Tuesday, December 25, 2007

نقاش

- You can’t cross the red-line

- I don’t want to cross it, I just want to move it forward a little

هذه التدوينة اهداء الى بنت القمر

..........

عن التدوينة السابقة

اجابت

بنت القمر معلقة عليها و اثارت بعض التساؤلات

و وجدت ان الموضوع اكبر من انه يكون مجرد رد فى تدوينة

فحولته الى تدوينة مستقلة

اقرأ التدوينة السابقة

و رد

بنت القمر

التالى

عباس يا عباس
ولو اني مبحبش اقرا تعليقات قبل ما اقرر انا ها اكتب اقول ايه
ولكني عملتها بص يا سيدي
ولو ان كلمه ضعيف مش مريحه وتخض انا
انا عارفه انك بتتكلم علي احساس شخصي وكلنا مهما علت درجه ايمانا بنقع في البير ده
نفسك تلحد صح؟؟
بس مش قادر ولا عارف
حاسه كده هاتموت وتلحد
زي بوست بتاع مرات صاحبك اللي ماتت
بس يا عزيزي
دي مشاعر طبيعيه بشريه
في احاديث وايات كتير انه كلما زاد ايمان الانسان زاد ترصد الشيطان له
وغوايته
واخدلي بالك انت من كلمه غوايته
ههههههههههههه
عشان يبعده
و يضله لكن هل وجد الملحدين راحتهم في عالم لا يحكمه الا الشر المطلق؟
بص
بمر بحاله كدة من فتره
يعني زي ما تقول كده حبه لسعان علي حبه تشويش
كتبت بوست ما قبل السابق اسمه هلاوس
ابقا بص عليه
وحسيت بنفس شعورك لو ربنا عاوزنا نعمل الصح بيخلينا نعمل الغلط ويزينه لينا ليه؟؟
وازاي نقاوم ؟
والغوايه من كل ناحيه والفتن من كل جهه ووقت
دي الخلاصه بتاعته لو مبصتش
المهم
لو انت بقا بتكلم عن الفداء
وشايف انه رحمه ومحبه
يمكن رحمه لابراهيم ولكن
طب يعني احنا استفدنا ايه لما عشنا وجينا من نسل ابراهيم
جينا نعاني في الحياه
ونتخانق ونقتل ونسرق ونعصي وفي الاخر نموت
ومتعذب لكن ارجع اقولك

من لا يرضي بقضائي فليهرب من تحت سمائي
احنا مش بنختار
اهو يا نرضي يا نرضي
ونعيش علي امل الجنه يا نخسر كلشي
ويبقا عليه العوض دنيا واخرة
لانه كده مفيش سكه تانيه
هبقا ارد علي التدوينه السابقه
بس وقتي ضيق حبه
تحياتي

.............

