Saturday, March 01, 2008

ارضا للشقاق


معاً امام الله

مصالحة و مصارحة

صداقة

للأسف , قصة الصداقة الى كانت بين محمود و مينا انتهت نهاية مأساوية و كان السبب فيها – طبعا – محمود , لأنه اصر على رأيه و رفض انه يحب الاخر و يقبله فى حياته . و ده كان يوم ما حصلت مشكلة و انتهت على خير . وقف مينا المتواضع امام محمود المتعالى

و سئله : انت بتحبنى يا محمود ؟

اجابه محمود بثقة : لأ طبعا , انا مليش فى الرجالة

................

اغنية

حدوتة مصرية

محمد منير

مين هو صاحب المسأله

والمشكله

والحكايه والقلم؟؟

رايت كل شئ

وتعبت على الحقيقه

قابلت فى الطريق

عيون كتير بريئه

اعرف بشر عرفونى لأ

لأ ماعرفونيش

قبلونى وقبلتهم

بمد ايدى لك

طب ليه ما تقبلنيش

لا يهمنى اسمك

لا يهمنى عنوانك

لا يهمنى لونك

ولا بلادك مكانك

يهمنى الانســـــــــان

ولو مالوش عنـــــــوان

ياناس ياناس يا مكبوتة

هى دى الحدوته

حــدوته مصريــــــــــــه

........................

معاملة

المسيحى المتواضع الذى تملأ المحبة قلبه , يحب اعدائه حتى لو كانوا مسلمين و من منهم يرفض محبتك ايها الابن البار للنور الالهى فليكن عندك كالوثنى و العشار

طيب نتصرف ازاى مع اخوتنا المسلمين ؟

كالوثنى و العشار حضرتك

.............

ارضا للشقاق

وحدة الايمان هذه بمن نؤمن به تسمح بلقاء فى الايمان , لقاء بيننا بوصفنا مؤمنين , و يسمح لنا فى الواقع ان نكون " معاً أمام الله " . الاعتراف من طرف الجانبين بانه يمكن لنا ان نكون سويا " معاً أمام الله " يتضمن ايضا اننا نعطى الاولوية فى هذا اللقاء لله , و بأن نعترف بصورة او اخرى بأن الله هو الذى وضعنا معاً ,و جعلنا نلتقى . و هذا يساعدنا على ان نحيا اختلافتنا فى احترام عميق معترفين بان كل منا يؤمن بما يؤمن به بأخلاص لصوت ضمائرنا و بأخلاص لله .و يتسنى ذلك بقدر ما يكون ايماننا عملا شخصيا و اقتناعا يحدث بصورة شخصية و ليس فقط مجرد ارث اجتماعى . و يمكننى ان اقول اننا المسلمين و المسيحيين جميعا متفقين على اننا نعيش علاقتنا مع الله من خلال الضمير . و بهذا المنى يمكن ان نكون معا , فى اللحظة التى نفترق فيها . يمكن لنا ان نقول هذا تحديدا , لأننا نؤمن بنفس الاله معترفين بالسر الذى هو طريق كل فرد الى الله . مثل هذا اللقاء فى الايمان بالله يمكنه ان يعطى بعدا خاصا للطريقة التى نحيا بها سويا فى حياتنا اليومية العادية , حتى و ان لم يعبر عن ذلك بكلام كثير . هذا البعد يمكن ان يؤثر على كل مناخ اللقاء و الحياة المشتركة . امكانية اللقاء فى الايمان بالله لا تتعارض مع الاختلاف , و لكن تساعد على ان نحياه بطريقة اجابية .

كما لا يجب ان ننسى انه عندما يصبح خطاب عن الله " ارضا للشقاق " فاننا نخاطر بشكل كبير بأن لا نتحدث على الاطلاق عن الله الحى الذى هو بالنسبة لنا جميعا , قبل كل شىء , اله السر الذى يفوق كل وصف .

من كتاب ... مسيحيون و مسلمون اخوة امام الله

للراهب كريستيان فان نسبن ... ترجمة : انور مغيث

المشروع القومى للترجمة --- المجلس الاعلى للثقافة

............

مبادرة

معاً أمام الله

مصارحة و مصالحة

مبادرة هى من مجموعة من المدونين , مسلمين و مسيحيين , هدفها بسيط و واضح , مصارحة مع الاخر بكل حاجة , اتكلموا فى كل حاجة و عرفوا بعض اكتر و اتصالحوا مع نفسيهم و مع الاخرين

ازاى تقبل واحد مختلف معاك فى الدين , ممكن ؟

قبول الاخر و التسامح و الحرية الشخصية هى اهداف المبادرة

لو عايز تشارك معانا , يا ريت

لو مسلم .... دوس هنا

لو مسيحى .... دوس هنا

لو انت لا مسيحى و لا مسلم , ممكن تبعتلنا رأيك ازاى تشارك معانا على الميل ده

mandmegypt@gmail.com

...............

اعضاء المبادرة المؤسسين

شريف عبد العزيز العداله للجميع

رامي كرم لنتعدي الطبيعي

توتا توتا

ماريان ناجي القهوة العاليه

نيهال عمران زيتونة شرقية

رامز شرقاوي عباس العبد

محمد الشموتي حارس الهاويه

سامية اليماني
رامي سيدهم اخناتون

جهاد عبد العزيز
مينا جرجس افريكانو

عبد المجيد الشهابي

هانى جورج كراكيب

..........

ولا تنسى

كما لا يجب ان ننسى انه عندما يصبح خطاب عن الله " ارضا للشقاق " فاننا نخاطر بشكل كبير بأن لا نتحدث على الاطلاق عن الله الحى الذى هو بالنسبة لنا جميعا , قبل كل شىء , اله السر الذى يفوق كل وصف .

..............

تحديث

متعاونون :

بنت القمر

اخر الحارة

مصر اسلامية

مجهول

............

صحيفة البديل

اضغط على الصورة لقراءة الخبر

.............


59 comments:

أحمد منتصر said...

مممممممممممم والله أنا رأيي إن صعب تحصل صداقة ما بين الملتزمين دينيا

لكن بتنفع أوي مع غير الملتزمين :)

تحياتي

The Innocent said...

إن كوني خارج دائرة هذه الأديان لا يمنعني من مباركة هذه المبادرة. ولما لا؟ فإن استطاع اصحاب الأديان أن يقتربوا أكثر وأكثر مكونيين أراضٍ مشتركة للوقوف عليها، فلابد وأن يكون هذا قائما على فكرة أحترام الأخر والأعتراف بوجوده وقبول اختلافه. إنها خطوة تقترب إلى القواسم الإنسانية المشتركة أكثر فأكثر، لما لا أباركها وأنا أنشد الإنسان والإنسان فقط؟

تحياتي

HafSSa said...

الله!!!؟
ليه يا عباس العنوان مش منصف للموضوع؟
ليه ارض الشقاق؟
انت جاي تهدي النفوس و لا ايه؟؟
:)
المهم
شوف يا سيدي المبادرة حلوة و يا ريت تجيب نتيجتها المامولة
عن مصالحتي فمش محتاجينها لانه اعتقد مكنش فيه شقاق بيني و بينكوا، صح؟
اما المصارحة فمعنديش حاجة اقولها غير اني بحس ببعد من ناحية المسيحيين، ليه مش عارفة؟؟ و الى ان اعرف يبقى مش حقدر اشرح
و اعتقد ان اي مسلم فاهم حقيقة الاسلام حيعرف انه مش من صميم اختصاصته يصنف البشر حسب مذاهبهم او انه يقيم لهم الميزان
لان ده شئ من الغرور القاتل عسى ان الله يريحنا بيه من اراذل البشر
عارف انا كان نفسي تعملوا ايه؟
تعملوا المصارحة و المصالحة دي بين المسلمين الاول و بين بعضهم و بعدين نرتقي بيها لمستوى المسلمين و المسيحيين
زي ما انت شايف جوا المسلمين نفسهم فيه مصايب
و سودا و اعتقد ان فريق معين منهم هو سبب المشكلة بيننا و بينكم
لذلك و بناءا عليه
يا سيد احمد منتصر لما يكون مستوى اعتقادك انك شايف انه اذا المراءة حائض فهي في مستوى الكلب و الحمار
فانت لا يمكن تلاقي اي شئ يكون في مستواك او يتناسب انه يكون صديقك او حتى عدوك فما نحن الا شوية كلاب و حمير يا ولدي
تحياتي يا عبس

محمود المصرى said...

بسم الله الرحمن الرحيم

بصراحة يا باشمهندس موضوع المبادرة دا ممكن نقول فيه كلام كتير بس الاول ياريت تقولى اشغل الرابط بتاع الاستبيان دا ازاى لأنه مش راضى يشتغل معايا خالص .
نيجى بقى لجوهر المبادرة
انا اعتقد ان المبادرة لو هدفها انكم توجدوا سلام اجتماعى بين المسيحيين والعالمانيين المسلمين او المسلمين الذين لا يقيموا اى وزن لتعاليم الاسلام فدا سهل جدا لأنهم شايفين ان المسيحيين اقرب لهم من المسلمين , يعنى مثلا احد الذين تفضلوا بالتعليق بتهاجم الاخ احمد منتصر بالغمز غير الامين فى حديث شريف على طريقة الطاعنين فى الاسلام , فهذا النوع سهل اوى تقيموا معهم تفاهم , وان كان دا هدف المبادرة فاعتقد اننا كمسلمين غير مدعويين لها .
لكن لو كان الهدف هو الوصول لعقد اجتماعى ينظم العلاقة الانسانية بين المسلمين ككل والمسيحيين ككل فلابد ان يتوجه الخطاب والاهتمام بالنقاش والاستماع لنا نحن الظلاميين والرجعيين والمتشددين والارهابيين وسيبوكوا من المتفتحين والتقدميين , دى نصيحة واحد حريص على نجاح المبادرة يعنى مش اكتر .
لكن انا هاشارك ببعض المظاهر اللى ممكن تعوق تقاربى مع المسيحيين ( وطبعا لا اقصد المسيحيين اللى بتعايش معاهم فى العمل والدراسة وجيرانى واللى علاقتى بهم جيدة للغاية ) لكن اقصد المسيحيين الساعين لأعادة تشكيل الوضع العام فى مصر بصورة تتجاهل التركيب الديمغرافى .
مظهر بسيط فى مظاهرات المسسيحيين بعد اسلام وفاء قسطنطين هتفوا داخل الكاتدرائية ( يا امريكا فينك فينك امن الدولة بينا وبينك ) والكنيسة واقباط المهجر شنوا حملة تحريضية لأجبار الحكومة على تسليم وفاء قسطنطين للكنيسة .
مظهر اخر هو عدم تجاوب المسيحيين المصريين مع قضايا المسلمين كفلسطين مثلا , انت واحد من الناس رغم انى بحترمك وبعتبرك من المتفهمين المتفتحين واللى ممكن نقيم معهم حوار على اى مستوى فكرى وموضوعى بتقول ان القضية الفلسطينية ماتدخلش ذمتك بمليم , طيب ازاى هايكون فى تواصل انسانى وانت لا تهتم بقضايانا الجوهرية ؟
مستوى ثالث وهو الاهم فى رأيى ما تصوركم كمسيحيين للمقدار الذى يجب ان نطبقه من ديننا والمقدار الذى يجب ان ننحيه ونرميه خلف ظهورنا ؟ يعنى احنا عندنا حاكمية الشريعة ووجوب تطبيق الشرع هل انتم هاتقبلوا بهذا ولا شايفين اننا لازم كمسلمين نكفر بحاكمية الشريعة وننكر عقيدة الولاء والبراء ؟
طبعا هناك الكثير من الامور التى تحتاج لنقاش مفتوح وصريح وبدون تعصب او تشنج لكن فى النهاية انا عند موقفى كمسلم من الالتزام بقول الله تعالى ( لا ينهاكم الله عن الذين لم يقاتلوكم فى الدين ولم يخرجوكم من دياركم ان تبروهم وتقسطوا اليهم ان الله يحب المقسطين )

بنت القمر said...

انا جاوبت علي الاسئله وبعدين ليه المسلمين 73 سؤال
والمسيحيين 53
!! ده تعصب يا عم
انا صباعي وجعني ييس ونو وليه
وفيه اسئله مضحكه اوي واخري قويه جدا
ها نعرف النتيجه امتي ولا ايه نتيجه الاستبيان ده ولا مجرد استبيان وخلاص

وبعدين انت بتروح حتت غريبه اوي اليومين دول وربنا يستر عليك شكلك ها تدبح قريب وتتعبي في شوال
مرة الصارم ومرة مصر اسلاميه
بقيت ماشيه اكلم روحي انهارده لما لقيت تعليقك هناك
واقول في سري الله يخربيتك يا رامز الله يخربيتك انت بتروح ازاي هناك وبكل شجاعه
تحياتي\

عباس العبد said...

