Sunday, September 07, 2008

ليس دفاعاً عن رمضان !

من سنتين كنت اكتب فى احدى المنتديات , و كتبت موضوع عن رمضان و ذكرت انى كنت راجع فى يوم و عديت على عم احمد اهم بائع طرشى بلدى فى مصر و الشرق الأوسط , و رجعت البيت و فتحت الكيس و اتغديت ... عادى

دخل واحد و علق بغضب و أتهمنى " بأنى فاطر !!! " و املك من الصفاقة انى " اجاهر بأفطارى " و مش مكسوف و أنى بدل ما دارى نفسى " فخور قوى و انا بكتب الكلام ده ...

رديت عليه و قلتله :

فى آية فى القرآن بتقول " كتب عليكم الصيام كما كتب على اللذين من قبلكم "

انا بقى يا ولدى "اللذين من قبلكم " ...

---

انا بحب رمضان ... صحيح انه لا يمثل لى بالطبيعة اى تجربة روحية ... لكن انا بحب رمضان .

--

طبعاً ممكن نتكلم عن فوائد الصيام سواء الروحية او النفسية أو الجسدية لكن انا حكلمكم عن فائدة تانية خالص تخص الصيام برضه ..

زمان و انا صغير .. كنت بستنى رمضان علشان الأعلانات .. كان لسه الدش مظهرش .. و كانت أعلانات طارق نور دمها خفيف و زى العسل ...

زا زبادى زا زبادى .. جهينة .. جهينة , كل علبة فيها زبادى , يلا حط من ده على دى ... عايزك تحط من ده !!!.

 فاكرين الحاجات دى طبعاً . كانت الأعلانات دمها خفيف و كنت بحبها و مكنتش بحس ان فى أى أنتهاك لأى حاجة . لكن السنة دى بقيت مخنوق من الأعلانات .. أعلانات فيها أنتهاك رسمى لل" صيام " .. صحيح أن " صيام رمضان " ما يخصنيش .  بس مهما كان أنا بصوم , لينا صيام و بصومه و محبش حد ينتهكه و اللى مقبلوش على صيامى مقبلوش على صيام غيرى , و حكاية انتهاك الصيام دى مجننانى لأنه مهما كان نوع الصيام او الصائمين فهو فى الأخر يظل صيام  ..

--

أعلان " كاريير للتكييف "

للأسف مش لاقى الأعلان على اليوتيوب ... بس هو جايب أسرة قرفانة و حرانة و بينها و بين بعض مشاكل نتيجة " الصيام فى الحر " ... و بعد كده ييجى التكييف و يصلح كل حاجة  و بينهى الأعلان بجملة بتقول " و احنا كلنا بنشكرك كاريير الى خلا الصيام سهل السنة دى " !!!! .

--

أما الأعلان الى رفع ضغط دمى رغم انى مش صايم رمضان هو الأعلان التالى لكريم عبد العزيز ... أعلان عن " احدى المشروبات الغازية " ل" كريم عبد العزيز " . 



 

 

-

واخد بالك

ليلى شعير بتقول : الصيام السنة دى tres difficile  . ( صعب قوى ) .

و البنت بتقول : oh no  .. الجو مش gentille خالص . ( لطيف ) .

و طبعاً الكوكاكولا هى اللى حتنقذ الصيام  !!!! .  

--

و كل عام و أنتم بخير

أففف ... انا تعبان قوى , التدوين فى الصيام tres fatiguant   . ( مرهق جداً ) .

============

ملحوظة جانبية :

الدويقة و اللى منها ..