انتهى تعليق بنت القمر

وهذا ردى على ما اثارته بنت القمر

-1-

شوفى يا ستى

انتى جميل منك انك ناقشتى مش هاجمتى

فا اسمحيلى ارد

انا مش ملحد و لا عايز ابقى ملحد

لأن رفض وجود الله هو رفض لوجودى

لأن لكل شىء مصدر

سمى المصدر زى ما انتى عايزه

المسلمين و المسحيين و اليهود

سموه الله

الذى اظهر نفسه فى انبيائه

و وضع بصماته فى الخليقة \ الطبيعة

و بالتالى لا يمكن رفضه

الملحد كل الى بيعمله انه بيغير الاسم و بدل ما يقول الله

بيقول

الطبيعة ... الكون ... اى حاجة

قوة خارقة حتى

كارما او حتى اله الالهة عند الوثنيين

المهم

ان فى مصدر

و انا شخصيا مستريح لوجود الله

لأن فكرة وجود الله يحمى و يدافع و يرحم

هى ما يسمى

ماوراء الانسانية .... الطبيعة البشرية

او كل شىء يصيبك بالعجز او يهزمك

هناك من يدافع عنك

الله يحميكى و يدافع عنك

لأن الانسانية لم تنمو و لم تنضج بعد لتعتمد على نفسها

و بالتالى فهى تحتاج الى من يدافع عنها

اما الملحد فهو شخص قرر ان يكون مهزوم قبل ان يدخل المعركة حتى

شخص فشل فى ان يكون انسان

و ارتضى بمادية حيوانية تساويه بكل ما يحيط به

و ان انتصاراته هى نجاحات شخصية

هو حر .... و صح

لأن حتى من يؤمن بالله انتصاراته هى انتصارات شخصية ايضا

لا وجود لأى تدخل الهى بها

لأن كل ما يفعله اى انسان سواء مؤمن او ملحد

هى تصرفات بالكامل شخصية حرة مستقلة

لا وجود لأى قدرية او مصيرية فيها (( نبقى نتكلم فى النقطة دى بعدين )

يبقى انتهينا من النقطة دى تمام

لا انا ملحد و لا عايز ابقى ملحد

..........

الاشكال الحقيقى

هو انت مؤمن و لا لأ ؟

انا معترف بوجود الله و مستريح لوجوده

لكن هل انا مؤمن به و لا ... ؟

اقربهالك اكتر

زى الاب و الابن

مهما كان الابن عاق و فاسد و كاره ابوه و مش طايقه و مش حابب اوامره و لا نظامه

هو عارف و هو بيعمل اى مصيبة ان ابوه حيتدخل فى الوقت المناسب

علشان يلحقه

و الابن بيرتضى باى عقاب بس ينجو من المصيبة

و لو المصيبة حلت على دماغ الابن بيتهم ابوه الى هو كأبن رافضه

بيتهم ابوه بأنه قصر فى حق ولاده و ملحقهوش قبل ما يقع

و بعد ما بيرتضى بالعقاب و يسكن شوية

بيرجع لتمرده تانى و يرفض ابوه من اول و جديد

بس عارف ان مهما عمل ابوه حيلحقه

حتى لو الولد مش طايق ابوه

بس هو عارف ان ابوه موجود

فهمتى قصدى

و فهمتى الفكرة العامة

احنا كده .... ممكن نتمرد و نرفض

او حتى لا نؤمن بفعل الله فى الطبيعة

الى انتى عايزه تعرفيه

عرفتيه و لا .... ؟

انا مؤمن و لا مش مؤمن ؟

مش حقولك علشان دى حاجة شخصية

......................

-2-

اما بالنسبة للأستفادة ايه من الفداء

فممكن اقولك رغى كتير و اقولك كلام احنا كلنا عارفينه

انما العقل بيقول

لم و لن نستفيد شىء من فداء ابن ابراهيم

و اكرر العقل المادى بيقول كده

لكن العقل الدينى و الايمان مبيقولش كده طبعا

و الانسان عقل و روح \ ايمان

يعنى فى استفادة ........!!؟

الفكرة الرئيسية

هو انه الله عايز يوصل لنا مدى رحمته بعباده

و مدى حبه ليهم

حتقوليلى و لو هو عايز يرحمنا و هو بهذه الرحمة

ليه فى الاساس طلب من سيدنا ابراهيم ذبح ابنه ؟

برضه ممكن اقولك كلام كتير عن البلاء و ان الله بيختبره و بيمتحنه

و بيجربه و يشوف مدى ايمانه و مدى طاعة عبده

و هو كلام جميل على المستوى الدينى

لكن ده مش مهم

انما حقولك حاجة اهم .......... و خدى بالك متفهميهوش غلط

لأن دى النقطة الجوهرية

تفتكرى سيدنا ابراهيم كان حيفشل فى الاختبار ده ؟

السؤال بطريقة اكثر مباشرة

تفتكرى سيدنا ابراهيم كان ممكن يقول ل الله

انا مش حعمل كده و مش حدبح ابنى و مش حنفذ اوامرك

و لا كان حيوافق ..... كده كده كان حيوافق و كده كده كان ربنا حيفدى ابنه ؟

طيب هل كان الله جل جلاله ممكن فعلا يقبل بذبح ابراهيم لأبنه ؟

و ميفدهوش بكبش ؟ و لا كده كده كان حيتم فداء الابن ؟

او زى ما قلتى فى موضوع العدرا مريم

تفتكرى كانت العدرا ممكن ترفض و تقول لأ

انا مش عايزة المعجزة دى

هل الرفض من حقهم ... اه و لا لأ ؟

برضه مش حرد عليكى فى النقطة دى كمان

علشان يطول شرحها قوى

............

