Saturday, July 05, 2008

أحيه يعنى بجد

-1-

عرفت الى قالوه على صاحبك ؟

قالوا  ايه ؟

مش حقولك .

طيب صاحبى مين ؟

مش حقدر اقولك .

طيب مين الى قال ؟

مقدرش اقول على أسمائهم .

طيب بتقوليلى ليه ؟

علشان لازم تعرف .

أعرف ايه ؟

اكيد مش ححكيلك لأنهم حلفونى .

حلفوكى على ؟

انى مقلكش .

طيب بتقوليلى ليه ؟

علشان ده صاحبك .

---

حصل موقف عندنا جامد جداً .

حصل ايه يا بنتى ؟

مشاكل فى البيت و ناس زعلت من ناس و انا مخنوقة .

حصل ايه ؟

مش ححكيلك .

ليه مش حتحكى ؟

علشان دى اسرار بيوت .

طيب خلاص مش عايز اعرف و بلاش تحكى

يعنى ايه مش عايز تعرف ؟ , بقولك مخنوقة و انت صاحبى و لازم احكيلك.

طيب احكى

لأ مش حينفع , دى اسرار بيوت .

---

هو يستاهل ضرب النار و الجزم , انه كان مصاحب بنت زى دى . 3 شهور مش فاهم و لا كلمة و بيشتكيلى انه بيسمع طلاسم من دى يومياً . و لما قرر يسيبها علشان اتخَنق خلاص و كلّمها و قال لها ان القصة خلصت , تتهمه بأن " انت غامض و غريب و كلامك مش مفهوم لأنه مفيش سبب يخلينا نسيب بعض " , و كمان تعمله مشكلة مع أهله .

--

أحيه يعنى . يلعن ابو البنات الى بشكل ده .

=========

-2-

المسيرى مات , الله يرحمه و يرحمنا جميعاً .

لكن عايز افهم نقطة واحدة فى قصة المسيرى و المدونات , لقيت مدونات بكل برود كاتبه " صدمة وفاة المسيرى , مفاجأة وفاة المسيرى , فاجعة وفاة المسيرى " ...

هو المسيرى مثلاً كان " خالد و مطوّل و حيعيش لأخر يوم " و مرة واحدة مات على خوانه ؟ انضحك عليه مثلاً , عَقده كان يخلص 2015 , و خَمُوُه فى 7 سنين ؟؟!!!!.

ما كلنا حنموت ... صحيح المسيرى مفكر معروف , لكن كان حيموت حيموت , ايه المفاجأة و لا الصدمة فى موته ؟ انا مش عارف .

 اعرف نقول حزانى على موته , ماشى . انما صدمة و مفاجأة !!!

--

أحيه يعنى . هو كله بيظيط دلوقتى ؟ , و محدش فاهم حاجة .

=========

 -3-

راجع من أسكندرية تعبان جداً , وصلت الصبح الساعة 7 و نص . قررت أروح البنك علشان ادفع الفيزا بسبب الجواب الى بعتهولى , وصلت الساعة 8 و نص , و قفت تالت واحد عند الشباك , لما وصلت للشباك مكنتش قادر خلاص .

 الراجل الى شغال بوّش أمه التِنح , بيرد علىّ بكل برود : حضرتك جى تعمل ايه ؟

رديت على بواخة ابوه الّى طافحة فى نبرة صوته : جى اسدد الفيزا .

ضحك بخنقنة كده , و فتح الكمبيوتر على البيانات بتاعتى و قاللى بكل سذاجة : حضرتك جى بدرى ليه ؟ ده ميعادك يوم 16 و انهاردة 3 فى الشهر .

كتمت غيظى و تفافتى الى كانت حتنط على وش امه و رديت : انتم مش بعتولى جواب و قولتولى لازم أسدد فى ميعاد أقصاه 3 فى الشهر ؟

ضحك ضحكة طويلة بعد ما خلصها حسيت ان مرارتى طارت منى و قاللى : أأااااااااه , معلهش يا بشمهندس , هههههههه , هو جالك الجواب ده ؟ , دى جوابات طلعت غلط , و بعدين انت عارف ان ميعادك يوم 16 , فالمفروض تيجى يوم 16 .