السيد احمد منتصر
انت كلامك انا اسف فى الى حقوله
انا مبدورش غير على صداقة الملتزمين دينيا
لأن دى مبادرة دينية فى المقام الاول
تفتكر لما يكون لى صداقة مع شخص لا دينى و اكلمه عن ازمة فتنة طائفية حيفهم ازاى ؟
اذا لم يكن من اسعى الى مد جسور الصداقة معهم هم الملتزمين دينيا من الجانبين يبقى انا مبعملش حاجة
و بعدين عندك روابط لواحد زى شريف ابن عبد العزيز ممكن تقراله و انت تعرف اذا كان ملتزم دينيا و لا لأ و ده المهم
============
البرىء
و احنا كمان ننشد الانسان , اكيد برضه
ايدك فى ايدنا
=============
حفصة
يا ست حفصة انتى علطول عاملة مشاكل كده , مفيش مرة متعمليش مشاكل , اشق هدومى
كويس ان المبادرة عجبتك
دى حاجة كويسة
و ربنا يوفقنا و يوفقك
===========

محمود المصرى said...

بسم الله الرحمن الرحيم

طيب ليه كده يا استاذة بنت القمر ؟ ما تخلينا نشوف شغلنا , وبعدين الراجل ماشتكاش ولا حاجة , مش كده يا باشمهندس؟
مازلت انتظر ان يتفضل احد بمساعدتى فى الاشتراك فى هذا الاستبيان لأنى كل ما اضغط next او اى حاجة تطلع لى الرسالة دى
ERROR
We are sorry but your session has expired.
Either you have been inactive for too long or there were problems with your connection.
Please contact Your Name ( your@email.org ) for further assistance
رغم ان سرعة النت عندى كويسة جدا على غير العادة .
اخيرا يا باشمهندس انت تشرف فى اى وقت وماتقلقش خالص وماتصدقش كلام الاستاذة بنت القمر لسة شوية على موضوع الدبح دا .

عباس العبد said...

محمود المصرى
بنت القمر بتدعى على علشان جيت علقت عندك , انا مش حتكلم يا عم , انا فى بيتك و بيت المصرى بيت كرم و بنت القمر بتتردنى من بيتك , تجيبلى حقى اولا
ثانيا
معلش اللينك تقيل شوية اول يوم و كله بيخش عليه
فدوس عليه كتير لغاية ما يلقط معاك
بعتذرلك تانى عن موضوع اللينك ده
لو مشتغلش معاك برضه يبقى ايمانك ضعيف و ربنا مش مبارك لك فى اللينك
هههههههه
........
" ان يتوجه الخطاب والاهتمام بالنقاش والاستماع لنا نحن الظلاميين والرجعيين والمتشددين والارهابيين وسيبوكوا من المتفتحين والتقدميين "
ههههههه
انت فاكر ان انتم بس الى عندكم ظلاميين فى طوايف فى مصر بتحرم التلفزيون و الراديو و الاكل بره البيت و تعليم البنات , و مسيحيين و مش بهرج و لا بجاملك
ده حقيقى و انا اعرف عائلة كده شخصيا
فكرة التنوير و الظلامى خدعة
مش فاكر لما اتكلمنا على نصر حامد ابو زيد
.......
ثالثا لازم انحنى لحضرتك
لأن حضرتك اكبر دليل على نجاح المبادرة
لأن حضرتك قبلت الحوار و بتتناقش معايا و دى خطوة ظلامية كبيرة جدا ( واحد بيغمز )
بالنسبة لموضوع التركيب الديموغرافى فممكن نتكلم فيه من اساسه
يعنى نرجع للفتح العربى و التواجد العربى فى مصر و مين كان اكتر وقتها و لا حضرتك بتتكلم عن التركيب الديموغرافى الحالى ؟
الحوار ده ملوش حل
لكن انا معاك فى ان التركيب الديموغرافى فى مصر حاليا مفهوش مشكلة لأنك لو قسمت الموضوع دينيا يعنى عدد المسلمين قصاد عدد المسيحيين يبقى انت الى قلبت الحديث طائفى مش انا
راجع كلامى فى التاج الى كانت بعتاهولى بنت القمر و انت حتعرف رأى فى حاجات كتير
..........
بالنسبة لموضوع وفاء قسطنطين
الكنيسة ادانت تصرف اقباط المهجر و المظاهرات الى تمت فى الكاتدرائية و البابا اعتصم فى المقر لغاية ما الناس خرجت من ساحة الكاتدرائية
بالنسبة لموضوع وفاء انا كان رأى ساعتها و اتنشر فى احدى المنتديات انها حرة و وفاء زى ما انت عارف زوجة كاهن و قلت حتى لو الكاهن اسلم هو برضه حر
لأن احنا لا نؤمن بوفاء و لا بزوجها الكاهن
لكن الموضوع الى كان المفروض يلفت نظرك هى الغيرة على الدين !
انت تزعل ان يكون المسيحيين غيورين على دينهم لدرجة الغضب ؟
لما اتنشرت الصور بتاع الاساءة للرسول
واحد قتل حفيد فان جوخ فى الدانمرك و حرقوا سفارات فى لبنان و اندونيسيا و سوريا و لما المدونة شهروزة كتبت على الموضوع ده , انا ايدت الغيرة على الدين و قلتلها دول ولاد كلب خدوه حقكم منهم و لكن ادنت الحرق و القتل و ايدت المقاطعة
فمش عيب ان المسيحى يبقى غيور على دينه زى ما المسلم غيور على دينه
و زى ما ادنت القتل و الحرق فى موضع الاساءة للرسول
ادنت برضه المظاهرات و الاعتصام و الهتاف فى الكاتدرائية
الغيرة على الدين مش عيب و هى من حق المسيحى و المسلم , لكن الغضب لدرجة الايذاء فهو ده الى فى كلام
.............
بالنسبة لموضوع فلسطين
انا لسه عند رأى القضية الفلسطينية متخشش ذمتى ببصلة
لكن انا متضامن مع الشعب الفلسطينى و ايدت دخولهم من المعبر لو حضرتك متابع التدوينات و كنت اتكلمت فى الموضوع ده مع الاستاذ راجى فى تدوينة عند بنت القمر , استحالة اتضامن مع اسرائيلى انت ناسى انى مصرى ولا ايه ؟ , و لكن برضه انى اتضامن مع فتح او حماس , سامحنى مش حعملها
و لو المثل بيقول جحا اولى بلحم توره
فأحنا اولى بفلسطين بأسبقية التواجد و الحجز
احنا هناك قبليكم يا معلم
ههههههههههه
...........
فى نقطة على الهامش زعلتنى بس حفوتها
فلسطين مش قضيتكم الجوهرية
فلسطين قضيتنا كلنا الجوهرية دى عمق استراتيجى يا استاذ تهمنا
اسحبها
...........
فى نقطة جوهرية و انا مقتنع بكلامك مية فى المية و بؤيده بشده
الحوار مش معناه تنازل
الحوار معناه اننا نبحث عن ارضية مشتركة لأنه زى ما انت اكيد مش حتتنازل عن ايمانك
انا كمان مش حتنازل عن ايمانى و ده من حقى و من حقك
انا مبحبش المساومة و المساوفة , انت تتنازل شوية و انا اتنازل شوية و العملية تمشى
انا برفض الموضوع ده لأنى مش حتنازل عن ذرة من ايمانى و مقبلش انى اتعامل مع واحد متساهل فى دينه لأن الى يتساهل فى دينه يتساهل فى اى حاجة و مينفعش يبقى محاور يبقى بياع
لكن بدل الصدام فى التفاهم
و هو ده الاهم
تقبلنى و انا من اهل الذمة او تقبلنى و انا مواطن او تقبلنى كشريك , كأى مصطلح دينى يريحك , لكن المهم انك تقبلنى
لكن لو الاسلام مش قادر يقبل الاخر و يحتويه فدى مشكلة الاسلام مش مشكلة المسيحيين
و لو المسيحية مش قادرة تقبل الاخر و تحتويه فدى مشكلة المسيحية مش المسلمين
لازم ندور على ارضية مشتركة , مش كده و لا ايه ؟
رغيت كتير
انا بعتذرلك
لو مشتغلش اللينك معاك لحد دلوقتى يبقى ايمانك ضعيف اوى بقى
حشوفلك اللينك و ححاول اتصرف

عباس العبد said...

بنت القمر
انا وحش اروح فى اى حتة و لا يهمنى
" اذا كان الرب معنا فمن علينا "من عندنا الاية دى
ولا يهمنى من اى حد
الى ودانى عند الاستاذ محمود
انه علق عندى و علشان اعرف ارد من غير ما احرج نفسى كان لازم اعرفه, فرحت عنده قريت خمس ست تدوينات علشان افهم توجهاته , و لما لقيت بوست ينفع اعلق عنده و خصوصا انه بوست ذى فكر مشترك عن فلسفة النص المقدس
علقت بالمطلق على النص المقدس بدون دخول فى اسلام او مسيحية
و بعدين فى نقطة مهمة
البشر
انا كسبت انسان و صداقته
يعنى يوم ما واحد يحدفنى بالطوب , محمود المصرى عرفنى فاكيد حيقف جنبى
و انا سعيد بمعرفته
و ارجو انه يكون هو كده كمان
و لا انتى شايفه انه خاين و ممكن يبعنى ؟
........
رخامة منى بقى عليكى
بدل ما المبادرة كويسة و عجبتك
فياريت تشاركينا ببوست و تكتبى عنها
===========
محمود المصرى
لو المبادرة عجبتك
يا ريت برضه تكتب عنها
رخامة منى برضه عليك
و تحط اللينكات عندك
انا جربتها و شغالة
الظاهر ان ايمانك ضعيف فعلا
هههههههههه

محمود المصرى said...

بسم الله الرحمن الرحيم

انت بصراحة اثرت نقاط حوار كثيرة فى ردك واعتقد ان هو دا هدف المبادرة .
انا ان شاء الله هاكتب عن المبادرة عندى وهاحط اللينكات كمان بس اول ما تشتغل عندى علشان اعرف ايه اللى فيها انت ماترضاليش احط لينكات ماعرفش محتواها .
ياريت تضيفنى عندك على الايميل علشان نتكلم لو تحب

mosslem_b@hotmail.com

mohandsmasry said...

تعبتنا يا عم رامز ايدى وجعتنى كل دى اسئلة نفسى اتقطع هههههه

Alexandrian far away said...

يا سلااااااااااااام
أنا فهمت دلوقتي
يا أخي أنا قريت التدوينه وقعدت أقلب الموضوع في دماغي أحاول أفهم ما وراءه وما خلفه، وبعدين لقيت جملتك الكاشفه الرائعه دي

انا مبدورش غير على صداقة الملتزمين دينيا
لأن دى مبادرة دينية فى المقام الاول

ففهمت مباشرة
دي حاجه كده زي وقف العمليات العدوانيه ما بين المتدينين المسلمين والمتدينينالمسيحيين ليتفرغوامثلا للهجوم على اللامتدينين من الجهتين ويقضوا عليهم برواق كده وبعدين يرجعوا يكملوا العراك ما بينهم
شىء حميل فعلا
الدعوة لإعلان الأتحاد المصري للقوى الدينيه الظلاميه
عاكف وشنوده يتعانقان
-ألا هو أسقف مصر الكاثوليكي أسمه ايه؟-
منتدى الأقباط متحدون يتأخي مع منتدى التوحيد، البدري وزكريا بطرس يقبلان رأسي بعضيهما البعض علنا أمام شاشات التلفزيون ويتعاهدان على توحيد الجهود ووقف الهجمات المتبادله

الشعار الجديد: الدين لله والمشانق للعلمانيين

المشكلة يا عزيزي بينكم كمتدينين تشجعون نادين مختلفين ليست في الكراهية بل في الحب
فكلا منكما يحب الله كثيرا جدا وبعمق شديد
والمحب غيور أناني بطبعه ولا يطيق أن يشاركه أحد في عشق محبوبه فهو يسعى لإزالة أي منافس له في عشقه
وكما قالت أم كلثوم : وأغير من ألي يحبك أكتر مني

لكني اذكر جملة من رواية ثرثرة فوق النيل حين ارتعب أحد الشخصيات وهرب من العوامه وهو يردد ما جمعهم الله غلا لحكمة
وقد كانت
فاكر الروايه؟

تحياتي

عباس العبد said...