-3-

اما جملتك

من لا يرضي بقضائي فليهرب من تحت سمائي

فدى انا مش مستسغها و مش مستوعبها

و اى شخص مؤمن حيسكت قصادها

لانها تصدر من اله جبار متسلط بيحب تعذيب و اهانة البشر

و بيستمتع بتعذيبهم

حتروحى منى فين .... حموتكم و اتحكم فيكم و حاطط لكل واحد سيناريو

و الى مش عاجبنى حدخله النار و اولع فيه

و الله مش كده .... كلنا متفقين على انه

عادل و رحيم و محب و حليم و بالتالى من المستحيل انه يكون بالصورة الى انتى قلتيها

و لا انتى شايفه حاجة تانى

اما بالنسبة للرفض

لو عايزه ترفضى انتى حرة و محدش يقدر يقولك حاجة

حتى " حسابك " حيكون على ما تعتقديه و تؤمنى به

لأن الى ماتوا من دون انبياء و لا رسالات

ممكن تقوليلى حيخشوا الجنة و لا النار ؟

و متنسيش انه رحيم و عادل

و خدى بالك مفيش حاجة اسمها اغراءات و لا غوايات

و لا عثرات و لا شيطان و لا الكلام ده خالص بالمفهوم المادى المباشر

يعنى بأيدك كل حاجة

و انتى حرة فى ما تريدينه

سؤال

فى انسان ملحد افعال الخير الصادرة منه يعلم تماما انها بلا مقابل او ثواب

و انه يفعلها لا خوفا من نار ولا طمعا فى جنة بل حبا فى اخيه الانسان

و

انسان مؤمن افعاله صادرة كلها خوف و جبن من نهاية مأساوية و بيقوم بيها

و هو كارها و لا يطيع اى اوامر او وصايا تصدر من من يؤمن به حتى صلاته كالواجب

تفتكرى ربنا يعدل بينهم ازاى .... و بأى منطق ؟

ازاى ؟

فكره الى قاله محمد عبده بعد عودته من اوروبا

وجدت اسلام بلا مسلمين و هنا مسلمين بلا اسلام

او

الى قالته رابعة العدوية

يا رب اذا كنت اعبدك و احبك خوفا من النار فادخلنى اياها

و اذا كنت احبك و اعبدك طمعا فى جنة فاحرمنى منها

الجملة دى برضه عندنا بس بمنطوق اخر للقديس اوغوسطينوس

فهمتى قصدى

ارد

برضه مش حرد

لأن ده كلام يطول شرحه

الهدف

انى اقولك

انى مش ملحد

بل مؤمن و بشدة

لكن بفكر زيادة عن اللزوم

و عايز اوصل لمنتهى انسانيتى

عايز اوصل لنقطة النهاية

.............

فهمتى حاجة و لا انا غامض

منتظرك ردودك و نتناقش

و كل سنة و انتى طيبة

........

- You can’t cross the red-line

- I don’t want to cross it, I just want to move it forward a little

41 comments:

بنت القمر said...

ماشي دا مش نقاش ده فخ
بس عجبني
عموما الموضوع شائك
لكن مش عاوزةارد بغير يقيني وربنا يستر
مش عاوزة اكدب ولاانظر بتشديد الظاء
ولا مواعظ
الحكايه كبيره ها ارد علي كذا جزء
بس ها اكتب في كراسه الاول وبعدين اكتب تعليقي
عشان احاول ارتب لفكاري
شكرا
نخدمك في الافراح

بنت القمر said...