قلته و انا بموت من التعب و الخنقة : خلاص مش مشكلة حسدد دلوقتى .

لأ , تعالى يوم 16 .

لأ , حسدد دلوقتى .

لأ , هههههههه , تعالى يوم 16 .

أتنرفزت جداً و صرخت فى وشه الى عايز ضرب الجزم : ما تخلص , انت حتهرج معايا ؟

--

أحيه يعنى , ناقصه هى هبل ميتين ابوهم على الصبح , يلعن ابو البنوك على أبو الناس الى بالشكل ده .

=========

-4-

ادى ام الجوازة باظت .

و البنت و الولد , قرب يجيلهم  ذهول كامل و ذُهان و غثيان و حالة هذيان و تخلف عقلى و انهيار عصبى من الصدمة , محدش فاهم منهم هم الأتنين لحد دلوقتى سبب بوظان الجوازة .

احيه يعنى , علشان ولاد البهايم  الى بوظوها ينبسطم ,

يا ولاد الكلب يا بعدا .

========

-5-

اسبوع زفت تمام .

اما عن حالتى النفسية , فأحب اطمنكم على , انا تمام جداً و الحمد لله ,

معنوياتى ارتفعت كتير اخر يومين , من زبالة بقت خرى , بس .

---

و حتى تكتمل الأبعاد الأسطورية للأيام بنت الكلب دى , تنصحنى إحداهم لكى أريح أعصابى , بأن أشاهد مسلسل اسمه " نور " و لا مش عارف ايه . إيه المسلسل ابن الهبلة ده ؟

حد يفهمنى ؟

البنت مش حينفع تفهمنى لسبب بسيط جداً , انى سَبّيت لها ميت ملة و خسرتها للأبد .

ممكن حد يفهمنى ايه المسلسل ابن الهبلة ده ؟

احيه يعنى . هو فى هبل كده ؟

=========

 

 

13 comments:

^ H@fSS@^ said...

مسلسل نور ده يا خويا هو اللي كل البيوت العربية شغالة عليه دلوقتي
خنقة خنقة خنقة
و بزيادة امي اشتركت في القناة المخصصة لها هو بس
تخيل
24 ساعة بنتفرج على نور و جوز نور واهل نور و عيشتها كلها
لما اتفقعت
انا اصلا مش بحب المسلسلات
وده كام حلقة؟؟
159 يمكن حلقة
والله ما فاكرة
و عامل قلبان ابن ستين كلب في البيوت العربية
رجالة كتار طلقوا ستاتهم بسبب حبهم لجوز نور يقبرني بحلاوته

لكن بالنسبة لبنكك
احب اعرف انهي بنك ده
لان الفيزا ممكن تتدفع في اي يوم
لكن هو تلاقيه بيعمل كده عشان كل يوم يعدي يتاخد عليه فايدة و يبان في الريبورتات الشهرية انه فيه حركة في كرت الفيزا و ده بيرفع اسهم الشركة و اسهم كل البنوك المشتركين معاها
معلش انا كنت في بنك وسخ و عارفة الحركات دي كويس اوي
بعد كده لو قالك لازم تستنى ليوم كذا قله حبلغ عنكم البوليس ومصلحة الضرايب و اي حاجة ليها علاقة بسوق المال و جرس اهاليهم
هما البنوك مش بيجووا غير كده
معلش اسالني انا كنت بشتغل في بنك وسخ و عارفة حركاتهم دي كويس
و لما سبتهم قال ايه
عملوها فيه
لكن على مين
فضحتهم و جرستهم قدام الكلاينتس التانيين فسكتوا خالص
حاكم انا متتبلش في بقي فولة
بس خلاص

Anonymous said...

شعب جبلة
على فكرة نور هايبتدى من الاول تانى من اول شهر سبعة و بكده يبقى ماحدش فلت من المسلسل

boshra mohamed said...