مهندس مصرى
ولا يهمك
معلش المهم انها تكون مفيدة
==========
اسكندرانى
يا اخى انت متسترش فى اى حتة ابدا
لازم تطلع كده
المهم
المبادرة دى للكل للعلمانيين و المتدينين و اللادينيين و الملاحدة ( لو فى منهم فى مصر ) الهدف الانسان
و بعدين انا كنت برد على السيد احمد منتصر و اتكلمت على نقطة الفتنة الطائفية الى يقدرها و يفهمها كويس المتدينين
و هم الى يسعوا لوقفها لأن العلمانى متضامن مع اى نشاط انسانى غرضه نبيل و يوحد ما بين البشر و يساوى بينهم و يدى كل فرد حقه و يطالبه بواجبات و يساوى ما بين جميع البشر
و ده ينطبق على اى مرجعية فكرية
لكن برضه فى علمانيين و لادينيين و ملحدين متعصبين ضد الاخر و مش بيقبلوه و بيرفضوا افكاره و هم اكثر تطرفا من المتطرفين الدينيين و احنا مستبعدناش الناس دى و حطينا ميل علشان لو عايزين يشاركوا معانا
............
هدف المبارة وحدة الصف الانسانى و بدأها المتدينون
و لا انت ضد الحرية والمساواة و الحقوق الواجبة بين جميع البشر الى بتنادى بيه المبادرة ؟
طبعا لأ
و بما انك انسان مؤمن و ملتزم
(مؤمن بالحرية و ملتزم بالمساواة بين البشر )
فياريت تكتب عن المبادرة و تنشر اللينكات و اهو يبقى واجب و كله بثوابه و لا انت ملكش فى الثواب
و لا ايه
.........
بطريرك الاقباط الكاثوليك اسمه انطونيوس نجيب و ده راجل طيب و فى حاله و ملكش دعوة بيه

hafssa said...

لا لا لا
استنى عندك يا عباس انت و اسكندراني
هو ليه منعرفش كلمة علماني كا يجب؟؟
هل العلماني لازم يكون مش مؤمن بربنا؟؟
او مش مؤمن بالرسول الخاص بديانته؟؟
ليه ميكونش علماني التفكير لكنه مؤمن بوجود اله و رسول كمان و بيحبهم لكنه قرر يشغل عقله؟؟
اعتقد فيه فرق كبير و خطير بين الملحد و بين العلماني
طبعا غلطوني زي ما انتوا عاوزين بس
ليه منحددش الاول المفاهيم اللي احنا بنتكلم بيها كتير و نوعا ما بدينا نلبسها لبعض؟؟
انا شايفة انه ممكن اوي يكون فيه علماني مسلم و علماني مسيحي و الخ الخ الخ
العلمانية طريقة تفكير و ليست تكفير

شكرا
و عباس
انا بقى كده، اي مرة احب اخش عندك و اتحانق ،حتخانق
عشان انا قررت مسكتش لما اشوف كلام غريب مقدرش اقول غير كلمة غبية عنه
لكن خيال حبيبي
الى اخر الاغنية بقى و انت عارف

تحياتي

عباس العبد said...

حفصة
انت يا جميل تتخانق زى ما انت عايز
يا رافعة معنوياتشى
......
لأ لأ لأ , حاسبى انتى
انتى فهمتى كلامى غلط و مركزتيش معايا
انا مقلتش ان العلمانى غير مؤمن او غير متدين او ملحد
انا رتبت الكلمات لو اخدتى بالك
" المبادرة دى للكل للعلمانيين و المتدينين و اللادينيين و الملاحدة "
و قلت كمان
"لكن برضه فى علمانيين و لادينيين و ملحدين متعصبين ضد الاخر"
و قلت كمان
" لكن برضه فى علمانيين و لادينيين و ملحدين متعصبين ضد الاخر "
و قلت
" هدف المبارة وحدة الصف الانسانى و بدأها المتدينون "
انا مقدرش اتهم اى علمانى بأى تصرف غير اخلاقى او لا دينى او حتى تكفيرى
لأن العلمانى فى المفهوم المسيحى معناه " من هو ليس بكاهن او راهب "
و بما انى انا لا كاهن و لا راهب فاكيد انا علمانى
فمقدرش اتهم العلمانيين بحاجة مش فيهم
اسئلى بقى اسكندرانى مش انا
انا عارف كويس علمانى يعنى ايه , لأنى منهم

بنت القمر said...

عباس العبد
يا عم روح زي ما انت عاوز
انا برضه رحت هناك اشوف التوجه والنظام ايه فتحت التعليقات اشوف مين هناك لقيتك وانت عارف ان الكلام ده قلته قبل كده
بس الكلام هزار والله غالبا انا مش بتواجد الا في مكان احبه وفي ارضيه حوار واحترام وتواصل ممكنه
وخطوط مشتركه
يمكن انت عندك استراتيجيه مختلفه
بس براحتك يا عم البوست فعلا حضرته في راسي وشويه وها انزله مش مستنيه اذن يا عم مش انتوا صحابي؟؟
كان لازم تقوليلي في الاول وبعدين انت عارف المسيحيين دول حبايبي منقوعه في وسطيهم وحفظاهم نفر نفر زي ضهر ايدي كاتوليك وارثوذكس
شويه وانزل البوست
تحياتي يا وحش
ملحوظه جانبيه:تصدق والله لو محمد ومينا اتفقوا علي االملحدين واللادينين تبقي حاجه قشطه اوي
واديك اثبت انك جمعت في مدونتك الشامي والمغربي
يعني ينفع
ينفع نصالح
والله ينفع..
مهما كان الاختلاف اهو في ارضيه مشتركه هو الخوف من الله
نشترك في المثل والاخلاق والتوجهات الروحانيه المستمده من الاديان
اهو ارحم من اللي ملهمش دين ولا مله سواء ملحدين او لادينين او ساينتلوجيين!!!!ا
ههههههههههههههه
تحياتي

بنت القمر said...

محمود المصري
استاذه استاذه يا عم خليها بنت القمر دوغري انا كده حسيت اني ابله عربي!!اما عباس فكلامي معاه هزار والله مش نقد لحضرتك لا سمح الله
اصل اي مدونه اخوانيه او وهابيه اوسلفيه او اي اسم يعجبك تلاقيه هناك قبل المسلمين ما تفهمش يا اخي بيلقطهم ازاي
لما جيت اتفرج عند حضرتك وانت طبعا ادري بخطك واقدر علي توصيفه مني
يعني استغربت حبه من انه بيلاقي الخطوط البعيده ازاي وبيعرفها منين
تحياتي

محمود المصرى said...

بسم الله الرحمن الرحيم

تصدق يا باشمهندس انا فعلا بدأت اصدق موضوع ضعف الايمان دا
يعنى انا الاول دخلت دايل اب علشان اجرب برضه مانفعش نزلت الفايرفوكس الجديد واشتغلت على الدى اس ال تانى وفضلت ماشى ماشى واسئلة تشيلنى واسئلة تحطنى فين وفين تلاتة وسبعين سؤال بقى فى الاخر وانا بعمل سبميت لقيت اللينك لخبط تانى بعد ما كان ماشى كويس اعمل باك مش راضى اعمل فوروارك برضه مش راضى حاجة تشل يعنى .
المهم انت ليه ما اضفتنيش على الايميل يا عم ؟ ينفع كده؟ ضيفنى بسرعة انا بحذرك .
بنت القمر دوغرى
انا عارف انك بتهزرى عادى يعنى متقبل الهزار بس العجيب مش فى انه بيلاقينا العجيب انه بيتواصل معانا عقبال ما تتواصلوا انتوا كمان معانا انا هاعمل مبادرة للتواصل بينا وبينكم على غرار مبادرة المصالحة دى .
بالنسبة للتوصيف فتقدرى تقولى على اسلامى بدون تحزب ولا لقب ولا شىء .
بالنسبة للعالمانية فأنكار حاكمية الشريعة دى مش منهج فكرى دى منهج كفرى واللى يقول غير كده ربنا يهديه .

Alexandrian far away said...

يا عم رامز
بصراحه أنا مش مستريح
وأشك في حسن نية الدعوه الكريمه دي
ليه بقى سعادتك
لأن مثلا من كلام الأستاذه حفصه فحتى تعريف العلماني مختلف ما بين المسلمين والمسيحيين
طيب افهم لو الطرفين قبلوا بعض على طرف المساواه مثلا وأعتبروا بعض متساويين من باب المساواه بين البشر - الذي أنا مؤمن بيها وبطل ضرب تحت الحزام يا رامز- يبقوا مش متدينين يا عزيزي، لن يعتبر المسملم المتدين أن المسيحي ماوي له ابدا وكذلك المسيحي المتدين في مواجهة المسلم، ولو فعلا يبقوا علمانيين خلاص، علمانيين بمعنى يفصلون الدين عن الدوله، وهو ما يرفضه المسلمين المتدينين تماما، ويمارس المسيحيين المتدينين المصريين عكسه تماما، طيب فين نقطة الألتقاء؟
لا أظن أنه توجد نقطة إلتقاء داخل إطار الدين
بصراحه الديانتين متصارعتين وعدوانيتين جدا فكريا - كل منهما لا تقبل اي تلوث بشوائب أعتقاد مخالف، كما أنهما مختلفتين بشكل مطلق، حتى تصور المسلمين عن المسيحيه غير صحيح فالمسلمين يتكلمون عن النصارى وهم يقصدون النساطره الذين أنتشروا بالجزيرة العربية والإمبراطورية الساسانية وقت البعثة المحمديه، والنساطره يعدون مهرطقين على ما أعتقد من وجهة النظر الكاثوليكيه أو الأرثوذكسيه

ثم كيف سيتم قبول من لا يعتنقون ايا من الديانتين أو من لا يعتنقون ديانة اصلا أو الملحدين على ارضيه دينيه؟
لو قبلهم الدينيون كمتساوين فهم لن يعودوا دينيين
الحقيقه وبصراحه وبجديه الهدف طوباوي ومستحيل
وبصراحه اكبر أنا مش مستريح نهائيا خصوصا بعد الستبيان والحكايه دي
الموضوع ده....
ولا بلاش أنا باسجل موقف بس
وربنا يوفقكم لما فيه خير الدين في هذا العالم.

ملحوظه: ابله ابتسام بتقولك أنك تنفع ونص ده أنت العربي بتاعك مستوى موجه مش مدرس، والسينتولوجي ديانة توم كروز وترافولتا على فكره

Alexandrian far away said...

ألا يا رامز يعني أيه وحدة الصف الأنساني؟
هو أحنا معرضين لغزو من البط مثلا؟
ولا السحالي الفضائيه بتهدد بأحتلال الأرض فلازم البشر يتحدوا صف واحد؟

برضه مش مستريح
سلام

HafSSa said...

طيب خلينا نقعد نصفي و نوزن في الكلام تاني
مؤكد المصالحة و المصارحة موجودة للمسلمين و المسيحيين
لكن مش لازم يكونوا المتدينيين او خلينا نقولها بالمفتشر المتزمتين
او المتلزمين اشد الالتزام
يعني انا مسلمة
لكن كلمة ملتزمة و متدينة دي مش عارفة الاقيهم درجة او لون عشان اصبغ نفسي بيهم
و اصلا اصول العقيدة عندي اعتقد انها تختلف عن الكثيرين و ببساطة انا ضد كل ما هو وهابي
اخواني
سلفي
و قليل من باقي المذاهب اذا تعنتت بشكل لا تفسير له


مؤمنة بالله و برسولي
مؤمنة برسل تانيين طبعا لكن مش نفس درجة حبي برسولي انا
لكن
اعتقد ان تفكيري علماني
يعني لازم يكون في تفسير منطقي و عملي لحاجات كتيرة مش زي ما هو حاصل دلوقتي
ان كل فتفوتة تحصل يبقى سببها معجزة اذهلت العلماء في معامل اريزونا و خروا ساجدين

يعني الفكرة
بالنسبة لي
هات لي دليل و انا اصدقك
لكن تاخدني بالسبهللة مينفعش
طبعا المبادرة دي مش حتنفع تكون موجهة لكل من هو غير مؤمن بوجود اله ايا كان شكله او تصور فكرته في مخ الاخرون

تاني بالنسبة لي المسيحيين مقصدش بيهم النساطرة بتاتا لسبب ظريف هو اني اول مرة اسمع اللفظ ده كوصف للمسيحيين
و انا لما بقول المسيحيين بعني بيهم الناس اللي بتعايش معاها حاليا مش قصص بسمعها عن ورقة ابن نوفل مثلا او المقوقس حاكم مصر
انا فعلا اعني رامز و هاني و ماريان و مينا المدونيين
و جاكلين صديقة رحلة البعثة
و فيبي زميلتي في الشغل
و هلم جرا

يعني خلونا نتكلم ادينا بنستفيد و بنوضح اماكن اتفاق و اختلاف و هو ده الهدف الرئيسي من المبادرة
معتقدش انها حتكون كل واحد يدخل يقول انا خلاص سامحتكوا
و زي ما قالت داليدا
ادينا بندردش ورانا ايه
نحب نتعرف
ورانا ايه
نحب نتشرف
الى اخر الاغنية

بس حكاية وحدة الصف الانساني في مواجهة المد البط-وزي المتسحلل دي مكنتش واخدة بالي منها
ههههههههههههههههههههههههههههههههه

بنت القمر said...