هابدا بمقاطع ونقط الخلاف
***************
اولا يا عزيزي
حكايه انك ملحد او مؤمن شأن خاص كنت بقولها من باب الهزار ومادام انت في نهايه النقاش وصلت الي انك مؤمن حتما يبقا جميل ومبارك عليك ايمانك انا مش بشكك ولكن ربما ان النقاش دا كله بيقع في منطقه اللعب في المحظور
في المنطقه الشائكه
بين منطقتان لا يقين فيهما
طبعا عارفهم مش ها اقولك عليهم
الايمان وللالحاد

بنت القمر said...

صح لأن حتى من يؤمن بالله انتصاراته هى انتصارات شخصية ايضا لا وجود لأى تدخل الهى بها لأن كل ما يفعله اى انسان سواء مؤمن او ملحد هى تصرفات بالكامل شخصية حرة مستقلة لا وجود لأى قدرية او مصيرية فيها (( نبقى نتكلم فى النقطة دى بعدين ) يبقى انتهينا من النقطة
*****************
اعترض جزئيه وكليه مع هذا المقطع
فلا المؤمن ولا الملحد
انتصارتهم نتيجه لاختيارتهم
ازاي؟؟؟
اولا لازم تفهمني معني الانتصار والانجاز ونتفق عليه تلانتصار الانساني نسبي ووقتي وخلافي جدا
بمعني
لو انت في وظيفه ومش عاجباك او زواج وغير سعيد فيه بس مكمل قد تبدوا ناجحا ومنتصرا في عيون الناس لكن تشعر في قرارة نفسك انك مهزوم
ولو ان اخر ترك عمل او انفصل عن زوجته ربما يصفه الناس بالفشل لكنه في قرارة نفسه ربما يعتقد انه سعيد وانه ناجح جدا
فقد اشتري خلاصه
يبقي النجاح نسبي صح؟
تانيا النجاح البشري وقتي
لما اخترعوا القنبله الذريه كان انتصار بشري ولكن بعدها دفعت البشريه تمنه ويلات ومآسي اذن الانتصار البشري قيمته مؤقته ووقتي
تالتلتا ودا الاهم
_____________-
لو عاوز تقول لي ان نجاح الانسان نتيجه مباشره لعمله وعلمه وكفاحه
اسألك انا لما اينشتاين اكتشف الجاذبيه ولا لما زويل اكتشف الفيمتو ثانيه كان نتيجه ذكاءهم فقط!!!ا
اذا كانت نسبه ذكاء زويل فوق ليفيل تسعه وهي درجه الذكاء البشري العادي المتوسط
طيب مش في برضه في الريف المصريفي نفس التوقيت يمكن 1000طفل اخر لم يصنعوا اي شيئ وطواهم النسيان
اليس يد الله من منحت زويل الذكاء وحجبته عن غيرة
الم يمنح الله له ويمهد جميع الظروف المعنويه له من مال وفرصه سفر وذكاء عشان ينجح ويبتكر ويكتشف
واخرين كل يوم المعيتهم وعبقريتهم بتطفي ويدبلوا من عدم توافر المناخ المناسب
ليه ده نجح وليه دا لا؟؟؟
متقوليش انتصار بشري للمؤمن في قوة الهيه بتختار وتنتقي من ينجح ومن ينتصر
يتبع

عباس العبد said...

كوجنبشين
كل سنة و انت طيبة و كويس يا ستى
انى جمعتهالك
و يا ريت نسمعك رأيك
.....
بنت القمر
لأ مش فخ
لأسباب كتيرة
ان الاجابات و النقاش سهل
لو حنجاوب بطريقة تقليدية
و انا مش عايز طريقة تقليدية
قليل من عبور الخطوط الحمراء

بنت القمر said...