أى حد حيفتح بقه و يقول :

ده انتقام ربنا , او ليه ربنا بيعمل معاهم كده ؟ , او هم يستاهلوا علشان بيبنوا من غير تراخيص على حتة ما ينفعش عليها البناء , او دول عشوائيات و طبيعى يحصل كده , او ربنا عايز كده . او الأخوة بتوع الحكومة سبب كل المصايب ,  أو ان ده بسبب فساد الحكومة و الحكومة مقصرة , او الأخوة بتوع الشرطة و ان الشرطة هى المقصرة  . حديله على بوزه

لازم نستنى لغاية ما نفهم سبب الأنهيار و هل هو قابل للتكرار ؟ , و ايه نظام هضبة المقطم كلها برضه ؟ . كله لازم يتفهم جيولوجياً و بالعلم لأننا داخلين على كارثة بشرية و قومية و سكانية .  انما الفتاوى و الهجايص و لازم نلاقى حد يشيل المصيبة ..  ربنا و الحكومة و الشرطة , و نبسمل و نحوقل و القصة تنتهى , من غير ما نفهمها علمياً .

هل هى الطبيعة الصخرية للمنطقة و لا نتيجة المبانى و لا المياه الجوفية و لا نتيجة تدخل بشرى خاطىء و لا أيه بالظبط ؟ لأنها مش ناقصة غباء فعلاً ... و إلا ساعتها حيبقى بتوع التكييف و الكوكاكولا ليهم حق و حيبقى الصيام السنة دى tres difficile  و اللى حصل فى الدويقة ده مش gentille  خالص . و علشان نزيح الكارثة عنهم لازم الحكومة المسئولة تدي لكل واحد جهاز تكييف و ازازة كوكاكولا !!! .

---

 

25 comments:

مهندس مصري بيحب مصر said...

طيب و ايه تعليقك على الشقق اللي كانت مبنية جنبهم بتاعة سوزان و اللي المفروض تتوزع عليهم من السنة اللي فاتت و فضلت فاضية و محجوزة للمحاسيب ؟

... said...

كلامك عن ذكرياتك عن الصيام أحلي من الكوكاكولا
:D
امبارج سمعت مسئول مش فاكراه في تسعين دقيقة بيقول ان السبب آدمي مش قضاء وقدر
بمعني
إن المجاري والصرف الصحي بوشوا الجبل
دة علي أساس إن شعب الدويقة مجاريه عبارة عن كونسنتراتد أسيدز

خلاص حسموها

TAFATEFO said...

موضوع الاعلانات ده أنا أحسدك عليه بصراحه

أنا مش بطيق أتفرج على الاعلانات .. علشان كده بسجل كل البرامج اللي بتابعها وأشوفها بعدين .. ما عدا البرامج الحواريه .. اللي فواصل الاعلانات فيها برضه مبتفرجش .. بعمل شاي .. بجيب مياه .. كده
ده حتى مسلسلات رمضان .. باجي بعد رمضان علطول وأنزلها كلها من على رابيد شير .. وأتفرج على اللي أتفرج عليه براحتي.

TAFATEFO said...

بالنسبه لحادث الدويقة .. معاك حق في كل اللي قلته .. بس في نقطة غائبة

ان طبيعة المنطقة العشوائية (وعدم إخلاء السكان منها منذ فترة وتسكينهم في المساكن الجديدة رغم صدور قرار بذلك.. والقرار السابق والذي تم التباطؤ في تنفيذه بإزالة أجزاء من الصخور نتيجة لتكرر تساقط بعض الكتل الصخرية دون حدوث ضحايا كبيرة).(إن صدقت التقارير الإخبارية التي نقلت هذه الأنباء)

لا أحد يلقي اللوم على انهيار الكتل الصخرية .. فهي كل في الأحوال قدر
لكن .. كون تكرر الحادثة .. ووجود الخطر .. وعدم حماية الناس منه رغم اتخاذ قرار بذلك .. و------------ .. كل هذا يلقي باللوم على الحكومة .. فهي المسئولة عن حماية أرواح المواطنين .. وأي تقاعس عن أداء هذا الدور يحملها مسؤولية الاشتراك في ازهاق أرواح المواطنين بالامتناع السلبي.

TAFATEFO said...

أقصد الامتناع والسلبية في اتخاذ تدابير تكفل حماية هؤلاء المواطنين ضحايا الحادث

بنت القمر said...