رامز
معلش كلمه علي السريع وراجعه تاني
بيسلموا عليك ويقولوك الساينتولوجي ديانه الكنيسه العلمي
في مواجهه الكنيسه التقليديه الام لتناسب العقليه العلميه الغربيه الماديه وطقوسها نابعه من اليهوديه والقبالانيه بتاعه الست مادونا اللي زارت اسرئيل واعلنت الخبر الميمون وتبعتها نيكول كدمان برضه لضرب الكنيسه التقليديه
وبيقولولك مادونا مجدش عارف لها مله دلوقت وان كانت قالت انها ها تربي بنتها علي المذهب الكاتوليكي تربيه محافظه ونيكول كيدمان عادت الي المسيحيه القديمه ونسيت والله اسم المذهب وبعد ما لهفت فلووس عم كروز واجوزت الواد الجديد جواز كنسي وتخلت عن الساينتولوجي
يعني اهو موضه جديده في الاديان زي الشارلستون في البنطلونات
جميعاالله يرحم امواتنا وبيسلموا عليك وبيقولوك بطل صكوك الثقافه اللي بتوزعها علي الناس احسن اخرتك وحشه
ده ابتدائي وده ثانوي ده مدرس وده موجهه مش كلمتين فذلكه تدلقهم تبقا مثقف منتش احسن من حد وانت ولا بلاش... احنا بنتصالح كبشر هنا لكن انت عدو الارض والسماء
لاثقه فيك ولا في نوايياك يموت الزمار صحيح وهو بيجيب سيره ابتسام..فلتذهب مسحوقا تحت اقدام جيوش البط المجد لله
تحياتي
علي فكرة نزلت البوست بتاعي
ا

وجهة نظري said...

أنا عاجباني جدا فكرة المبادرة، بس مش عارف لية حاسس ان كامة مبادرة دي عاملة زي كأننا بنقول الحوار بين الفلسطينيين والأسرائليين!! أنا عايز أقول المشكاة ان في ايد خفية بتلعب علشان تدمر البلد، هيا نفس الأيد الي بتلعب في السودان والصومال ودول أفريقيا ودول البلقان وغيرهم، كل الدول دي ماكانش عندهم أي مشاكل من عشر سنين، دلوقتي كل دولة طلع فيها أي مشكلة عرقية بتحاول تقسم البلد، وكل بلد مامسوكلها ذلة وشغالين ضغط عليها، نظام فيها لا أخفيها.... بلطجة دولية

أنا عايز أقول لو فهمنا ان في حد عايز يبوظ علينا بلدنا، زيادة ماهي بايظة (ودي قصة تانية)، انما مافيش حد في مصر عندو ذرة انتماء حيقبل بأي تطرف فكري ممكن يبوظ البلد، ولا اخوان متهببين ولا مسيحيون المهجر والهطالة دي، دول كلهم مأجورين لتنفيذ خطة معينة، فلو فهمنا السبب من التصاعد اللي بيحصل في مصر (اللي أنا مشفتوش شخصيا) يبقي ممكن نحل المشكلة بينا بسهولة

بالنسبة للأستقصاء أنا كنت شاكك من اهدافة لأني مكنتش عارف مين وراة بس جاوبت الأسئلة، انما في أخطاء كتير في الأستقصاء ممكن تزود حدة الصراع لو اتجاوب علية بطريقة مستهترة، فانتم مشكورين قمتم بمبادرة جميلة انما لازم ترتيب ودراسة أكتر من كدة

عايز أقول كمان ان احنا (المواطنين) اللي ممكن نغير كل حاجة مانستناش الحكومة لأن مفيش حكومة، واحنا اللي ممكن نعمل مستقبل بلدنا بايدينا من غير مظاهرات ولا حاجة، احنا ممكن نبوظ أي خطة لتدمير البلد، لو عايزين

بنت القمر said...

صفصف
ههههههههههههه
ههههههههههههههههههه
ههههههههههههههههه
ما تتعبيش نفسك يا صفصف هوكده أنتيخ واستاذ تريقه سيبك منه ده مفيش غيري قيمه وسيمه ووظيفه ميري
هههههههههههههههههه
تيجي نعمل حزب ابناء البط في مواججه الساينتلوجيين
يا لهوي يا نا خلصنا من الديماجوجيه دخلنا في الساينتولوجي
يا ساتر علي الخنقه مفيش كلمتين يوحدوا ربنا جنب بعض مفيش روح في الكلام
ده حتي الحروف تلاقيها مش طايقه بعضها
من كبر النفس الخنيق
ههههههههههههههههه
الي القتال يا ابناء كوكب البط في مواجهه كوكب ساينتولوجي ارجموهم ببذر البطيخ حتي الموت
عليهم غضب حورس وحور محب
السلام عليكم

بنت القمر said...

رامز من مصلحه الساينتولوجيين الايقاع بين المسلمين والمسيحيين عشان ياكلوا كل واحد علي حده انظر تعليق حفصه
من مصلحه من لامله له احراق جميع الملل وانظر المقوله التاريخيه الاديان تنين بتلاته رؤوس
اشهد يا تاريخ اشهد يا زمن
يوم تشهد عليهم ايديهم
من مصلحه الساينتولوجي احراق كوكب البط الابيض المسالم ليتسيّد ويحضر الهته الفينيقيه والاشوريه والاغريقيه
لانه برضه لازم يعبد حاجه بس ها يغير الاسامي
لازم يعبد صنم يعبد عقله يعبد الكومبيوتر يعبد مصلحته وشهوته لازم يعبد حاجه
ولا يقعد فاضي تحياتي
قمر فيتش

hafssa said...

لا لا شوية فرامل او مطبين
قمر هدي اللعب شوية
اولا تعليقك ده هزار و لا جد
اصلي متبرجلة حبتين يعني لهجتة جديدة عليا اني اسمعها منك
المهم
بس الاول توضيح
القبالاة اللي اتبعتها مادونا هي ما تساوي التصوف عند المسلمين والنرفانا عند الهندوس
يعني شئ من الروحانيات و ده لان اليهودية مادية جدا و متطرفة في هذة المادية لكن اهو طلعلها جزء متروحن
فلما مادونا تتبع المذهب ده مافيش مشكلة بالعكس هي بتتقرب بشكل روحاني و ده احسن لان في الاخر ارواحنا بتتلاقى و تتناغم مع بعضها بغض النظر عن الدين
يعني بكل صراحة انا عندي اتوالف مع حد فيه شئ من الروحنة ايا كانت ديانتة اقرب لي من اي مسلم يفقعني فتاوى ماركة قال الله و قال الرسول و هو مش بيعمل اي حاجة منها و مش مصفي النفسية من جوا
ده شئ
الشئ التاني
تعليقك اللي بتقولي فيه ان الساينتولوجي هدفهم فصل المسيحيين عن المسلمين و حدوث فرقة بينهم مش عارفة من فين لقيتي الكلام ده في تعليقي
بجد ساعات بتكتشفي حاجات في كلامي انا نفسي مبكونش عارفاه
ممكن تفهميني او توريني فين قلت ما يشير الى ذلك حظرتكم؟؟ واخيرا يا قمر
هو مين الأنتيخ و غاوي تريقة؟
انا فاتتني حاجة؟؟

واك واك
كاكي كاكي كاه

بنت القمر said...

انا شاورت علي كلامك يا حفصه لما قلتي اول مرة اسمع عن النساطرة
وبعدين مش بكلم مجاهيل خشي باسمك يا حفصه
هي دي الفكرة
الوقيعه لحساب شعيب كوكب ساينتولوجيا
مش انتي اول مرة تسمعي انا بقي تاني مرة
ويحرق الساينتولوجي علي القابالاه احنا بندردش يا حفصه مش انتي قلتي كده قلتي ورانا ايه؟؟
بس زي ما تقولي القافيه دايما تحبك عليا
كوكي كاك

بنت القمر said...

حفصه انتي ملكيش اي علاقه خالص بحكايه الساينتولوجي
ده شخص كتب كده عن نفس انه لو اختار لنفسه دين ها يختار الساينتولوجي
وكتب طده عند بلو
والشخص ده موجود هنا؟؟ يعني انتي عارفه مش كدا؟؟
بس وحكايه الساينتولوجي بقا قفشت معايا قافيه هزار بس وسميته رئيس كوكب ساينتولوجي ونحن كوكب البط المسالم
يا لهوي حد يشرح النكته يا حفصه
اضحكي وخلاص

HafSSa said...

الله يعني انا اقرا التلعيقات قد ما اقرا تقوم تقع مني كلمة واحدة بس تكون هي النحور و المنيب بتاع الحيوار كله
مممممممممممم
طيب حرجع اشوف مين اللي عاوز يبقى ساينتولوجي
و في الاخر و الاول براحته/ا
ما هو ده الهدف يا قمر
نتصارح و نتقبل و نصالح
عن نفسي كنت بسقط في الفيزياء و الكيمي كيمي كاه بمنتهى الجدارة فمؤكد مش حيقبلوني في المدرسة الساينتولوجي دي ابدا
بس بجد معرفش مين عاوز يبقى ساينتولوجي

عبس اعترف احسنلك

أبوفارس said...

باشمهندس..بجد وبدون أى تهريج وبلاقافيه كما يقول أولاد البلد..أنتوا بتتكلموا بجد...بجد يعنى مشكلة مصر هى مشكلة دينيه..المسلمين والمسيحين المصريين عايزين يتعرفوا على بعض؟؟؟بعد حوالى ألف سنه عايشين سوا لسه ماتعرفوش..
مشكلة مصر مش مشكله أجتماعيه..ولا مشكلة تحجر البنى اﻷجتماعيه فيها..ولاوجود مستفيدين من اللت والعجن فى مسائل فقهيه ولاهوتيه لانهايه لها..ولا هى تدهور التركيبه اﻷقتصاديه..ولاتغلغل الجريمه المنظمه -المافيا يعنى- فى كل أركان المجتمع المصرى..ﻷ مشكلتنا مشكله دينيه..؟؟
أنتوا بتتكلموا جد..والا أصابكم فيروس الخبل اللى أصاب المصريين عموما...مشكلة مصر مش تدهور اﻷنتاج..أو أنعدام اﻷنتاج ﻷكون أكثر دقه..بل هى المسلمين مابيعيدوش ع المسيحين..مشكلة مصر عدم الجديه فى أى شئ..والا أن المسلم بيقول للمسيحى "السلام عليكم"فينقهر اﻷخير ويرد من تحت الضرس..وعليكم..؟؟أنتوا عايزين تضيعوا وقت وخلاص..طب ماتيجى نناقش قضيه الحضرى الذى خان فريقه وأهله ووطنه ومجتمعه ودينه كمان..يعنى جت على دى..وألا أقولك نعمل بارتى كبييييره نعزم فيها كل المسلمين المصرينن وأخوانهم المسيحين ونعرفهم على بعض..جرجس أقدملك جارك أحمد..طماطم ياأختشى -دلع فاطمه- أعرفك على سالى زميلتك ف الكليه..لى تعليق أبدعته العاميه المصريه قصير مكون من تلات حروف أوله مثل أخره ويقرء من اليمين للشمال وبالعكس وأول حرف فيه هو أول حروف اﻷبجديه..عرفته ...ومن أعماق قلبى...مياميسا...خالد

HafSSa said...

معلش يا ابو فارس
احب اعلق على شئ و لو تحب تسميه اني باجي في الهايفة و اتصدر معنديش مشكلة
دلوقتي الحضري خان بلده و فريقه في ايه؟
ليه لما واحد مننا تجيله فرصة كويسة و يقدر يستفيد منها و يحققها نقول عليه خاين؟؟
يعني حضرتك لو كانت جت للحضري الفرصة دي و فضل الاهلي يماطل من غير فايدة و ضاعت عليه؟
مين حيفيده لما يكبر و يتقاعد؟؟
مش فاهمة فين المشلكة
ما هو زي ما البلد قدمتله هو قدملها
لكن جه وقت انه ياخد حقه و مش شايفه في فعلته اي شئ مشين و السادة الافاضل اللي بيقترحوا يسحبوا منه الجنسية فعيب اوي اللي بيفكروا فيه
هما مش صحاب مصر عشان اللي يعجبهم يدولوه و اللي مش على مزاجهم ياخدوها منه
مش عارفة ليه مش بنفرح لما واحد بيتطور مننا بشكل فردي؟؟
هل لازم نمشي حسب مقولة يا اطخه يا بكسر مخه؟؟
يعني يا اما كلنا ننحترف يا اما كلنا منكسبش ولا حاجة؟؟
لسه يعني تفكيرنا جماعي؟مافيش منفرد خالص؟؟ و في الاخر بنستغرب ليه مش بنتقد لقدام قيد خنفسة

تحياتي

عباس العبد said...