اقربهالك اكتر زى الاب و الابن مهما كان الابن عاق و فاسد و كاره ابوه و مش طايقه و مش حابب اوامره و لا نظامه هو عارف و هو بيعمل اى مصيبة ان ابوه حيتدخل فى الوقت المناسب علشان يلحقه
******************
حكايه ان الابن وابوة وكدا برضه انا شايفه انها تنتفي ممع الايمان بفكرة الايمان التام
هاقولك ازاي
لو انت مؤمن تماما ان كل فعل الله خير ورحمه مش ها تعترض ولا تتمرد لما عربيتك تتكسر ولا صاحبك يموت او لما تمرض
لانك دايما بتريح نفسك ان في حكمه الهيه وان فعله كله خير ورحمه
لكن لما تتمرد زي ما بتقول يبقا في جزء جواك مش قادر يسلم بمشيئه ربنا
مش ممكن تعترض علي ما تعتقد انه في مصلحتك حقيقه ولا انا مش فاهمه يتبع

بنت القمر said...

كده و مش حدبح ابنى و مش حنفذ اوامرك و لا كان حيوافق ..... كده كده كان حيوافق و كده كده كان ربنا حيفدى ابنه ؟ طيب هل كان الله جل جلاله ممكن فعلا يقبل بذبح ابراهيم لأبنه ؟ و ميفدهوش بكبش ؟ و لا كده كده كان حيتم فداء الابن ؟ او زى ما قلتى فى موضوع العدرا مريم تفتكرى كانت العدرا ممكن ترفض و تقول لأ انا مش عايزة المعجزة دى هل الرفض من حقهم ... اه و لا لأ ؟ برضه مش حرد عليكى فى النقطة دى كمان علشان يطول شرحها
****************
بص بقا يا سيدي الفاضل
دي بقا اصعب نقطه في الحكايه كلها
لانك داخل علي ملعب خطير جدااااا
وهو القضاء والقدر
ازاي ها اقولك؟؟؟
تفتكر لما ربنا طلب من ابراهيم عليه السلام يدبح ابنه كان القرار في ايد ابراهيم كلية
تذكر حكايه تدخل ربنا في منح الانتصارات
يعني هل كان يملك ابراهيم يقول لا
وعشان مردش علي سؤالك بسؤال
ها اسئلك سؤال تاني
ههههههههههههه
لما ربنا خلق ادم وقال عندنا اني جاعل في لارض خليفه قالوا اتجعل فيها من يفسدفيها ويسفك الدماءونحن نسبح بحمدك قال اني اعلم ما لاتعلمون
اهي بقا اعلم ما لاتعلمون دي جواب كل القصص دي
ربنا خلقه وعارف انه ها ينزله الارض يعني حكايه التفاحه والغوايه كانت تبان ظاهريا تحصيل حاصل
لان كدا كدا هو نازل الارض القدر مكتوب سلفا
لما اختبر ابراهيم
كان ربنا عارف انه ها يجيب بشر اسمهم مسلمين من نسله بعد الالاف السنين ويعمل لهم دين ونبي ويقولهم لازم تحجوا وتدبحوا وتفتكروا ابراهيم ومحنته واختبارة
لو عاوز تفهمني ان الحكايه كانت في ايد ابراهيم وربنا سايب القرار في ايده كلية
يبقا اكيد زي ما بنقول كدا في بلان بي
ابراهيم نجح في الاختبار وامتثل لامر ربنا يبقا بلان ايه يفدي له ابنه بكبش
ولو اعترض يبقا في بلان بي ها يتعاقب ويتغير مصير البشريه اللي قلتهولك ولا يبقا في قصه فداء ولا بتاع ويتلغي فيلم المسلمين ده كله
انا عن نفسي يصعب علي ذهني تصور ان ربنا مستني اختيارنا عموما
اعتقد ان الجزء القدري والمصيري في اختيارتنا اكبر بكتيييييييير من الجزء الاختياري
ها اقولك حاجه كمان
مصير البشريه خطوطه العامه مرسومه يا عزيزي في كل الكتب السماويه قرآن وانجيل وغيرة
حروب كبري وانبياء ورسل طوافين وبراكين
مسيح يأتي اخر الزمان وغيرة
مش كل ده معد سلفا
فيلم فلسطين وحرب المسلمين واليهود وكدا وهدم المعبد
تشتيت اليهود في الارض
مش كل ده في كتابك السماوي
ولا ايه؟؟
يبقا انهي جزء بقا في الاختيار البشري
اليست احداث التاريخ مثل لعبه البازل المتراصه خلف بعضها
والمنطق البشري بيقول لو غيرت جزء ها تهدم باقي الاجزاء بالتبعيه
لو سبت للبشر حريه الاختيار يبقا التاريخ والمستقبل مش ها يكونوا معدين اصلا
طبعا انت عاوز تصرخ وتقول لا والا ربنا ها يعاقب الناس ليه لو لفعالهم واختياراته محسومه سلف؟؟
اقولك انا
يتبع

عباس العبد said...