امشى فى الشارع اتكعبل فى عبد الباسط .. امشى فى النت اتكعبل فى نور .. قلت اجى عند رامز حبيبى اللى بقالى كتير مازورتوش اقوم الاقى نور وعبد الباسط مشرفين هنا كمان .. ليه بس كده ياعبس
:}
مش ناقص غير بوست كمان على شريف مدكور عشان تبقى كملت
:}

Unknown said...

اذا فعلا حابب تعرف عن مسلسل نور ولا سنوات الضياع تقدر تقرا البوست ده عندي وهتعرف كتيييير عنهم

http://nostaliga.blogspot.com/2008/07/blog-post_04.html

اما بالنسبة لوفاة المسيري فهناك التباس ما
انا واحد من الناس الي قالت اني فجعت وانصعقت في وفاة المسيري
رغم يقيني انو ميت مثل ما انا وانت ميتين
وده لسببين

ان الموت في حد ذاته فجيعة مصدمة لاي احد كان،فلو لا سمح الله صحيت اليوم وفوجئت باحد اصدقائك قد مات الن تنصدم؟؟والن تفجع؟؟
رغم يقينك انه في يوم ما سيموت

والسبب الثاني في صدمتنا بالمسيري
انه المسيري
فهذا الرجل لم يكن يضيع حياته هبائاً
ففي كل كلمة منه معلومة جديدة وفكرة مشعة
ونحن في امس الحاجة لرجل كهاذا لشعوب منكوبة في عقلها

بخاطرك

bluestone said...

طيب انا حقولك على الحل
بس مش هقدر اقولك
عشان هما محلفني على الايمنات ما اقولكش

بس ما اقولكش
حاجة كويسة كويسة

بلاش تتفرج على نور
هات من الاخر واتفرج على تامر امين
ده بقى بيحرق الاعصاب لحد ما بتسييح خالص فبيجيلك حالة تناحة

حداويت said...

هو بلدكم مافيهاش حشيش و لا مؤاخذة ؟
و الا انت نظامك ايه ؟

محمد حلمي مخلوف said...

و حتى تكتمل الأبعاد الأسطورية للأيام بنت الكلب دى , تنصحنى إحداهم لكى
اولا احداهن يا سيد مش إحداهم
بس هعديها المره دي
بالنسبه لمسلسل نور فده مسلسل ابن بايخه وممل وبيمشي بسرعة 6 سلحفاة
علي فكره انت لسانك طويل شويه
بس عاجبني معندكش خطوط حمراء ودي احلي حاجه فيك

nourita said...

Im not a great soap opera fun, but I can understand why people get attached to them

It comes to mean beauty, love, wealth, fashion… any thing that they ‘re missing in reality

It is an escape from the ugliness that is surrounding their living ….a window to dreams

be well Ramez, people are what they are you cannot change them

ana these days I am in the aheh sate but towards myself

عباس العبد said...

حفصة
لا مسلسل و لا مسلسلش , انا مش طايق نفسى
كله فى الجريب فروت و كله عصير قصب
انا سبتلهم ميت ملة , بعد ما على صوتى , و جالى واحد محترم , و قلتله ان البنى ادم ده بيهرج معايا .
بجد فى ناس فاكره ان دمها خفيف و بتسخف نفسها , معلهش مفيش مشكلة نستحملها , كل واحد عايز يهرج و يخنق علينا نستحمله , ما جايز ابقى انا رخم على حد تانى .
انما انا اول مرة اشوف حد يهزر فى الشغل , ده رايح يشتغل و لا يستخف دمه , ناس تجيب العلة .
--
بسطاويسى
منورنى , و ربنا يستر من المسلسلات دى
--
بحب السيما
ما هو انا قلت متخنقش لوحدى , عبد الباسط ملا مصر , و مسلسل نور ملا الدنيا , مبقاش فاضل غير مكان واحد موصلوش ليه , المدونات , قلت بس الناس خنقتنى , يبقى لازم اطلع غضبى , معهلش هى جت فيك بقى , ربنا يسامحنى .
--

عباس العبد said...