كريم عبد العزيز حقنه
ودمه يلطش وليس بالبياض يكون الرجل ظريفا:((
الاعلان مستفز
قريبتي الكبيره سنا قالت ده انتقام ورساله من ربنا عشان الناس تتقي ربنا
لسعتني الكلمه زي سلك الكهربا
رساله من ربنا لدول!! علي اساس اننا احنا بقا الملايكه اللي بترفرف وهم مرتكبي المفاسد والشرور؟؟!! الفقراء يعني.. علي فكر ة بيقولك المفتي قال ان سوزان تميم شهيده عشان ماتت بدون زنب والقتل كبيره بعد الشرك
لكن بتوع العبارة مش شهداء عشان طماعين اعتقد انه في ناس كتير كده لازم تاخد علي بوزها.. رغم يقيني انها ممكن تكون عند الله احسن مننا
كل رمضان وانت يخير

زمان الوصل said...

فعلا إعلان "كوكاكولا" رخممممممممممممم .. لأ و مش كفايه "كريم" بثقل ظلّه جايبين معاه طقم يكرّه بلد فى "الكوكا" و اليوم اللىّ سمع اسمها فيه !! حد يجيب "ليلى شعير" فى إعلان !! دى من وهى صغيّره دمّها تقيل فما بال دلوقت !!
الإعلان اللىّ بيعجبنى إعلان "موبينيل" بتاع العيّل اللىّ بيسأل : الشبكه القديمه راحت فين و حد بيعلّق و يقول : ده عيّل رخم :))))))

أصل الحقيقه نفس السؤال جه على بالى وانا باقرا إعلان الشبكه الجديده فى الشارع !!

بخصوص موضوع الدويقه .. هل يمكن أن يكون هناك علاقه بينه و بين المشروعات الجديده التى تنشأ حاليا فى "المقطّم"؟

هشام علاء said...

باشا

اتفق معاك تماما فى موضوع انتهاك الصيام ده و عشان كده تلاقينى بقالى بتاع تلات اربع سنين بطلت اشوف مسلسلات و اعلانات رمضان اساسا لانى بحس ان فى هجوم تتارى على دماغى زى الهاك اللى بيعملوه على السرفرات بانهم يبعتوا للسيرفر رسايل كتير فى نفس الوقت فيقوم يا عينى ما يستحملش و يقع

فحرصا على دماغى فصلت كابل النتورك..اسف...المسلسلات


اما بالنسبة للدويقة و اهلها


انا اتكلمت مع صديق لى مهندس مدنى فى نفس يوم الحادث و سالته عن ازاى الناس تسكن فى سفح جبل بالشكل ده و تبنى ..اكيد هما غلطانين يعنى ففاجأنى بالرد بأن موضوع البناء و السكنى جنب الجبال ده عادى جدا و موجود فى دول كتير من العالم و لكن له احتياطات معينة و اساليب فى تامين البناء عن طريق اساليب كثير يعرفها الدارسون و من يبنى بوعى و لكن عندنا للاسف زى ما احنا عرافين اختفى الوعى و العلم فى ظروف غامضة

تحياتى

و كل صيام و انت طيب

هش

Alkomi said...

ازيك يا رامز

و لو انت برضه ذاكرتك كويسة في الاعلانات

اعلان المطبخ ابو 15 الف جنيه بس

و اعرن مدرسة الاورمان الخالد اللي اشرف عبد الباقي اتريق عليه في فيلم خالي من الكوليسترول

كلهم اخدوا فيها في المدرسة طبعا

و لو انتى بقى بوب اوي في اعلان لبنك مصر مانزلش غير مرتين بس مش هكتبه عشان للاسف بعلق و انا صايم

بالنسبة للدويقة ربنا يرحم الناس الاحياء اللي عايشين فيها و اللي في المناطق اللي شبهها لانه اكيد رحم الناس اللي راحوا منهم في الكارثة

Alkomi said...