اولا
النجاح الانسانى مطلق
لأنه يقارن ببقية المخلوقات الى هى من نفس رتبة الانسان اى
مخلوقة
اما لو قارنتى النجاح ده بالخالق
يبقى مفيش
صفر
مينفعش
و انا بتكلم على العلم و الاكتشافات و الانجازات
انتى عايزة تقارنى واحد اكتشف الفيمتو-ثانية بخالق الكون
ده فى اجحاف كونى رهيب
ثانيا
مينفعش ان كل حاجة الانسان يعملها كويسة
اختراع
اكتشاف انجاز علمى _ طبى
اى حاجة كويسة تنفع البشرية
نروح واخدينها من البنى ادم الى عملهاا و ننسبها للخالق
ليه ؟
لأن فى امر الهى مباشر بأن احنا نعمر الارض و نستخلف الله جل جلاله فيها
و بالتالى الخليفة له مطلق الحرية فى الارض
يعنى احنا البشر خليفة الله فى الارض
طبعا مع الفرق
و كمان لأن الله مش محتاج ان احنا ننسبله
اى حاجة لأنه كامل و بالتالى نسب اى حاجة اليه مش حيعمل حاجة
لأن كل حاجة فى الاخر بتاعته
لأن لو كل افعالنا منسوبة الى الله يبقى ايه لزمة الخلق و الطبيعة
دا احنا نبقى اقل من عبيد
لأنه حتى العبد بيبدع فى شغله الى مديهوله سيده
مستخسره فينا انتى شوية ابداع
خدى بالك
الى بالنسبة لينا اختراع جامد قوى و حاجة ملهاش حل
بالنسبة لله هى موجودة اساسا
فأكيد ربنا مش حيستخسر فينا شوية فرحة -- لأ افرحوا
لما تلميذ يذاكر و ينجح و يقف يقول انا تعبت و نجحت
يجى ربنا و يقله
لأ ده بتاعى انا النجاح ده
لأ حيسبه يفرح طبعا
لأنه الله مش محتاجه و لا محتاج ينسبه لنفسه
بل بالعكس
الهنا اله خير
بيوزع خيره للجميع بدون انتظار مقابل
لأنه كله بتاعه

بنت القمر said...

اقولك انا بقا رأيي
كنت مرة بقرا في سايت مسيحي بس جميل اوي
وعجبني طحن
تصدق من جماله كنت ها اغير يا اخي
هههههههه
اقولك السايت بيقول ايه
بيقولك ان واحد مش عارفه مين امبراطر ولا بتاع عاوز يعلم واحد تاني معني الله وبشرحهوله
اعتقد ابنه اكيد انت ها تعرف الاسامي لاني نسيتها
المهم قاله ممكن تعرفني معني الله او تشرحلي طبيعته قام ابوة او اعتقد يمكن كان راهب قاله ممكن بس ممكن تنقلي البحر في الحفرة دي قام الامبراطور قاله لا مش ممكن الحفره تساع البحر قام قاله ومش ممكن عقلك يساع الله كيف تضع الله اللامحدود في عقلك المحدود؟؟؟
اهي كل اللعبه بقا في الكلمتين دول
يتبع

عباس العبد said...

سيبك
من مكتوب سلفا و مقدر
احنا بنتناقش كبشر مش عارفين اى حاجة عن مستقبلهم
احنا بنتكلم عن واقعنا المجرد و افكارنا
لأن موضوع
مكتوب سلفا و مقدر
تلغى البوست ده اساسا
الله عارف كل حاجة طبعا
لأنه فوق الزمن
متلغيش التدوينة لو سمحتى

بنت القمر said...

