ليس دفاعاً عن رمضان !

من سنتين كنت اكتب فى احدى المنتديات , و كتبت موضوع عن رمضان و ذكرت انى كنت راجع فى يوم و عديت على عم احمد اهم بائع طرشى بلدى فى مصر و الشرق الأوسط , و رجعت البيت و فتحت الكيس و اتغديت ... عادى

دخل واحد و علق بغضب و أتهمنى " بأنى فاطر !!! " و املك من الصفاقة انى " اجاهر بأفطارى " و مش مكسوف و أنى بدل ما دارى نفسى " فخور قوى و انا بكتب الكلام ده ...

رديت عليه و قلتله :

فى آية فى القرآن بتقول " كتب عليكم الصيام كما كتب على اللذين من قبلكم "

انا بقى يا ولدى "اللذين من قبلكم " ...

---

انا بحب رمضان ... صحيح انه لا يمثل لى بالطبيعة اى تجربة روحية ... لكن انا بحب رمضان .

--

طبعاً ممكن نتكلم عن فوائد الصيام سواء الروحية او النفسية أو الجسدية لكن انا حكلمكم عن فائدة تانية خالص تخص الصيام برضه ..

زمان و انا صغير .. كنت بستنى رمضان علشان الأعلانات .. كان لسه الدش مظهرش .. و كانت أعلانات طارق نور دمها خفيف و زى العسل ...

زا زبادى زا زبادى .. جهينة .. جهينة , كل علبة فيها زبادى , يلا حط من ده على دى ... عايزك تحط من ده !!!.

 فاكرين الحاجات دى طبعاً . كانت الأعلانات دمها خفيف و كنت بحبها و مكنتش بحس ان فى أى أنتهاك لأى حاجة . لكن السنة دى بقيت مخنوق من الأعلانات .. أعلانات فيها أنتهاك رسمى لل" صيام " .. صحيح أن " صيام رمضان " ما يخصنيش .  بس مهما كان أنا بصوم , لينا صيام و بصومه و محبش حد ينتهكه و اللى مقبلوش على صيامى مقبلوش على صيام غيرى , و حكاية انتهاك الصيام دى مجننانى لأنه مهما كان نوع الصيام او الصائمين فهو فى الأخر يظل صيام  ..

--

أعلان " كاريير للتكييف "

للأسف مش لاقى الأعلان على اليوتيوب ... بس هو جايب أسرة قرفانة و حرانة و بينها و بين بعض مشاكل نتيجة " الصيام فى الحر " ... و بعد كده ييجى التكييف و يصلح كل حاجة  و بينهى الأعلان بجملة بتقول " و احنا كلنا بنشكرك كاريير الى خلا الصيام سهل السنة دى " !!!! .

--

أما الأعلان الى رفع ضغط دمى رغم انى مش صايم رمضان هو الأعلان التالى لكريم عبد العزيز ... أعلان عن " احدى المشروبات الغازية " ل" كريم عبد العزيز " . 

 

 

-

واخد بالك

ليلى شعير بتقول : الصيام السنة دى tres difficile  . ( صعب قوى ) .

و البنت بتقول : oh no  .. الجو مش gentille خالص . ( لطيف ) .

و طبعاً الكوكاكولا هى اللى حتنقذ الصيام  !!!! .  

--

و كل عام و أنتم بخير

أففف ... انا تعبان قوى , التدوين فى الصيام tres fatiguant   . ( مرهق جداً ) .

============

ملحوظة جانبية :

الدويقة و اللى منها ..

أى حد حيفتح بقه و يقول :

ده انتقام ربنا , او ليه ربنا بيعمل معاهم كده ؟ , او هم يستاهلوا علشان بيبنوا من غير تراخيص على حتة ما ينفعش عليها البناء , او دول عشوائيات و طبيعى يحصل كده , او ربنا عايز كده . او الأخوة بتوع الحكومة سبب كل المصايب ,  أو ان ده بسبب فساد الحكومة و الحكومة مقصرة , او الأخوة بتوع الشرطة و ان الشرطة هى المقصرة  . حديله على بوزه

لازم نستنى لغاية ما نفهم سبب الأنهيار و هل هو قابل للتكرار ؟ , و ايه نظام هضبة المقطم كلها برضه ؟ . كله لازم يتفهم جيولوجياً و بالعلم لأننا داخلين على كارثة بشرية و قومية و سكانية .  انما الفتاوى و الهجايص و لازم نلاقى حد يشيل المصيبة ..  ربنا و الحكومة و الشرطة , و نبسمل و نحوقل و القصة تنتهى , من غير ما نفهمها علمياً .

هل هى الطبيعة الصخرية للمنطقة و لا نتيجة المبانى و لا المياه الجوفية و لا نتيجة تدخل بشرى خاطىء و لا أيه بالظبط ؟ لأنها مش ناقصة غباء فعلاً ... و إلا ساعتها حيبقى بتوع التكييف و الكوكاكولا ليهم حق و حيبقى الصيام السنة دى tres difficile  و اللى حصل فى الدويقة ده مش gentille  خالص . و علشان نزيح الكارثة عنهم لازم الحكومة المسئولة تدي لكل واحد جهاز تكييف و ازازة كوكاكولا !!! .

---