انا فطرت و بناء عليه هاقولك الاعلان

اعلان بتاع بنك مصر طلعت باشا حرب بيفتكر ذكرياته مع البنك و في اخر الاعلان بيقف عالرصيف و يبص للبنك و يقول جملته الخالدة اللي اتفهمت غلط

انا اللي بادعك و انا اللي بانيك

بمعن الابداع و البناء

و تقع مسئولية الفهم على المستمع

و كل سنة و انت طيب يا رامز

و تعيش و تفتكر

عباس العبد said...

مهندس مصرى
رأيى من ناحية أيه ؟
انا مش فاهم السؤال , لأنه لو أنت عايز انى اقول انه فساد , فدى مش حاجة ذات أهمية لأنه فساد و أكيد انت مش مستنى رأيى فى قضية زى كده
مفيش حد مستنى رأى حد فى قضية فساد واضحة وضوح الشمس .. فأنا مش فاهم السؤال .
===
بثينة
شوفى لو القضية فى الصرف الصحى ماشى , و يتعالج ماشى .
لكن زى ما انا فهمت من الجرايد أنهاردة انه طبيعة التربة الجيولوجية هى المشكلة .
كانوا عاملين لقاء مع ميلاد حنا فى المصرى اليوم أنهاردة و قال ان فى اماكن ينفع فيها البنا و اماكن تانية لأ , لكن لأن البيوت بتتطلع عشوائية فمحدش عارف فين ينفع للبنا لأنه مبيحصلش دراسات قبل البنا . و دى مصيبة فى حد ذاتها
أنتى عارفة انه فى ناس جابوها و قالوا انهم مستغربين خدى بالك من اللى قالوه كويس :
" قالوا أنهم مستغربين ان الانهيارات حصلت متأخر ... و انهم كانوا متوقعينها من بدرى و قالوا الكلام ده من زمان "
الأغرب من كده .. لما قالوا انه خلال العشر سنين الجايين حتحصل مصيبة تانية بس فى المقطم !!!! .
بجد يا نهار اسود .
الناس غلطانة و الحكومة غلطانة , بس لازم اللى يقول رأيه يبقوا بتوع الجيولوجيا .. مش بتوع الدين و لا السياسة و لا الفكر و لا الثقافة و أكيد طبعاً زى ما أنتى متابعة أن المدونين بيعملوا تحليل للموقف ... المدونين فى مصر بقوا كل حاجة حتى انهم بقوا بتوع جيولوجيا .
ربنا يستر علينا .
===
مصطفى
منور , و يا طولة بالك
تسجل و بعدين تتفرج
يا طولة بالك
راجع كلامى مع بثيينة و انت حتفهم قصدى و حتلاقينى متشارك معاك فى الرأى

عباس العبد said...

بنت القمر
قريبتك الكبيرة دى مش هى بس , فى واحد خرج قال انهم بيبنوا عشوائيات و تقع على دماغهم و بعدين يقولوا الحكومة السبب . دى عالم بنت كلب تستاهل !!! .
كل شىء قضاء و قدر طبعاً بس عيب بقى , دا احنا وصلنا اننا بنخترع المصايب و بنوظف القضاء و القدر .
حقولك حاجة فقعت مرارتى بجد و لما قريتها حسيت أن فى ناس بنت كلب فى البلد دى و مخها فاضى و ان الدين فعلاً بقى أفيون الشعوب ,
انى حيوان اللى فى عز المصيبة و البيوت بتقع و الناس بتموت و فى ناس مفقودة و الصويت و الصراخ و الدموع و ساب كل ده و راح سئل المفتى السؤال اللى حينقذ الناس , مين الحيوان اللى راح سئل المفتى " هل اللى ماتوا فى انهيار الدويقة دول يبقوا شهداء و لا لأ ؟ " و يرد المفتى انهم " شهداء " .. ممكن أعرف اهمية السؤال ده فى التوقيت ده و حيحل و لا يربط أيه ؟
بجد اتقوا الله , اتقوا الله فى الناس و فى عقولنا ,و فى ضمايرنا عيب اللى بيحصل ده
عيب انى البس الدين عمة ال... و لا بلاش
===
زمان الوصل
الشبكة القديمة و لا راحت و لا جت
حقولك سر بس بينى و بينك أنا شغال فى احدى التوكيلات الخاصة بموبينيل , توكيل خاص بالشبكات , كل اللى حصل اننا شيلنا اجهزة الأستقبال القديمة و ركبنا جديدة .
و القديمة رجعت المخزن علشان تخش " التدوير " . بس
و لا تاكلى من الكلام ده . الأبراج هى هى و كله زى ما هو .
اجهزة جديدة و زيادة هى اللى ركبت بس كده .
===
هشام
منورنى و كل سنة و انت شايل كابل النيت-وورك
انا فعلاً قريت الكلام ده أنهاردة فى المصرى اليوم
ربنا يستر