يعني كل المشكله البشريه
في فهم تصرفات ربنا
من يمنح ومن يمنع
من يؤمن ومن لا يؤمن
قصه الفداء
ومريم وكل احداث التاريخ والجزء الاختياري البشري والقدري الالهي
كل ده مش لازم ومش ها نقدر نستوعبه بمنطق البشر
ونشغل بقا فيثاغورس وارسطو
مش ها ينفعوا
ولا يقدموا حلول
المنطق البشري والعقل المادي المحدود لا يمك تقديم اجابه لكيفيه عمل المشيئه الالهيه في فعلها او فعل البشر والتي اعتقد انا انهما شئ واحد
مفيش اجابه
ولا تفسير
غير انك تؤمن بان للاشياء بعد رابع منعرفهوش وان كون ان الاشياء نعده سلفا وان مشيئه الله رحمه وعدل وحكمه
ما تتفهمش غير بالتسليم بان الله الذي لا اشك لحظه في وجوده يتصرف بطريقه لاتستوعبها عقولنا المحدوده
وعشان نفهم
ها نكون بنحاول نعمل المستحيل
ان نضع اللامحدود دا خل المحدود ونضع البحر في حفره
فهمتني؟؟
يتبع

بنت القمر said...

اخر حاجه بقا
حكايه الرضا ومن لا يرض بقضائي فليهرب من تحت سمائي
**************
مش عاجباك ليه بقا؟؟
دي جميله جدا
اذا آمنت بكل ما سبق وارتحت له ومختلفناش كتير
يبقا قدامك ايه بقا غير انك تسلم وتسكت وتنتظر حياه اخرويه اكتر سعاده من حياتك الدنيويه
ما هو انت مزنوق عندك اله بتؤمن بيه ومش لازم ولا ينفع تعترض علي مشيئته
ولا قادر تغييرها ولا تملك فهم اليه عمل هذه المشيئه يبق ايه؟؟
تسكت وتتكتم
وتحط لسانك جوة بقك
وتقول حاضر
وتحاول تقوم نفسك وتدعي ربنا يرحمكوبعفيك من الاختبارات الصعبه زي اختبار ابراهيم
علي فكرة بيصعب عليا جدا اكتر من اسماعيل اللي رقبته كانت تحت السكينه
لانه كان في لحظه قرار وتسليم بمشيئه ربنا
ودا صعب اوي
اوي مش انك تقبل بس مشيئته لمن كمان تقول حاضر
وترضي
لانك لاتملك غير انك ترضي
فهمتني ولا اقول تاني؟؟
يتبع

عباس العبد said...

لما ربنا خلق ادم وقال عندنا اني جاعل في لارض خليفه قالوا اتجعل فيها من يفسدفيها ويسفك الدماءونحن نسبح بحمدك قال اني اعلم ما لاتعلمون
اهي بقا اعلم ما لاتعلمون دي جواب كل القصص دي
ربنا خلقه وعارف انه ها ينزله الارض يعني حكايه التفاحه والغوايه كانت تبان ظاهريا تحصيل حاصل
لان كدا كدا هو نازل الارض القدر مكتوب سلفا
....
معهلش بقى
سامحينى فى النقطة دى
لو شفتى محمد هداية امبارح مكنتيش حتقولى كده
فى تفسيره امبارح
قال
فى كثير من العلماء قالوا ان الجنة كانت على الارض و انه كان نازل على الارض
و ان خروجه من الجنة الى الارض
او نزوله الى الارض
هو نزول " منزلة " و ليس من مكان لمكان
انا عارف كل حاجة و متابع كل حاجة

بنت القمر said...