الصراحة انا مش شايف اى داعى لأثارة القلاقل و المشاكل لأن ده بيحرج صاحب المدونة و خصوصا لو بين شخصين هو بيعتز بمعرفتهم و بصداقتهم و بيحترم و بيحب ارائهم و من الزائرين الدائمين لمدونتهم فيا ريت ده يظل فى نطاق الضحك و ميتقلبش لخناق و زعل لأنى محبش اخسر اى حد , الانسان و المحبة فوق كل شىء
============
مهندس مصرى
متنساش تكتب عن المبادرة و تحط اللينكات
حفصة
لازم تكتبى عن المبادرة و تحطى اللينكات
البرىء
لازم تكتب عن المبادرة و تحط اللينكات
الانتشار يا شباب الانتشار
=============
بنت القمر
طبعا احنا صحابك و متشكرين جدا على التدوينة
انتى تشرفينا و تنورى المبادرة
و بعدين انا مليش استراتيجية مختلفة , انا قلتلك انى كان لازم اعرفه كويس علشان اعرف ارد عليه من غير ما احرج نفسى , و بعدين انا مدورتش على حد , الراجل كتر خيره شرفنى بالرد فى المدونة عندى فتعرفت عليه و بعدين البشر اهم , احنا عرفنا بعض و ده مفيد اكتر من اى تعليق
انا مبتفقش على حد يا ستى و لا على ملحدين و لا على لا-دينيين , هم احرار , لكن ميمنعش انهم ينضموا ,لأننا اوسع صدرا منهم , احنا قابلين الحوار على الرغم من ان البعض معترض علطول و بيقول اننا لا يمكن نتفق بدون ما يسعى للحوار و يختبره , رفض كده علطول مينفعش
نورتينا و مستنيين الانضمام للمبادرة
و بلاش هجوم و رزع فى الناس , متحرجنيش
======
وجهة نظرى
على فكرة انت مش اول واحد يشتكى من طول الاسئلة و الاسئلة الغريبة
و احنا حنحاول نراعى الموضوع ده و نستمع لكل الاراء لان اكيد احنا بنعمل للصالح العام
احنا منتظرين منك التعاون و ابداء رأيك فى اى حاجة و وجهة نظرك لو انت عايز توصل اى افكار عندك تصلح للتعاون و العمل
==========
ابو فارس
فيروس الخبل ؟!!!! جايز يكون اصابنا , محدش عارف
لكن محدش يقدر ينكر الاحتقان الطائفى و الافكار المغلوطة الى مترسخة فى فكر كل شخص عن دين الشخص الاخر , الاقتناع بالكمال على المستوى ده , اعتقد انه مشكلة
و زى ما انت شايف انه عدم الجدية و ده صحيح , فليه متخدش المبادرة بجدية و تشوف حتوصل لفين
بدل اخذها بعدم جدية و نعمل زى ما بنتهم المصريون انهم بيعملوا .
متين مسا مش مية واحدة

عباس العبد said...

اسكندرانى
هههههههههههه
انتى رميتنى على الارض من الضحك
انا مش عارف اكتب كلمة من امبارح بسبب هستيريا الضحك الى جاتلى , غزو البط و السحالى دى , كانت قفشة تمام و خطأ استراتيجى فى تعيين المصطلح و لولا العيبة انا كنت مسحته و داريت نفسى من الفضيحة الى انت عملتهالى
شوف هو مفيش مشكلة فى التعريف لأن المصطلح له شقين
فى علمانى , و ده معناه من ليس ب" رجل دين "
و عالمانى , اى مادى , لا روحانية
و دى النقطة المشتركة فى المسيحية و الاسلام , ان الاتنين بيرفضوا المادية و اللا-روحانية
فمفيش مشكلة فى التعريف ,
ثانيا دى مش مؤامرة ضد العالمانيين او اللا-دينيين او الملاحدة علشان يبقى فى رفض
فى نقطة انا مستغربها منك , انك هاجمت المبادرة و حكمت عليها بطوباوية الهدف و ا ستحالته او حتى فشلها و انت شخص تؤمن بالتعاون و المساواة بين البشر فأزاى ترفض فرصة للتعاون لمجرد انها " دينية "
و بعدين فى نقطة برضه مش واضحة خالص
لو واحد متدين و متقبل وجود ملحدين او حتى لا-دينيين او عالمانيين , فهو قابلهم على ارضيته الدينية اكيد يبقى ازاى كلامك " لو قبلهم الدينيون كمتساوين فهم لن يعودوا دينيين " , انا معنديش مشكلة انه اكون متساوى فى الحقوق و الواجبات و امام القانون مع شخص ملحد او لا-دينى ,
فى نقطة اهم , محتاجة للشرح اهم من هجوم البط و السحالى الى فشخنى ضحك
الله يخرب بيت وحدة الصف الانسانى الى جابتلى السخرية
ازاى , من وجهة نظرك ....
اللا-دينيون و الملحدين و العالمانيين بيدعوا الوحدة و المساواة بين البشر و هم مع اول تجمع للمتدينين الساعين لتخطى الفوارق الموروثة بالخطأ عن الفكر الدينى - الى هى فى نظر اللا-دينيين و الملحدين السبب فى كسر المساواة بين البشر و تدمير الوحدة الانسانية - يهاجموها و يقولوا انها حتفشل و انها مستحيلة و يرفضوا الانضمام اليها بحجة انها جية من دينيين , بدل من الانضمام اليها و السعى فى اطار هم بيقولوا انه هو هدفهم الى بيسعوا اليه ؟
لان وجود حياة اخرى بعد الموت – حسب فكر المؤمنين , او لا وجود لحياة اخرى – حسب فكر العالمانيين او الملحدين , بادىء من نفس النقطة و ينتهى عن نفس النقطة
الميلاد كبداية و الموت كنهاية – لا يؤمن الملحد بالامتداد ما بعد الموت فى ما يسميه المؤمن " الحياة الابدية , الجنة , النار , الملكوت , جهنم , فالهالا , بحيرة النار و الكبريت , تناسخ , اى حاجة "
لكن المشترك ما بينهم هى الحياة من المهد الى اللحد فازاى يرفضوا التعاون لجعلها حياة افضل ؟
اعتقد انها عنصرية و تطرف الحادى مماثل للتطرف الدينى
المتطرف الدينى بيرفض التعاون مع الاخر لانه مختلف معاه فى الدين و الفكر و بيتعالى عليه بحجة طوباوية الفكر فازاى من لا يؤمن بالدين انه يصبح متطرف بمرجعية لا-دينية مقلدا المتطرف الدينى برفضه التعاون لأنه مختلف معاه فى لا- دينه ؟
و ده مش منطقى خالص
الا لو انت شايف انه التعصب ده عيب اخلاقى على مستوى الفرد نتيجة تكوينه و خارج عن اطار الدين و بيشترك فيه كل البشر مؤمن او غير مؤمن , فى الحالة دى برضه يبقى كلامك غير منطقى لأنه الهجوم على المتعصبين لأنهم دينيين غلط برضه
.......
اما حكاية الضرب تحت الحزام فاكيد مش انا الى بضرب
انت شايفنى القبطان و لا ايه ؟
هههههه
و خد بالك لتتاخد اسير فى معركة البط الاخير
The last duck standing
========

أبوفارس said...

أيه ياحفصه أنتى مافهمتيش اﻷفيه والا أيه..أنا بأهرج على موضوع الحضرى من أوله ﻷخره..موافق على كل كلمه أنت قولتيها..أنا بهرج على المبادره اللامعقوليزم المفترض أننا نناقشها..مشكلتى أنها جت من ناس فعلا بأحترمهم وبأقول أنهم بيفهموا..لكن دى طلعت أوت منهمم بكتير..وبعدين ياحفصه ياعزيزتى أنت جبت الخلاصه فى كلمتين
"
مش عارفة ليه مش بنفرح لما واحد بيتطور مننا بشكل فردي؟؟
هل لازم نمشي حسب مقولة يا اطخه يا بكسر مخه؟؟
يعني يا اما كلنا ننحترف يا اما كلنا منكسبش ولا حاجة؟؟
لسه يعني تفكيرنا جماعي؟مافيش منفرد خالص؟؟ و في الاخر بنستغرب ليه مش بنتقد لقدام قيد خنفسة
"
هى دى ياست الكل..أحنا لسه عايشين بعقليه القطيع والقبيله والشعب والجماعه..مسلمين ومسيحين..لسه لم نتحول الى أفراد وكيانات مستقله..واﻷشخاص اللى بيكسروا الجماعويه دى بنحتاس فيهم..وننخض..مش بس كده أنا أعتقد أنه فى قلب المشكله بتاعتنا هو رفضنا لقيم التفرد والفرديه..وبالتالى حلولنا كلها هى تأكيد روح التجمع دى وهذا عكس أتجاه العالم كله اﻷن حتى فى المجتمعات التقليديه مثل الصين والهند..والنبى ردى عليا وقولى لى أنك فهمت اللى بأقوله ده..أحسن فعلا جاللى أحباط من المبادره دى....
تحياتى وصادق مودتى..خالد

HafSSa said...

ابو فارس
سامحني
بس لظروف معينة محستش انه هزار خالص
و اعتذرلك مقدما على ردي عليك في مدونتي لان هناك لقيت لك رد يدعم الفردية الشخصية و حسيت بزغللة في افكاري
المهم لما تقرا ردي هناك متزعلش مني و اديني بعتذرلك يا سيدي هنا و ان شاء لله هناك كمان
ده شئ
الشئ التاني كويس ان احنا متفقين على قيمة الفرد لوحده بدون وجود اية مؤسسات تعضد من قيمته او هيئات تقف بجواره
(حلوة تعضد دي)
الشئ التالت و الاخير
انا مش شايفه فين قيمة الفرد تقف اما مبادرة قام بها(افراد) غير تابعين لاية مؤسسة دينية سواء كانت رسمية حكومية او غير رسمية خيرية؟؟؟؟
يعني ده على حد علمي و مع ذلك انا متاكده انه مافيش اي جهة تعمل كراعي رسمي للمبادرة دي
دول افراد
فرد اسمه شريف عبدالعزيز
فرد اسمه هاني جوورج
فرد اسمه رامز
فرد اسمه ماريان و الخ الخ
قرروا انهم يتالفوا مع بعض و يوجهووا كلامهم لافراد تانيين عشان يلاقوا حل لمشكلة تؤرق الحي بأكمله

الفكرة مش في اننا نتعرف على بعض من اول و جديد و كاننا منعرفش بعض
بالعكس الفكرة اننا نواجه بعض
و نتكلم
و نناقش
مش يمكن منلاقيش حاجة وحشة بتحصل؟؟
احنا زي اللي بيعمل بحث
و بيستنى النتيجة
مييقدرش يقول قبل ما الفار يموت ان الدوا ده بيسمم
كبحث علمي لازم يستنى لما الدوا ياخد مجراه
و يشوف اعراضه على الفار
و لما الفار فعليا يموت
ساعتها بيقول اهو بصوا الفار مات
و كمان من ناحية تدوينية
في حاجات حصلت و اتغيرت بسبب تضامن المدونيين مع بعض على فكرة معينة
،خد بالك انا هنا مش بعدد مزايا التكتلات، ابدا، انا بتكلم عن افراد و قيمة صوت كل واحد منهم ازاي فعالة و تخيل بقى لما تتكاتل مع بعضها
، فيه خط رفيع اوي، ف ليه ميكونش عندنا نظرة ايجابيه انه ممكن المبادرة دي تنفع و لو لفترة معينة او بلاش دلوقتي خالص، مش يمكن تنفع بعد فترة سواء قصرت او طالت ، مش يمكن يجيي زمن و يتقال فيه انه من فترة قامت مجموعة من المدونيين باقامة مبادرة من شانها تحريك الماء الراكد و كانت لهذة المبادرة اثار في ما تلى من اجيال؟؟
اصل اصعب شئ التغيير الاجتماعي و مفهومات الثقافة
مش بتظهر بين يوم و ليلة
يعني لما نبدا المبادرة دي مش حنصحى الصبح الهفلي بوستين من جيراني و اخد معاهم شاي
لكن يمكن ابني حيرجع يلعب في الشارع مع الواد مايكل ابن طنط ماجدة من غير ما حد يقدر يتعرض لاي واحد منهم باذى، صح؟؟
مش هو ده اللي عاوزينه؟؟
اذن علينا بالصبر
و الصبر مرير يا سيد ابو فراس
ولا بلاش مرير
ده سخيف و غتت و تلم و متعرفلوش نهاية
لكن ادينا بدأنا


اسفه جدا جدا على الاطالة و مقصدش اي شئ بيها غير اني اتصارح
و اتقبل
و اصالح
و هذا تماشيا مع تعليمات قداسته بالكتابة عن الموضوع و الاشتراك فيه
تحياتي بكل ود للجميع

أبوفارس said...