المنفى
انا مقصدكش انت طبعاً و بالذات , معاك حق فى ان لو واحد صاحبى صحيت الصبح و لقتيه مات حتبقى صدمة , و ده حصل معايا لما زوجة صديق عمرى توفت و هى أصغر منى ب4 سنين , مكملتش 26 سنة . بس ده صاحبى و اكل شارب معاه ,
انما المسيرى كان عنده سرطان , 70 سنة , مشاكل فى المعدة , و ملقاش علاج كويس , يعنى بالنسبة لى على الأقل مش صدمة , انا لا أقصد اى أستهانة بالرجل علشان متفهمنيش غلط , الراجل مفكر عظيم , بس وفاته مش صدمة بالنسبة لى على الأقل , سامحنى , احنا مختلفين فى النقطة دى . و الخلاف لا يفسد للود قضية
حقرا اللينكات بتاعة مسلسل نور و حرد عليك .
--
بلو
فاكره الشخص الى كلمتك عليه الى كان بيحكيلى قصص مشابهه , مصدقتش صاحبى و هو بيحكيلى عن خطيبته , بنت الرفدى عملتله مشكلة مع أهله .
--
حداويت
اكيد فيها , بس انا للأسف مليش فيه .
--
محمد حلمى مخلوف
انا لى الشرف ان اديب زيك و كاتب حقيقى يصلحلى خطأ لغوى , منورنى
لأ عندى خطوط حمرا طبعاً , بس احمر فاتح شوية و فمش باينة شوية .
هههههه
--
نوريتا
منورانى , و ربنا يخرجك من حالة الأحيه الى انتى فيها
و انت ليكى حق الواحد ميحرقش دمه , الناس
حتفضل زى ما هى , و محدش حيتغير .

أبوفارس said...

سيبك أنت أغنيه
Youssou N'Dour
اللى على السايد بار دى تحفه
..روق وخدلك سطل خروب
تحياتى..خالد

Moon-baby said...

ايه يا رامز البوست اللي فيها 600 الف شتيمة دي :)...روّق كدة

بالنسبة بقى لمسلسل نور..هي صحيح القصة عادية خالص عاملة زي اي مسلسل عربي تعبان..و رتم الاحداث بطييييء

بسسس

انا لما باتفرج عليه نفسي بتتفتح...اولا مناظر طبيعية جميلة جدا و تصميمات البيوت و الفنادق و الملابس الخ...فيها حس فني عالي...و الموسيقى اللي هي
sound tracks
جامدة جدا

زائد انها دعاية لتركيا جامدة اوي...يا حسرة علينا !

و على فكرة..كون ان مسلسل نور تسبب في طلاق الناس و مشاكل زوجية ده شيء مش و حش...ده كدة خدمهم في انهم يشوفوا ان الزواج الشرقي منظومة فاشلة اصلا...كون ان مسلسل او ممثل ( مهند) يتسبب في طلاق امراة من زوجها ده شيء يدل على هشاشة العلاقة الزوجية

بالنسبة لاصحابك اللي بيحبوا بعض و اهلهم فشكلوا الموضوع فحرام ان اتنين واخدين بعض عن حب في الزمن المهبب ده انهم يتخلوا عن بعض بسبب اهلهم
:((...هي حياة واحدة اللي هيعيشوها..فعيشوها بمزاجهم و ميخلوش حد يتسبب في تعاستهم ...كلمة ظروف و نصيب دول اعذار للضعفاء

Have a nice day.

سالي محمد said...

بوست حلو اوى بجد ومسلسل نور هو احد المسلسلات اللى بيكون فيها واد زى القمر وبنت مجروحه فكل البيوت المصرية بتموووت فيه
انا اختى بتحكيهولى حلقة بحلقة مع انى بكرهه بس من كتر ماهيا بتحبه بتحب انها تقولى الل حصل عشان بس تشوف المصايب