى حد

لا يستحق النشر و لا تعليق الشيخ اسامة حافظ

فهى خصوصيات لا معنى للتعليق عليها

من قبل شيخ فى الجماعة الاسلامية

( الا بقى لو كانت دى ثمرة المراجعات للجماعة الاسلامية السابقة

على مراجعات الجهاد الاسلامى الحالية )

كل ما اضحكنى هو ان الصحافة و الفكر الصحفى المصرى

وصل لهذه المسخرة

حالة خاصة جدا بين رجل و زوجته

مهما كانت شهرتهما ... لا معنى لأى تدخل من اى نوع و من اى شخص

تصنع منها الصحافة عنوان الجريدة الرئيسة

لأ و ايه .... تعليق من قيادى بالجماعة الاسلامية

اى تفاهة بشرية

اى حماقة

اى تخلف عقلى يحكم المشتغلين بعالم الصحافة

و اى منطق ساذج يقود هذا القيادى بتلك الجماعة

جريدة الدستور بالنسبة لى

اصبح مجلة كاريكاتور الجديدة

شكرا لقد اضحكتمونى

و اخرجتمونى من حالة الاكتئاب

.................

شاهيناز

ايوة يا سى احمد

انا معنديش ستات تشتغل

حاضر يا سي احمد

حتسيبى البرلمان و تقعدى فى البيت

عينى يا سى احمد

انا عايزك تهتمى بالاولاد و الطبيخ و البيت

انت تأمر يا سى احمد .... انا عايزاك تكون راضى عنى يا سى احمد

...........

طبعا مردتش احط صورة لشاهيناز

علشان عيب ... دى ست حتقعد فى البيت

و جوزها صعيدى ميرداش ان نحط صور زوجته

..............

انا فطست على روحى من الضحك

يخرب بيت الصحافة المصرية على الجماعة الاسلامية

على بتوع ماليزيا

مسخرة .... خالص

يا ولاد الفقرية

ابهجتمونى


7 comments:

Mirage said...

كلوه كوم وحكاية ماليزيا كوم تانى

على فكرة جريدة الدستور دى جريدة مغرضة وغير موضوعية وملوثة دائما بالخرا

so7ab said...

نيهاهاهاهاهاهاهاها

انا فتسطنى بعدان تركت البهرجة
وواضح ان الصحفى الالمعى حذف الفشخرة والمريسة انت عارف ده جرنال محافظ

تحية عطرة من القلب الى صناع الكوميديا بالدستور

bluestone said...

خبر استقالة شوشو بتاعة المنيل استمر خبر الموسم على مائدة الصحافة المصرية لمدة اكتر من 10 ايام
من التحليلات للنكت
لحقوق المرأة
وكلام فارغ
لكن اللي قاله الراجل ده
أتفه حاجة قريتها عن الموضوع لحد دلوقتي
والصحفي اللي كاتب الخبر واضح انه يا إما عبيط
يا إما عبيط

خبر زي ده كان عايز صحفي شاطر
كان هيطلع منه نكتة بنت حرام

الكاتب الصحفي جلال عامر كان ليه تعليق قوي جدا على الموضوع
قال انه الست شوشو اعطت نصيحة مهمة جدا لكل البنات
وفي كيف تختارين عريسا مريشا

يا تروحي النادي
يا تضربي الودع
يا ترشحي نفسك في مجلس العز .. قصدي مجلس الشعب

بس الشيخ ده نكتة من نكت الزمن
المسألة مش مسألة شأن خاص وموضوع عائلي ..

واكتر حاجة ضحكتني قال بيقولك تفرغت لبيتها وجوزها والاولاد وسابت البهرجة والاضواء ..

وده طبعا لصالح الزوج الصعيدي
انما محدش قالنا ازاي هتحط الكام مليون بتاعتها
على الكام مليار بتاعته
ويبقى زيتهم السوبر وفي دقيقهم الفاخر

وآدي الستات ولا بلاش ..
انا بدأت جديا افكر في الترشح لمجلس الشعب يا جماعة ..
وبعدين لو اتقدملي واحد زي عز بمليارته

انا مش استقيل من مجلس الشعب وبس
ده انا أولع في المجلس كله
:)
وتحياتي القلبية للعروسين

Sharm said...

والله بلد فاضية

على باب الله said...

انا فطست على روحى من الضحك

يخرب بيت الصحافة المصرية على الجماعة الاسلامية

على بتوع ماليزيا

مسخرة .... خالص

يا ولاد الفقرية

ابهجتمونى

----

ههههههههههه

جريدة الدستور في الغلب بتجيبلي إكتئاب من كم التدليس الرهيب الموجود في كل صفحة

لكن أول مرة تبهجني

: )

Arabiology said...

أي والله، مسخرة و قلة أدب.

Anonymous said...

و ليه ما تقولش يا رامز ان الخبر ده بيأكد توجهات الدستور و بيعرفنا بمصادر تمويلها
كثير باحس انها جرنال ضد الحكومة لصالح الاخوان