بص ياباشمهندس أنا مش شايف أى جديه فى حاجه زى اللى أنتوا بتفكروا فيها ولا أى نتيجه..أنت بتبدء يمقدمه صحيحه..وهى فيه حاله أحتقان طائفى فى البلد وتصل منها لنتيجه فاسده تماما وهى أن الحل بتعرف على ديانات بعض ونجد أرضيه مشتركه بينها..أزاى يعنى..؟؟؟بشكل جماعى كده..ماينفعش والله ماينفع..أكيد هناك أرضيه مشتركه بين كل اﻷديان..ولكن هناك أيضا أرضيه مشتركه بين كل البشر..تجميع الناس فى طوايف ونحل أسهل من التعامل مع أفراد لكل واحد منهم تفرده..أنا مؤمن بالفرديه والتفرد وأن كل أنسان هو كون بأكمله وعلينا أحترامه كما هو وبالتالى لاأستطيع حتى تصور نفسى أشارك فى عمليه نعارف جماعيه كما تدعوا أليها..أستطيع المشاركه فى عمل جماعى يدخله أفراد بصفتهم كأفراد..نقابه مهنيه..جماعه مسرح..نادى قرأه..حزب سياسي غير فاشى..نادى أو منتدى أستماع للموسيقى..حاجه جديه..لتقويه أحساس الفرد بفرديته..سواء راجل أو ست..مسلم أو بوذى..وعلى فكره هناك ألتباس كامل فى مفاهيم كتيره لاحظته فى النقاش..,عموما..أنا قلت ماأراه واﻷرزاق على الله..حظ سعيد..تحياتى وصادق أمنياتى...خالد

بنت القمر said...

الاستاذ عباس العبد
بعد التحيه التمس من سيادتكم توضيح من المقصود بأثاره القلاقل؟؟
تانيا بعد التوضيح التمس توضيح أخرأليس هذا التجمع من باب ارأب الصدع بين شقي الامه وازاله الاحتقان والتعرف علي ارضيه مشتركه؟
واذا حكم الاخر علي هذا التجمع والتقارب بالفشل وطوباويه الهدف وفشل المساعي و بئس المصير والمآل واذا كان الاخر لا يدخر وسعا في توصيف نفسه صراحه بما لايدع اي مجال للشك وسوء الظن بالعداوة للاديان مجتمعه ووصفها بالتنين ذو الثلاث رؤس مرة
وبتفضيل ديانه غير سماويه كالسايتولوجيه مرة اخري
ووصف جهود اصحاب الاديان ومن قاموا بمبادرة معا الي الله ساخرا من جهودهم للتقارب رغبه في وحده الصف الانساني بأننا لاننتظر غزوا من البط !!الا تري سيادتكم انه استحق هنا سخريه بسخريه وعدوان بعدوان بل كان العدوان هنا من باب الدفاع المشروع عن مشروعنا النبيل
فما لك تكافئه باعتذار متخاذل؟؟!!ا
اليس من العقل والانصاف ان نحمي وليدنا وغرس ايدينا من من كادوا له كيدا
ام نتركه ليضيع يذبل عوده قبل ان يشتد
وبذلك نكون ما اجتمعنا الا لطق الحنك!!ا
هو هو لغو اليكتروني يذهب ادراج الرياح ؟؟ام هي خواطر بنراضيها وخلاص
اين ايماننا بقضيتنا؟ وسلامه موقفنا
هل نتخاذل من اول طلعه شمس
ام هل نلهو؟ ونصف بعضنا ظلما وزورا بإثارة القلاقل وبذلك ينتصر الباغي عدو الانسانيه؟ وعدو الاديان
اشكر حضرتك علي حسن استماعك
والسلام ختاما

بنت القمر said...

الي ان يتضح الموقف وتظهر حقيقه النوايا ويمحص الحق الباطل ويعود الحق الي اهله
تابع هذة المدونه هديه مني ليك ولا تقولي هما ولادوكهمه
اديب بجد

http://osamayassin.blogspot.com/
ها اتدعيلي

ذو النون المصري said...

انا ساشارككم في هذه المبادره و اعملوا حسابي اني واحد منكم و معكم
بالنسبه للصوره الموجوده فوق في البانر
ياريت تشيلها قبل بداية فعالية المبادره الله يخليك

عباس العبد said...

بنت القمر
اولا موضوع الصف الانسانى و غزو البط لازم نعترف انها قوية و مسخرة جدا و كلنا فطسنا من الضحك
ثانيا انا قلت ان بدل الموضوع بتاع البط و الساينتولجى متاخد بسخرية يبقى يفضل فى اطار السخرية
" فيا ريت ده يظل فى نطاق الضحك و ميتقلبش لخناق "
ده كلامى
ثالثا انه يعارض المبادرة و يقول انها حتفشل , هو حر
ما هو احنا مكناش متوقعين ان كل الناس حتستقبلنا استقبال الفاتحين
--------
" ليس من العقل والانصاف ان نحمي وليدنا وغرس ايدينا من من كادوا له كيدا
ام نتركه ليضيع يذبل عوده قبل ان يشتد
وبذلك نكون ما اجتمعنا الا لطق الحنك!!ا
هو هو لغو اليكتروني يذهب ادراج الرياح ؟؟ام هي خواطر بنراضيها وخلاص
اين ايماننا بقضيتنا؟ وسلامه موقفنا
هل نتخاذل من اول طلعه شمس
ام هل نلهو؟ ونصف بعضنا ظلما وزورا بإثارة القلاقل وبذلك ينتصر الباغي عدو الانسانيه؟ وعدو الاديان "
انا معاكى فى انه لازم ندافع عن قضيتنا
بس بلاش صيغة الاتحاد الاشتراكى دى
و متنسيش يا ستى انه لما حصل مشادة تدوينية بينى و بينك فى المدونة عنده
وقف جنبك و غلطنى و قال على انفعالى و حاجات الستينات دى
-------
انا عارف المدونة الى انتى بعتيهالى و متابعها
بس قصدك ايه بأنه اديب بجد ؟
بتلمحى لأيه ؟
انى اديب مش اصلى
و لا مش اديب اصلا ؟
فهمينى هه
فهمينى
==============
ذو النون
انت تنور فى اى وقت
و تبقى صاحب الميادرة كمان

Alexandrian far away said...

على فكره يا رامز أنا لم أقتنع بردك للأسف ومازلت لا ارتاح لهذه المبادره
معا أمام الله؟
ليس أمام الوطن
ليس أمام الأنسانيه
لكن أمام الله
يعني أيه؟
حتصلوا سوا مثلا؟
فين الهدف أو الأهداف المحدده للمبادره؟
أقناع ناس يعتبر تكفير الأخر جزء أساسي من دياناتها بأنها تعمل ايه؟
أيوه يارامز التكفير
أنا لا أعترف بالمسيح كمخلص وعليه فأنا لن أدخل الملكوت
وأنت لا تعترف بمحمد كرسول ونبي وعليه أنت ستدخل جهنم
حتقفوا أمام الله تقولوا ايه؟
طيب المبادره بين المسيحيين والمسلمين يعني أيه؟
يعني بين اي مسلمين واي مسيحيين بالظبط؟
يعني بين السنه والكاثوليك مثلا؟
ولا بين السنه والأرثوذكس
طيب الشيعه داخلين في الموضوع؟
والدروز؟
والأنجيليين
والمعمدانيين
وشهود يهوه كمان؟
طيب اليهود معاكم؟
والبهائيين؟
وأيه رايكم فيمن لا يعترفون بالديانات السماويه؟
والملحدين؟
وأتباع الديانات الأصليه

تصدق الموضوع حيبقى زي كائن نصفه بطه ونصفه سحليه
ونسميه سحلبطه

حلوه دي؟

صديقي الأعز ابوفارس
سلمت حدة رؤيتك

وأنا علقت تاني يا رامز لكي أؤكد لك أني مش زعلان
أنا ما بازعلش من بناتي وأولادي

تحياتي يا عزيزي

HafSSa said...

يا اسكندراني
لا اعتقد ان الهدف من المبادرة هو الصلاة سوا مع بعض سواء في الكنيسة او المسجد
و لا اعتقد برضو ان الهدف منها اقناع الطرف الاخر بديني او بعقيدتي

اعتقد ان الهدف هو الكلام
نفضفض مع بعض يعني على اللي مزعلنا من بعض
و اللي بيضايقنا من بعض
و الحاجات الصغيرة اللي بتحصل من هنا و من هناك و بتخلي الناس ساكتة لكن قلوبها بتشيل و تعبي

لكن انا مش فاهمة ليه التخصيص في المذاهب جوا كل ديانة؟؟
و ليه حضرتمك معتبر ان اتفاق ديانتين على المصالحة معناها الزج بالغير دينيين في السجن؟؟
انا لسه مش مستوعبة
ربطك للحاجتين دول مع بعض
معلش اعذر غبائي
و قصور فهمي

سيبك بقى من ده كل
سحلبطة ده تحفة و لازم يتعمله تمثال
انت بتجيب الحاجت دي منين؟ انا سخسخت من الضحك
ربنا يبسطك كمان و كمان

Alexandrian far away said...

صباح الخير يا استاذه حفصه
الحقيقه أنا حاولت أعمل الموضوع ده مع صديقين مسيحيين وصديق مسلم وأكتشفنا أن ما يمعنا أكثر بكثير مما يفرقنا، وأن توافقنا الفكري والثقافي والإنساني طبعا يفوق كثيرا الخلاف في الديانه وأنه الحقيقه رغم الحاجات الكتيره ألي خانقانا من بعضها لكن ولا حاجه منها لها علاقه بالدين

نيجي بقى لموضوع أتفاقهم مع بعض
بصي يا ستي في الخفاء تقريباهناك فعلا تواطوء بين الأغلبيتين السنيه والأرثوذكسيه
يعني السنه يهيمنوا مذهبيا على الغسلام والأرثوذكس كذلك، والسنه يضطهدوا الشيعه والأرثوذكس يضطهدوا شهود يهوه - دلوقتي حد يتهمني أني من شهود يهوه- والأتنين مغمضين الأعين عن بعض
السؤال يا حفصه
هل هذا اللقاء المقترح على اساس المواطنه والأنسانيه؟
أم على اساس نوع من المحاصصه الدينيه مثلا إن صح التعبير
أكاد أشك في نفسي لأني أشك في أتفاق تحت الترابيزه بين الأخوان وبعض الجهات الكنسيه
أتفاق على تدونا قد أيه ونساعدكم تاخدوها

دي وجهة نظري

وسعيد أن السحلبطه أسعدتك وضحكتك
دلوقتي برضه حد يتهمني أني باروج لعبادة السحلبطه

تحياتي ومودتي

HafSSa said...