عباس العبد said...

محمد الكومى
لأ يا برنس دى افتكاسة
أعلان طلعت حرب ده من الخيال و كلنا عارفينه من زمان
و محصلش , دى كانت اشتغالة طحن .
عايز تتضحك موت , اتفرج على تقليد إعلان كولوروكس .

Anonymous said...

رجعتنا لأيام حلوه
حتي الاعلانات كان ليها طعم زمان
الا اعلان كريم عبد العزيز
شرب الكوكا و حرج جلبي عليها يااماي
:)
بخصوص موضوع الدويقه شوف التصريحات الورديه من عينه نتعهد ان ماحدش حينام في العراء لكل متضرر خيمه
تقولك خيمه خمس نجوم
:(
كل سنه و انت طيب ياجميل

Alkomi said...

بيتهيئلي مش اشتغالة يا رامز

الا لو كان فعلا اشتغالة و عشان من زمان الواحد بقى مفكر انه جد

و تقليد الاعلان شوفته مش ده اللي كان عيال في كلية هندسة عاملينه باين

عموما لو اشتغالة يبقى كويس انها اتكشفت في بيتها

بس برضه صعبان عليا انها طلعت اشتغالة

شكلها مش كدة يا رامز

ده حتى يبقى حرام

بس ايه يعني مافتكرتش اعلان المطبخ برضه

عباس العبد said...

محمد الكومى
لأ عارف أعلان المطبغ بتاع عمرو حلمى ديزاين طبعاً بتاع الست اللى عايزه توفر .
ههههه
--
إعلان طلع حرب ده إشتغاله , اللى جامد موت موت
إعلان كلوروكس القبيح اللى بيترقوا فيه على الاعلانات
===
اجندتى
طيب ما تشوفيلى خيمة إيجار جديد و لا كل الموجود تمليك ؟
هههههه
كل سنة و انت طيبة يا جميل
===

الـسـيـدة نـون said...

بقالى فترة بقرالك كتاباتك
يمكن دى اول مرة اعلق فيها عندك

ومش عايزة اعلق على موضوع البوست
على اد ما انا عايزة اقولك
ان اسلوبك بيعجبنى

ومواضيعك اللى بتثيرها
بتعلم منها كتير

بس خلاص
سلام
اختك خيخة

Unknown said...

فاكر اعلان كولونيا خمس خمسات
البت الي واقفة وفي بقها عود بلاستيك
يغسل كموج البحر

ولا خضر خضر خضر العطاااار

واعلانات حسن عابدين الله يرحمو-سر شويبس
ولعبطي الطفولي كنت اعتقد انو ممكن حسن عابدين اخيرا يقول سر شويبس
مكنتش اعرف ادوات التشويق والاثارة بتاعت الكبار وانو مفيش سر هينقال من الاصل

ما بعرف انت فاكر الاعلانات دي ولا لاء
لانها كانت في عهد الثمانينات
في ال83 كانت اول سنة ليا في مصر بعد رحيلنا من ليبيا وكنت امام التلفزيون والاعلانات والفوازير كالبدوي الذي دخل المدينة
يالله ما احلاها مصر زمان


