قولولى انا اعمل ايه مع الحكومة الى جابتلى الشتيمة و التهزيء دى
حاجة تحرق الدم فعلا و مستفزة
....
رجعت من الشغل كالعادة الساعة سابعة الصبح
دخلت نمت
على 3 و نص كده صحيت من النوم على صوت امى و ابويا و هما بيتخانقوا
ابويا بيعتقد ان فى مؤامرة دولية على فلوسه الى مبقاش عارف يحوش منها
امى اتصلت بالسوبر ماركت تجيب حاجات
و كلمة سوبر ماركت دى ابويا لا يعترف بيها
اى محل كبر او صغر بيبيع جبنة و لنشون يبقى بقال
و يتساوى فى ذلك بقالة عم حسن و كارفور
و المرة الوحيدة الى اقنعناه انه يروح كارفور
قال عليه بقال بس كبير شوية
........
جبت منين يا بابا الحاجات دى ؟
من بقال فى مصر الجديدة بس نضيف
و الكيس مكتوب عليه مترو
...........
المهم امى اتصلت بالبقال و طلبت حاجات و منهم 10 ارغفة عيش بلدى
عيش ابيض بلدى
ابويا طلع الحاجات من الكيس و فردها على الترابيزة
و قعد يسئل امى على حاجة حاجة
دى جبتيها ليه ؟ و بكام ؟ و محتاجينها ضرورى و لا لأ ؟
و لو ليها بديل ؟ ايه هو ؟ و بكام ؟ و ايهما ارخص و احسن ؟
امى ست طيبة و شاطرة و اقتصادية جدا
و عارفة انه بيعمل كده علطول فبترد عليه بالاصول
فالراجل يا حرام مش لاقى حاجة يزعق عليها
كله محتاجينه و سعره كويس
و الغالى منه مينفعش نجيب الرخيص بتاعه لأنه مش كويس
لغاية ما وصلنا للعيش
انا طبعا صحيت مفزوع ... بيعملوا الحكاية دى ساعات
بس اول مرة يتخانقوا
....
جايبه 10 ارغفة عيش ب 3جنيه و نص .... مش حرام عليكى
الرغيف ب 35 قرش يرضى مين ده ؟
لأ مش حرام ... اولا الفرن زحمة و بنتك فى شغلها و ابنك رجع من الشغل و نايم
فمحدش حيروح الفرن
ثانيا انا عارفة ان عيش الفرن بشلن بس ما يتكلش
انت نفسك اخر مرة جبناه رمينا نصه و الى فضل لتانى يوم مبقاش يتاكل
اما ده فبيقعد و ممكن تانى يوم يتسخن
ثالثا الحاجة غليت الرغيف ده كان ب15 قرش بقى بريال و بعدين بقى بربع جنيه
و دلوقتى بقى ب 35 قرش .... اعمل ايه ؟
كل حاجة بتغلى .... الحكومة بتغلى كل حاجة
السمنة و الزيت و السكر و الخضار و العيش و البنزين كمان
مش عاجبك قول للحكومة
بتقولى ايه ؟ حكومة ايه الى اروح اقولها ؟
و بعدين ايش فاهمك انتى فى البنزين الى بيغلى ؟
متتحججيش بالحكومة ... و الكلام ده
بعد كده متجبيش العيش ده تانى .... تجيبى من الفرن ... ده خراب بيوت
طيب ما تقول للحكومة انه خراب بيوت .... مش محامى انت برضه ؟
انا مقولش حاجة لحد .... تجيبى عيش من الفرن من ابو شلن
و مين ان شاء الله الى حيقف فى زحمة الطابور يجيبوه و كلكم فى الشغل ؟
اقولك .... صحى الحمار الى نايم جوا ده .... ينزل يقف فى الطابور و يجيب العيش
............
قولولى انا اعمل ايه مع الحكومة الى جابتلى الشتيمة و التهزيء دى
حاجة تحرق الدم فعلا و مستفزة
يغلوا هم الحاجة و اطلع انا حمار فى الاخر
5 comments:
و ياترى هتنزل تجيب العيش ولا ايه
انا على فكرة بحب عيش الحكومة بس مابكلوش الا لما الست الوالدة تكون موجوده علشان هي اللي بتجيبه
و بيكون حلو و يمكن احلى من العيش التاني اللي مش بتاع الحكومة
بس نعمل ايه ندفع اكتر و نريح دماغنا و لا نبهدل نفسنا في طوابير
المفروض العيش يوصلوه بمواسير زي الغاز للبيوت
تفتح الماسورة تجيبلك عيش
سلام
ربنا يخليهالكم ويحفظها يعني ست فوق الخمسين هي اللي تتمرمط في الفرن ما عندها حق
اياكش تولع ب35 قرش ومالو المضطر يركب الصعب وقول لبابا يستهدي بالله
ويتقي ربنا ويحمده انه رباكم في الرخص وعدي بيكم
وانه معندوش حد في مدرسه مضطر يجيب له عيش فينو قد الصباع ب25 قرش من الفرن الفينو دا انا بنتي بتعند عليه كمان وتطلب عيش الريتش بيك لو تعرفه
لو باباك شافه وعرف اني بجيبه لبنتين في الابتدائي
كان طلقني انا
بدل المان بتاعي
هههههههههههههه
هههههههههههههههههه
تحياتي وسلم علي ماما وكفايه عليها الطبيخ
ههههههههههههه
ضحكتني وانا لسه راجعة البيت ميتة ومطحونة
اقولك؟
أصل الفرن ف نفس الشارع بتاعنا بنزل م البيت قبل الشغل وبما اني مربطة مع صاحب الفرن ومحسوبة من جيران الفرن فأي وقت بنزل باخد العيش
بس كله كوم ولما مبلحقش اعمل كدا ابويا مش بيلاقي حد يتخانق معاه غير حفيده لما عقد الولد في اي حاجة فيها طوابير
ولسه سيادتك لما يتشال الدعم لمحلوقي الدخل امثالنا هيدونا كوبونات زي بتاعة الشمعدان وهتبقي ولا الفوازير
:)
باللي بيحصل دا
كلنا بقينا حمير
ولا يهمك
تحياتي
م شعلان
لازم اجيب العيش
لازم
لأنه ساعات فعلا بيبقى احلى من العيش التانى
بنت القمر
انا مكمنتش اعرف انك ام
انتى عجوزة على كده يا بنت القمر
الريتش بيك ده بجيبه لما بابا بيكون مسافر
مش ناقصين مذابح
ربنا يخليهوملك و يكبروا فى عزك و تجيبلهم باجيت
زنزانة
وحشتينى
انتى فين
من زمان مشرفتنيش
اليان
كلنا يا بيه كلنا
Post a Comment