صباح النور يا استاذ اسكندراني

طيب انا حقلك على حاجة تانية
انا حشرحلك فهمي انا للموضوع
و لو غلطت رامز يخش يقلي غلط و لو صح رامز برضو يقلي صح
انا اخترت رامز ليه؟؟
عشان هو من اصحاب المبادرة الاصليين

نبدا و نقول
ان زي ما وضحت رايي للاستاذ ابو فراس حرجع و اقول اني انا فاهمة ان المباردة دي منشاها افراد و ليست جمعيات او هيئات رسمية او حتى احزاب سياسية
يعني اعتقد ان لا الاخوان ليهم بيها علاقة و لا الكنيسة المصرية الممثلة في البابا شنودة لها علاقة بينا
ليه مالهومش علاقة ؟ او ايه دليلي ان مالهومش علاقة؟؟
اولا: لان لو كانت دي حاجة بترعاها حركة الاخوان المسلمين كانوا اول من عملها ضجة على كل المدونات التابعة ليهم و اللي بتمثل صوتهم في عالم التدوين زي انااخوان و ميت و ابصر مش عارف مين تاني
ثانيا:
لو كانت الكنيسة اللي عاملها كانوا برضو حيطلعوا يعلمولها هليلة بس يمكن مش على المدونات لكن بشكل اعلامي اخر
ثالثا: الاشخاص اللي جوا المبادرة دي المسلمين اللي فيها مش تابعين للاخوان ده اذا مكنوش راضيين على اغلب ممارستها
و المسيحيين اللي في المبادرة مش كلهم ارثوذكس
و ابسط مثال رامز
و انا احب اقولها من دلوقتي اذا تكشف ليا ان المبادرة دي لها دعوة من قريب او بعيد و جالي دليل قاطع باتصالها بالاخوان فانا حكون اول واحدة تطلع منها و حنشر خديعتها على الملا و مش خايفة من حاجة
لان عن نفسي نوووووووووووو واي احط ايدي في ايد الاخوان المسلمين و لو على رقبتي

حلو الكلام؟؟


الحاجة التانية الى احب ارجع اوضحها ان المبادرة دي مش عشان نقرب عقيدتين او ديانتين بينهم و بين بعض
مؤكد فيه فروق
اذا كانت المذاهب في الديانة الواحدة مختلفة مع بعضها
و جوا المذاهب منشق عن بعضه
و بعد كل ده كل مجموعة جوا كل منشق داخل مذهب جوا ديانة منفصلة عن بعضها
شفت المصيبة اللي احنا فيها؟؟
الفكرة مش اني احاول اقنع نفسي بان الديانة المسيحية محتاجة شوية تظبيط و تبقى فل او ان بالنسبة لي الكاثوليكي يقرب لي في الفكر اكتر من البروتستاني و لا حاجة
لا الموضوع مش كده ابدا
احنا بنتكلم عننا كلنا مع اختلاف مرجعيتنا من اصغر تفاصيلها لاكبر تفاصيلها
و ازاي نتعايش ببساطة و بنية صافية و منفكرش في الدين
احنا لو صفينا النية و هزرنا مع بعض
صدقني دي بتغيير في الشعور الداخلي من جوا كتير
و انا بكلمك من كلام حقيقي و عن تجربة
انا و زميلتي مصفيين النية و مش فارق معايا هي بتعمل ايه والعكس صحيح
و بنهزر و كل واحدة مننا عارفة ان التانية و هي بتهزر مش قصدها تتطاول على دين التانية
و كل ده بيحصل بكل سلاسة ليه؟؟
عشان انا صفيت نيتي من ناحيتها و هي نفس الحكاية
اتصارحنا و اتصالحنا والله من قبل ما اعرف عن المبادرة دي

متفقة معاك في حكاية هيمنة السنة و اضطهادهم للشيعة لكن مقدرش احكم على الارثوذكسية لاني مشفتش بعيني
لكن المشكلة هي ان الشيعة بيكفروا السنة و اليهوه بيكفروا البقية و البروتستانت قرفانين من الكل و السلفي مش طايق دين الاسماعيلية مثلا
و موال كبيييييييييييييييييييير لو احنا حنحاول نعمل المبادرة دي عن طريق انهي مذهب بيحاول يصالح انهي مذهب
يبقى لا و حتتحول الحكاية لحرب عقائدية ذات ثلاثة مستويات على الاقل و نبقى ضربنا طقم كنب في المحطة الرئيسية للكهربا بحالها

المقصود من المبادرة ان احنا نتصافى و نرجع زي زمان
و ان الحكياة دي متبقاش على سمتوى شوية ناس و عدد بسيط
لأ ، عاوزينها على مستوى اغلب الناس
و حرجع اقولك اني مش شايفة اي خطر على العلمانيين او الملحدين او البهائيين او اي شئ غير مسلم و غير مسيحي
ده مش اتحاد مسلم/مسيحي ضد العقائد الاخرى
ده محاولة صلح

و اسفه جدا للاطالة
صدقني مش قصدي
بس انا رغاية و ميتبلش في بقي فولة و ممكن اتكلم و انسى نفسي
و شكرا لسعة صدرك و تحملك للتي و عجني


تحياتي للجميع

معاذ النجار said...

السلام عليكم
أنا أول مرة أكتب تعليق فى مدونة البشمهندس رامز على الرغم من إنى حاططها فى الفيفوريت على مدونتى من فترة وبتابعها تقريبا كل يوم ، أنا بصراحة مش عارف ليه بس الواحد كده ساعات يدخل على مدونة قلبه يرتاحلها علطول ويعملها مفضلة حتى من غير ميقرا كام موضوع على بعض ... عالعموم ده مش موضوعنا بس عشان دى أول مرة أعلن انى أتغويت

بخصوص المبادرة

1-أنا مقدرش أعترض على أى محاولة يتم عملها لتوسيع الأرضية المشتركة بين أهل الديانات المختلفة ، وطبعا فى عناصر كتير نقدر نستغلها ونوظفها لصالح المحاولة مثل رابط الانسانية المشترك الرحب والوطن المشترك اللى بيفرض التزامات كتيرة من شأنها انها تقرب الناس من بعضها وتوسع الارضية المشتركة

2-من هذا المنطلق أرحب بأى مبادرة بناءة تحاول المضى قدما فى سبيل إرساء بعض المفاهيم الخاصة بتلك العناصر والقواسم المشتركة السابقة بطريقة صحيحة تتسم بالموضوعية وحسن النية وتنفيذ الآليات التى تساعد على تفعيل المبادرة كالاستفتاءات أو المناقشات أو اى وسيلة أخرى تصل بنا إلى الهدف المراد

3-الذى يفصل فى تقييم مستوى المبادرة هو المحتوى الذى تتضمنه وسائل إنجاح المبادرة بغض النظر عن سلامة النية التى من المحتمل أن تكون متوافرة ولكن التعبير عنها لم يكن جيدا بالشكل الكافى ، فى حالة تلك المبادرة تم عمل استبيان أو مجموعة أسئلة يتم الاجابة عنها فى سياق التفاعل مع المبادرة

4- صدمتنى الأسئلة بما تضمنته من سياق عقدى بحت لا يمت بأدنى صلة لما تروج له المبادرة من روابط الانسانية والوطن ، أفهم أن يكون السؤال عن مشاركة الأقباط فى مجلس الشعب أو الزواج من قبطية أو مشاركة القبطى فى السكن أو قبول تهنئة المسيحى فى الأعياد ،لكن أن يكون السؤال عن المسيحى هل هو كافر أم لا ، أو ما هو الفرق بين غير المسلم والكافر وما إلى ذلك من أسئلة تدخل فى نطاق العقائد ولا تمتد إلى نطاق المعاملات ، فإن ذلك يثير من الشك فى حسن النوايا ما يمكن تبريره...

5- هناك تخبط واضح فى الاجابة على أسئلة المشككين فى سلامة المبادرة كالقول باستهداف المتدينين فى المقام الأول ثم نطالب المتدين بالاجابة على أسئلة تصيب ولاءه الأول فى منطقة خطرة ... من الطبيعى ألا يجد العلمانى أو الملحد أى غضاضة من الأسئلة الموجهة ، ولا أعتقد أن أيا منهم يعانى مشكلة من المشاكل التى تزعم المبادرة معالجتها ، ليس لشئ إلا لأنه يتبنى أيديولوجية يستمد منها ثقافته ...ولكن المتدين بوجه خاص والعامى سيصدم من الأسئلة وسرعان ما سيفرغ كل ما فى جعبته من إجابات يستمدها من مرجعيته الاسلامية التى تفرض عليه عقيدة واضحة تدخل فى نطاقها الأسئلة الموجهة ، وتلك الشريحة أعتقد أنها هى المقصودة تحديدا من قبل المبادرة لما تعانيه من قصور على مستوى فهم القواسم المشتركة التى من شأنها إنجاح المبادرة

معلش عالإطالة

عباس العبد said...

اسكندرانى
انت مقلتش اسباب تفيد عدم اقتناعك لكن انت حر فى قناعاتك
لكن احنا لا ندعو لدمج الاديان علشان نصلى مع بعض
و لا بندعو ان كل واحد يغير دينه و لا عايز اقنعك بأنى انا احسن منك و لا انت احسن منى
السلم الاجتماعى
قبول الاخر
=======
" طيب المبادره بين المسيحيين والمسلمين يعني أيه؟
يعني بين اي مسلمين واي مسيحيين بالظبط؟
يعني بين السنه والكاثوليك مثلا؟
ولا بين السنه والأرثوذكس
طيب الشيعه داخلين في الموضوع؟
والدروز؟
والأنجيليين
والمعمدانيين
وشهود يهوه كمان؟
طيب اليهود معاكم؟
والبهائيين؟
وأيه رايكم فيمن لا يعترفون بالديانات السماويه؟
والملحدين؟
وأتباع الديانات الأصليه "
اى طائفة مهما كانت هى مدعوة
لو فى دروز معندناش مشكلة
شهود يهوه , انجيليين , معمدانيين , ادفنتست , مورمون , شيعة , سنة
انا لا اتكلم عن معتقدات و مدخلش فيها
احنا مش حوار اديان و لا دمج اديان
احنا بينا كلنا قاسم مشترك هى الفترة ما بين المهد الى اللحد
من اول ما تتولد لغاية ما تموت
دى فترة مشتركة , ليه منسعاش لأنها تكون حياة كويسة , حياة افضل ؟
=========
اخوان ايه و كنيسة ايه الى احنا عاملين ليهم كوبرى لأتفاقات تحت الترابيزة
لولا انى عارفك كنت قلت انك بتعانى من نظرية المؤامرة و انها مسيطرة عليك و انك عنك هواجس امنية
دى لا فيها اخوان و لا فيها كنيسة
الاسماء دى المنشورة هى الى عامله المبادرة من اولها لأخرها
السايت و السيرفاى و كل حاجة
ده سعى لحياة افضل
انت شايف انها مؤامرة !!!! دى مش مشكلتنا و لا ازمتنا
شايف انها بلا فائدة ,, حقك و وجهة نظرك و لابد انها تحترم
انما اتهام مباشر بمحاصصة دينية على اساس مرجعية كنسية اخوانية
فده طلعت منك اوت خالص
=============
حفصة
انت فهمتى المبادرة و روح المبادرة كويس جداو دى حاجة تسعدنى
========
معاذ
"
رابط الانسانية المشترك الرحب والوطن المشترك اللى بيفرض التزامات كتيرة من شأنها انها تقرب الناس من بعضها وتوسع الارضية المشتركة
...
كلامك ممتاز جدا و انا بوافقك فى اغلبيته و خصوصا الفقرة الرابعة و الخامسة الى حتتنقل بالكامل لأعضاء المبادرة لمناقشتها و خصوصا بعد ما بلغتهم,
بالنسبة للفقرة الخامسة
معلش انا مقدر و احنا كلنا حنتناقش فى الموضوع ده
بس لازم تقدر حاجة لو تسمح
ان الى عمل الاستفتاء شخص زى و زيك
لا محترف و لا دارس
مدون زى و زيك يقصد خير
فكل الملحوظات دى حتتجمع و تتدرس و يعاد صياغتها
متشكر جدا لأهتمامك
....
على فكرة كل الناس الى قالت ملحوظات
متاخدة بجية مطلقة
ده عمل انسانى شبابى فى المقام الاول
و لازم نحترم كل الافكار و نعمل على استيعابها

بنت القمر said...

الساده الافاضل
________________________
ماذا نقول معا امام الله؟؟
يتساءل البعض ماذا نقول معا امام الله لا انتوا بتأمنوابمحمد ولا احنا عمرنا بنؤمن بيسوع ربا؟
سؤال خبيث يهدف الي تكريس الفرقه والا ختلاف ابتداءا وانتهاء حيث ينتصر من عادي الاثنان معا
وهنا نقول انه مع اختلافنا نقول امام الله اننا نحاول امام خالقنا ان نعبر فوق الالام الماضي وحزازيات الحاضرواننا سننتصر لانسانيتناابناء ادم رجل واحد ومن رحم حواء ام واحده
اننا نجتمع نتقاسم ذات الوطن بجدرانه وشوراعه نشرب من نيل واحد ونحيا في بيوت متجاورة
نقول امام الله اننا حاولنا ان نطهر قلوبنا من الحقد والكره ويكفينا شرف المحاوله
حين يجمعنا الله في يوم لا ريب فيه نقول يارب حاولنا بدأنا وان حركنا الجبل قيد انمله فقد حاولنا
يتبع

بنت القمر said...

من يصالح من؟
___________________
البعض يري استحاله المصالحه فالمسيحي الارثوذكسي يضطهد الكاثوليكي والسني يضطهد الشيعي ومعرفش مين بيضطهد مين؟
وهنا ارد
من قال ان الاغلبيه حتما وبالضرورة تضهد الاغلبيه باعتبارها مستضعفه الا تتفوق ايران الشيعيه علي العرب السنه جميعا ؟؟وحاربت العرق تارة واحتلت جزر الامارات تارة اخري وها هي تناطح امريكا سيده العالم!! اليس الشيعه اقليه في محيط عربي سني
الا يتفوق الكاثوليك المصريين الاقليه علي الارثوذكس ثقافيا ومؤسسيا وماليا انظر عدد المدارس والمستشفيات والارساليات الكاتوليكيه اللي تسد عين
الشمس مقارنه بمشاريع الارثوذكس الهزيله!!ا
من يسود من؟ ومن يعلو من؟؟
الم يسود البيض الاقليه جنوب افريقيا علي اغلبيه سوداء
اليس واضحا ان في مناخ الاضطهاد المزعوم ان اغني رجل اعمال مصري مصنف 250عالميا هو نجيب ساويرس!!ا
بئس القول حقا من يصالح من
يصالح كل انسان يحيا داخل هذا البيت {الوطن يصالح اخيه وجارة وزميل عمله وصديق دراسته شيعيا او سنيا كاثولوكيا اوارثوذكسيا
مسمعتش والله ان عندنا شهود يهوه ولادروز..وبالتالي الموضوع ما يخصناش
يتبع

بنت القمر said...