بمناسبة التفسير الغيبي للحوادث
والتفسير الغبي للحوادث
وبمناسبة التجربة العلمية الي بتحصل حاليا على الحدود الفرنسية السويسرية لاكتشاف نشأة الكون
حابب انك تخوض تجربة علمية تانية تتعلق بالتكنوليجا والكمبيوتر

جرب انك تنشيء مجلد جديد
folder
وسمي المجلد ده -con
هتلاقي انو الويندوز بيرفض التمسة دي للويندز

التفسير:
اعجاز ديني بحت حيث ان شركة ميكروسوفت عجزت امام قدرة الله عن تكوين مجلد بأسم كن
لان الله وحده هو الذي يقول للشيء
كن فيكون

ورمضان كريم

TAFATEFO said...

@ المنفي

لا يا راجل؟ انت بتتكلم جد ولا بتهزر؟

اعجاز ايه يا راجل؟

CON, PRN, AUX, CLOCK$, NUL, COM1, COM2, COM3, COM4, COM5, COM6, COM7, COM8, COM9, LPT1, LPT2, LPT3, LPT4, LPT5, LPT6, LPT7, LPT8, LPT9

دي وأكثر منها أسامي محجوزه

بس لو عايز تسمي فولدر con- أو أي اسم من دول ممكن

اعمل نيو فولدر .. واعمل رينيم .. في مكان الإسم دوس كليك يمين .. اختار اسنيرت يونيكود كنترول كاراكتر (آخر اختيار) .. واختار من "القائمة المنسدلة" LRM
واكتب الاسم اللي انت عايزه

New folder > Rename > right-click > insert unicode control charactr > LRM left-to-right mark

لا ليها علاقه بالإعجاز ولا البتاع يا راجل حرام عليك

TAFATEFO said...

أقصد بأسامي محجوزه انها Windows reserved device names
كانت بتستخدم كأوامر في الدوس

Unknown said...

tafatefo

انا قلت اسيب عباس يرد عليك
لاني اعتقد انو يعرفني
بس قلت بلاش العملية توسع واخد دش بهدلة من الي رايح والي جاي

انت لو راجعت تعليقي هتلاقي مصطلح
التفسير الغيبي،او الغبي

فانا جبت المثال ده عشان نشوف كمية الغباء والتخلف والجهل فينا كعرب وكمسلمين وطريقة تفسيرنا للظواهر من حولينا
مش اني معتقد بصحة الهبل ده

انا لما شفت الكلام ده في احد المنتديات العربية استغفر الله العظيم كنت هطلع من ديني
حرام عليك يا راجل

عباس العبد said...

بنت خيخة
الله يخليكى يا فندم و متشكر جداً
انتى نورتى المدونة و تشرفينى فى أى وقت
===
المنفى
طبعاً فاكر الأعلانات بس بتاع يغسل كموج البحر ده بتاع بيو كلينا
اما حكاية كن فدى قديمة
ههههههههههه
===
مصطفى
الراجل بيهزر
انت مش مركز معانا بس
===

TAFATEFO said...

أنا آسف لو كان أسلوبي كان غير لائق .. بس أصلي ازبهليت .. فالكلام طلع كده
آسف مره تانيه .. واعذرني لأني مربطتش أوي الكلام
وبعدين أنا علشان كده بدأت بسؤال حضرتك بتتكلم جد ولا بتهزر .. لأني بتابع مدونة نوستالجيا .. وعجبني أوي بوست بيرد فيه على من أساء استعمال الشعراء يتبعهم الغاوون عن محمود درويش

آسف مره تانيه

عباس العبد said...

مصطفى
لا تعتذر على شىء معملتوش
دى كانت نكتة و عدت منك عادى , مفيش داعى للأعتذار
و أنتى فى أى وقت منورنى

ست المرتفعات said...

عجبتنى التدوينة دى جدا
شكرا ع الغواية

علياء