Tuesday, July 01, 2008

انا مش عارفنى

ana mesh 3arefni.mp3 - abd-elbasset hamouda

انا مش عارفنى

انا تهت منى

انا مش أنا

لادى ملامحى و لا الشكل شكلى

و لا ده أنا

--

ابص لروحى فجاة لقيتنى

لقيتنى كبرت فجأة كبرت

تعبت من المفاجأة و نزلت دمعتى

قوليلى أيه يا مرايتى

قوليلى أيه حكايتى

تكونش دى نهايتى و اخر قصتى

--

يا دنيا طفيتى شمعى

يا ناس كترتوا دمعى

و العمر راح منى

كتبت الأه بقلمى

كسرتوا سن قلمى

و برضه بقول قدرى

حزين من صغر سنى

و مين على الأه يعنى

مودانى الخطاوى لسكة تايهة منى

--

يا ليل , الجرح قاللى

معايا زى ضلى مئانس وحدتى

سرقت عمرى كله

خلاص مبقاش فاضلى

غير جرحى و دمعتى

جريح و ده مش بيدى

مخدتش بس بدى

زرعت يا ناس ورودى

جنيت الشوك لوحدى

-

عبد الباسط حمودة

===========

 


 

 

16 comments:

Anonymous said...

سؤال من مواطنة مصرية جاهلة بأحكام الغناء الحديث
ليه كل ما بروح في حتة بسمع البني آدم ده بيغني بعلو حسه؟
أسافر في السوبر جيت الاقيه مشغله
أرجع بنفس أم السوبر جيت مع سواق تاني برضو الاقيه مشغله
الجيران اللي تحتنا واللي قدامنا مشغلينه ليل ونهار
سواق ميني باص 136 الجيزة-زهراء الحي العاشر مشغل نفس أم الشريط
وكل شوية أسمع حتة من " أنااااااااااا" أو حتة من "كسر رجليه وكمان ايديه وقال انا خدت حقي خلاص"
لييييييييييييييييييييييه؟؟

ده انا قربت أفتح الميكرويف(معلش احنا برجوازيين في الحتة دي) ألاقيه بيسمعني حتة من موال" أنا ملاك بجناحات والباقيين ولاد كلب كفرة"؟!!!

Foxology said...

يادى النيلة هو فى الشارع وفى المواصلات وهنا كمان

ايه يا باشا انت كدة هتخللى الناس تهج منك :))

تحياتى :)

مدحت محمد said...

الاغنية دى مش عارف علقت معايا ليه بجد

سمر الشافعى said...

ياساتر يارب دا اغنيه كئيبه كئاااااابه ولا البنى ادم اللى المفروض انه بيغنى دا صوته اعوذ بالله السميع العليم والمصيبه مش عارفه ليه كل الناس مشغلاها فى كل حته اروحها ومش عارفه ايه اللى بيبص فجاه فالمرايه سبحان الله لقاه كبر وخلاص بيودع (قولو ان شاء الله) ونهايته قربت

عباس العبد said...

ملكة
الأغنية دى من كتر ما حولت حياتى لجحيم , كل الناس مشغلاها
تخيلى راكب مع بنت صديقتى قالتلى حسمعك اغنية اوريونتال
و شغلتها من ال-أى بود
i-pod
تخيلى عبد الباسط حمودة , متسجل على أى-بود
يا فرحته انه وصل لل-أى بود
===
فوكسولوجى
الأغنية فى كل حتة
مش حتبقى ليه على المدونات؟
===
مدحت
منورنى
علقت معاك ؟؟؟
===
سمر الشافعى
ان شالله

karakib said...

انا عاجبني اوي كلمات الاغنية دي و سيبك من انه عبد الباسط هو اللي مغنيها لكن فعلا كلماتها حلوه لو سمعتها و ركزت فيها

حداويت said...

الاغنية دي حلوة .. اغنية شعبية بجد .. عبد الباسط بقى خبرة برضه..

abderrahman said...

زي سعيد صالح لما كان بيقول انا كان معايا ورنيت الجرس ودرستلي
:)
بس أغنية كئيبة
محمود الليثي أحسن

Alkomi said...

على فكرة بقى الاغنية دي خرة و زفت و طين

و كمان العبد و الشيطان

ايه القرف ده يا رامز

الناس دي من غلبها و قلة حياتها الفنية بتجيب كلام الحكم و المواعظ اللي مافيهوش مناقشة و تغنيه

انا كنت كاتب موضوع عندي اسمه البيسو كنّي عن الناس اللي بتسمع الموسيقى و الاغاني من النوعية دي

ابقى شوفه كدة

إنتظارات شاهقة said...

حسبى اللة ونعم الوكيل فى الاغنية دى
فى كل حتة وتخرج من ميكروباص تلاقى التاكسى مشغلها ويا سلام على الموتوسيكلات الصينى
مسستمة على الاغنية دى
علشان الهارمونى
والموبيلات الصينى
تقريبا عبد الباسط اصلة صينى صينى يعنى ما بيكسرش
انا متهيقلى لو فتحت بيبسى هلاقى عبد
الباسط جوة بيفور دمها
وفى المدونات كمان
دة سرة باتع بقى
وواصل اوى
تقبل مرورى الاول

ذو النون المصري said...

انا باستغرب فعلا علي انتشارها الشديد جدا
حتي بياعين الجيلاتي في الشارع علي العربيات الجر مشغلينها ليل نهار
و بياعين الاشرطه الغنائيه
مبقاش فاضل في مصر حد غير السلافيين بياعين شرائط الدروس و الخطب هما بس اللي مباعوهاش بس اكيد سمعوها

جبهة التهييس الشعبية said...

انت فين ايها الابن البار؟
وفين البار؟
حطيت مكانه بيبسي؟

مهندس مسلم said...

الاغنية دي احد الحاجات اللي بتثبت ان فيلم الكيف فيلم عبقري بجد
شوف من كام سنه ربط بين لمخدرات والاغاني اللي مالهاش هدف

فاكر سواق التاكس في اول الفيلم وهو بيرد على يحي الفخراني تعليقا على اغنيه بيقولوا
انا كان راي كده برضه اول ما سمعتها بس بعد كام مره اتعودت عليها وكييفتني

سترك يا رب

مصطفى ابراهيم said...
This comment has been removed by the author.
مصطفى ابراهيم said...

الحقيقة انا مش فى ام الدنيا ومسمعتش حد مشغل الاغنية فى الاتوبيس ولا فى القهوة و لا فى سوق الخضار , بس لما شفت فيلم الفرح سمعت الاغنية فى مشهد فى الفيلم و عجبتنى جدا خصوصا انها كانت ماشية مع نسق الفيلم و قصته, بعدين الناس فيما يعشقون مذاهب , اكيد اذواق الناس مختلفة بس ده ميعنيش ان اللى يختلف معايا فى التذوق يبقى حمار بديل و انا بس اللى احتكر التذوق كله لنفسى, و شكرا على كلمات الاغنية المعبرة

مروان السيد محمود said...

انا شايف فى الاغنية دى هم وجودى شبيه بهم جان بول سارتر بس بكلمات شعبية غاية فى القسوة مع ودا فى رايى نقلة نوعية فى كلمات الاغنية الشعبية وعليك من كمية الكابة الى موجودة فى الاغنية المغنى ما بيشتكيش من فقر ولا قلة حيلة هو بس مصدوم من الشخص الى واقف قدامه فى المراية