هل المبادرة مشروعنا الاول؟
**********************
يتساءل البعض اليس الانتاج والتنميه هي قضيتنا الاولي؟
وهنا ارد لا انتاج ولا تنميه لوطن ينتظر ان يحترق بنار الفتنه كل لحظه
لا تنميه في جو ضغينه وكره واللي مش شايف ان في مشكله طائفيه اصلا معلش بقا يلبس نظارة وينزل الشارع
لا تتعارض المبادرة الفرديه ابدا والي تعتبر ظهورها اصلا تأكيد لحقيقه وجود مشكله طائفيه في مصر_لاتتعارض المبادرة نهائيا مع املنا في مجتمع يسودة الرخاء وتعمه المخترعات ويطفو علي بحور التكنولوجيا
بل العكس هو الصحيح
لازم نروق الجو عشان نشوف شغلنا
يتبع

بنت القمر said...

حتي لا ننسي
***************
من يقف في طريقنا
لاقف في طريقنا الا من له غرض او غايه من اجتمع علي كراهيتنا
لا اسير انا خلف السيد مهدي او شيخ الازهر ولا ينسك المسيحي حتما بثوب البابا شنودة
حتي لا ننسي ان المبادرة فرديه لا تقف خلفها اي مؤسسه دينيه او حكوميه
حتي لاانسي انا من عادا المرأه المستنيرة حسدا وغلا وخط في ذمي تدوينه كامله يصفني بالقرشانه المغرورة قائده الجيوش ووصف شهروزة الزميله بالعانس المترصصه علي الكيبوردات حتي يأتي العريس!!بئس القول ما اشنع الفعله!!.. بوست كامل!! فمالي اقبل اعتذارا مبطنا في خلفيه تعليق تدوينه قال شتمني في ميدان وصالحني في حارة
عذرا الاخ رامز هوهنا مش حارة او ممكن تقول حارة المثقفين.
فمالي اقبل اعتذارا لا والله
فلتمطري يا سماء حجارة تسحق وجهي ولتخرجي ياارض نارا تحرق جبهتي وتسحق هامتي
ولتنتفضي يا جبال غضبا مني إن كنت انسي تلك الخطيئه واشرب كأس الهوان
والذل لا ابدا
!!فمن يسقط قمرا في بركه طين؟
يتبع

بنت القمر said...

المبادرة الي اين؟
*****************
يتساءل البعض عن مستقبل المبادرةواؤكد لهم ان غرسنا بدأ ينمو
واننا ما فعلنا سوي قص شريط الافتتاح والباقي جاي كله ها يتظبط واقترح ان تعاد احتفاليه بالمبادرة
كل سنه علي غرار كلنا ليلي
وتكون في العام القادم مثلا طاقه للبوح لكل طرف مسلم ومسيحي _طاقه للبوح بمكنونات الصدور حول ما يتصورة صعوبات التعايش مع الطرف الاخر
انت مخنوق مني في ايه وانا مش طايقك ليه؟ ونشوف نقدر نقدر نعمل ايه ولوفرديا علي مستوي الافراد وهنا اقصد
مصاعب التعايش اليوميه
او الحزازيات اليوميه
حتي نتفادي كأفراد هذه الصعوبات ونراعي مشار الاخرين اكتر
ومننساش من يحفر جدار بسكين؟؟
تحياتي واشكر للاستاذ رامز حسن استماعه وطوله باله ودماثه خلقه
متشكرين انك مستحملني
متشكرين علي مجهودي فيمشاركتكم هذا المنتدي والصالون الثقافي

بنت القمر said...

يا استاذ عباس يا عم الدونه اللي قلت لك عليها بتعجبني وبما انك حاطط صف لينكات ادباء علي جنب قلت يمكن متعرفوش غلطت انا؟
حد قالك انك مش اديب؟
اصله عمل مجموعه اقاصيص حلوة اوي عجبتني فيها واحده اسمها هوة
وعموما تقدر تبعت لبلو ستون القصص بتاعتك وهي تبعتهالي واو عدك ابص عليهم واقييمهملك قريبا
ان شاء الله عشان مقدرش اسيب الايميل بتاعي في البروفيل ولا في لي تعليق
منعا للصداع المزمن
تحياتي

HafSSa said...

يا قمر القصص كلها موجودة كرابط في تدوينة بعنوان يخرب بيتك يا هيكل

Alexandrian far away said...

صباح الفل على الجميع
بجد مش ممكن
كان شكلي عجيب النهارده في المكتب وأنا عمال اضحك متواصل بشبه هستيريا لأكثر من عشر دقائق
يا للهول
سامحني يا رامز مش قادر امسك نفسي خلاااااااص
أنا حاولت أكتب لك أيميل استأذنك فيه لكن لظروف أنعدام الأنترنت في السكن الجديد ماقدرتش
فسامحني معلش
وحأبقى اصالحك لما اشوفك

فعلا مش قارد أمسك نفسي من الضحك، وكل ما افتكر أضحك تاني

كل ده؟
هي القيامه قامت خلاص ولا ايه؟
فلتمطري يا سماء كوكاكولا تبقع القمصان
ولتخرجي يا ارض قهوه سخنه تلسع الأصابع
ولتنهار رفوف علب الكورن فليكس لتسبب الهرش في الأقفيه (جمع قفا)، ولتنسكب برطانات المربى ليتزحلق على ظهره مرتكب تلك الخطيئة التي أهتزت لها الأجرام السماوية وتداعت لها المجرات الكونيه، وحرمنا من أجلها اكل الجيلي والمهلبيه

وتأكيدا للرفض والغصرار على الثأر ونفي أي رغبة للتصالح أو الإعتذار أهديكم مقاطع من معلقة أمل دنقل (لا تصالح)


لا تصالحْ!
ولو منحوك الذهبْ
أترى حين أفقأ عينيكَ
ثم أثبت جوهرتين مكانهما..
هل ترى..؟

لا تصالح على الدم.. حتى بدم!
لا تصالح! ولو قيل رأس برأسٍ
أكلُّ الرؤوس سواءٌ؟
أقلب الغريب كقلب أخيك؟!
أعيناه عينا أخيك؟!
وهل تتساوى يدٌ.. سيفها كان لك
بيدٍ سيفها أثْكَلك؟

لا تصالح
ولو توَّجوك بتاج الإمارة
كيف تخطو على جثة ابن أبيكَ..؟
وكيف تصير المليكَ..
على أوجهِ البهجة المستعارة؟

لا تصالحْ

ولو وقفت ضد سيفك كل الشيوخْ

والرجال التي ملأتها الشروخْ

هؤلاء الذين يحبون طعم الثريدْ

وامتطاء العبيدْ


لا تصالح
أبدا

صبح صبح

Alexandrian far away said...

الأستاذه العزيزه حفصه
يمكن تكوني على حق
وأنني أنظر للفيل بميكروسكوب
ويمكن يكون رامز على حق وأنني على وشك الإصابة بأنفلونزا نظرية المؤامره
وأن الموضوع كله قعدة حبايب وعتاب محبين وفش خلق ما بين أخوه

يمكن

لكن تخيلي قد ايه الصدف ممكن تكون عجيبه وغريبه

شوفي الخبر ده

http://www.alarabiya.net/articles/2008/03/05/46519.html

سبحان الله فعلا
صدف عجيبه
المهم
هو أنا ممكن أدلو بدلوي في الموضوع ده؟
ممكن أشارك يعني مثلا؟
بأعتبار أنه ليا بعض العتب على كلا من المسلمين والمسيحيين؟
أه بالحق ينفع الواحد يعاتب أصحاب ديانته نفسها؟

تحياتي

عباس العبد said...

بنت القمر
تحياتى
اعتقد ان الى يفهم غلط او مش عايز يفهم بعد توضيحك المستفيض انت و حفصة
يبقى حر و ليس عليه حرج
انا اعتقد ان البيان المؤسس مكنش حيتكتب بالحلاوة الى انتى كاتباها دى
تحياتى و احتراماتى
اما بالنوسبة لموضوع اديب
فانا مش اديب يا ستى
دى حواديت صغيرة كده و انا مزعلتش طبعا
لأنى متابعه وعارف انه جامد اوى
انا كنت بهرج معاكى
كلمنى بلو هى عندها المجموعة و تبعتهالك
و انتى عندك الميل بتاعى
ممكن تبعتيلى اى رسالة فاضية اعرفه بس و حبعتلك المجموعة
و متخافيش مش حقول لحد عليه
اشكرك على توضيحك العظيم
الى فعلا لازم يتنقل للمجموعة كلها
تحياتى
==========

عباس العبد said...

اسكندرانى
الصراحة انا مش فاهم دلوقتى انت عايزة ايه ؟ و استغرابك و تعجبك ده مبنى على اساس ايه ؟
حتى رفضك انا مش فاهمه
و لا حتى مسبب
انت خايف من مؤامرة على اللادينيين و الملاحدة ؟
و لا دعوة لمزيد من الدماء بين الاديان بقصيدة لا تصالح دى ؟
و لا نظرية المؤامرة فعلا اصابتك ؟, علشان تنشر لينك حيتنفذ كمان 8 اشهر , لمجرد انه صدفة
بما ان الموضوع جى من الفاتيكان و انا الكاتوليكى الوحيد الى فى المجموعة يبقى انا اكيد لى مصادر مطلعة من داخل الفاتيكان
دا انا جامد اوى و انا مش واخد بالى و لى مصادرى
تبقى مصيبة كمان لو فاكر انى بنسق مع الفاتيكان مباشرة و انى كارينال متخفى و قايم بدور شاب صغير
علشان انهى الموضوع ده
لأن انت حولت الموضوع الى جدل بيزنطى انا مش شايفله فايدة و لا حتى عارف انت رفضك مبنى على اساس ايه ؟
بس على اللينك ده
http://egyptnow.blogspot.com/
اللينك ده
طلعت فكرة المبادرة الاولى مع احداث الاسكندرية من سنتين
اكتوبر 2005
و فيه نفس الاعضاء المؤسسين للمبادرة و ممكن تراجع الاسماء ( ممكن ابعتلك البطايق علشان متقولش تشابه اسماء ) و انا اجدد واحد انضم
معنى كده حسب نظرية المؤامرة بتاعتك
حاجة من التلاتة
يا اما :
الفاتيكان هو الى سبب احداث الاسكندرية و اتفق معانا اننا نطلع بالمبادرة و بعدين نسكت سنتين و بعدين نحييها بالتزامن مع مبادرته الى ابتداها العلماء المسلمين من ستة اشهر و هو بيرد عليها
يا اما :
الفاتيكان اتغاظ مننا فطلع بالحوار ده دلوقتى علشان يسرق الاضواء مننا
يعنى لعب عيال
يا اما :
احنا عرفنا الاخبار بتاعة 2008 من تلات سنين و خرجنا بالمبادرة نتيجة تسرب الاخبار , عرفناها بألة الزمن , طلعنا المستقبل و رجعنا تانى
الصراحة انا مش فاهم
لو مش عاجباك و لا مقتنع
حقك
و لو شايف انها بتمثل خطورة و انك مضطر تحاربها , برضه حقك
بس قول رأيك بصراحة
لأنى دلوقتى فعلا مش فاهم انت عايز تقول ايه ؟
مرة تقول جربتها مع اصدقاءك و نجحت و اكتشفتم ان مشاكلكم ليست دينية انما فكرية
و مرة تقول تنين بتلات رؤوس
و مرة تقول
مؤامرة ضد الملحدين و اللادينيين
و مرة تقول لا تصالح
و مرة تقول مش مقتنع
؟؟؟؟؟؟؟؟؟؟؟؟؟؟؟؟؟!!!!!!!!!!!!!!!!!!!
مش فاهمك خالص
=============

Alexandrian said...

عزيزي رامز
أنا اسف
كان مفروض أشرح لك لأنه كده الخطوط دخلت معاك على بعض
ولك حق
أنا بأكتب لك أيميل دلوقتي اشرح لك فيه
عشر دقايق ويكون عندك

أنا أرسلته فعلا وأتمنى أنه يوضح لك

Alexandrian far away said...

أنا ارسلت لك اليميل يا رامز
أتمنى أنه يكون كافي للإيضاح

تحياتي