قبل السلام عليكم
**************
كل واحد لازم يلاقي لمعاناته حل ومسكن
انا عن نفسي بحاول الجا للحل ده
عشان ارتاح واكمل
انت مؤمن بشده بس بتفكر
وانا كمان بفكر
واكتر منك
مش اكترايمان لاتفكير
حكايه الغوايه دي بقا
قصصصصصه
يعني ايه بقا مفيش غوايه
مش في ابليس في كل دين
لما تقاوم غرايزك وشهواتك والشيطان يزينلك الحرام مش ده غوايه
ها تقولي ولوو قعت في الخطيئه يبق اختياري وانا اصلا اللي عوزت الغلط
اقولك لما بتكون صايم زينا انقطاعي
والجو حر الميه الساقعه قدامك
مش دي غوايه
ولا عاوز تفهمني ان بس هي نفسك البشريه هي اللي بتدفعك الي انك مثلا تفطر
او تدفعك انك تكسل تصلي او هي اللي بتزينلك تسرق او تزني
او او
يعني ايه يعني مفيش شيطان
يعني كدا انت بقا عاوز تشيل الليله لوحدك؟؟؟
بدل ما يكون في شيطان يشيل معاك البلاوي اللي عملتها
عاوز تشيل الفيلم كله وتقول اه انا بقا مسئول وغلطت بمزاجي ووعيي
عموما دا اختيارك ومنطقك بس اعتقد انه صعب اوي تظلم نفسك
مشيها الشيطان ضحك عليا
هههههههههههههه
ارحم

بنت القمر said...

اخيرا اشكرك
جدا انك ادتني فرصه
اشرككم مكنونات نفسي
ومعاميق ذاتي
يا رب اكون خفيفه علي المدونه وضيوفها واكون واضحه وبسيطه
وان كنت تعبت اوي في كدا اني مش اكون واضحه لكن بس اقدر ارتب افكاري
يا رب
اكون جاوبت كل شئ علي قد عقلي المحدووود
واكونوصلت قناعاتي بشكل وافي
كل سنه وانت طييييب

بنت القمر said...

ما اخدتش بالي الا في الاخر من ردودك المتداخله
بس دلوقت تعبت اوي وعنيا حرقتني من البص علي الشاشه ها ارد واكمل بعدين
اشكرك
بس يا ريت تقري كلامي مره تانيه بالراحه خصوصا جزء القدر وحركه التاريخ وحكايه الامبراطور
وبعدين انت بتشوف محمد هدايه ليه هاتغير؟؟وانا بقرا سايت مسيحي ربنا يستر علينا يابني !!ها نلسع قريب
ههههههههههههههههههههههه
هههههههههه
يتبع
بعدييييين

The Alien said...

for me, there is no red-line

حواركوا محترم جدا
ودا الجميل ف الموضوع

تحياتي

عباس العبد said...

شوفى يا ستى
انا حقولك وجهة نظرى كويس
فى شرح مهم مقدما كويس
الانبياء بالذات مش مختلفين عننا فى اى شىء
لكن فيهم ميزة زيادة عننا
مش تمييز خاص او قدارات خاصة او انهم من نوع اخر غيرنا
فيهم ميزة خاصة
ايه هى .... حقولهالك بس فى الاخر
خلاص
...
و بما ان مفيش اى اختلاف بينا و بينهم
فمعنى كده انهم كانوا ممكن يرفضوا
و ده مش كلامى
ده كلام علماء و مفسرين سواء مسلمين او مسيحيين
كان سيدنا ابراهيم ممكن يرفض
و كانت مريم العدرا ممكن ترفض
لأن ده حقهم
واحدة كانت ممكن تتلوث سمعنها
و الاخر جيقتل ابنه
و ساعتها محدش يقدر يلومهم
......
و فى نفس الوقت
هما كانوا عارفين ان اكيد ربنا مش حيسيبهم
و فى نفس الوقت
ربنا اختار ناس عارف انها حتوافق
و فى نفس الوقت الموضوع غير مقدر جبريا
و لكنه مقدر معرفيا
يعنى
الله بسابق معرفته لأنه فوق الزمن
لان لو كان الامر مقدر جبريا
يعنى الله اجبر سيدنا ابراهيم و العدرا على الموافقة
كان ده يتنافى مع ابسط شىء الهى الله اعطانا اياه
الحرية
الله اعطانا الحرية
و مش ممكن تكون صورية
لأن الله جل جلاله مش ممكن يقول على حاجة و تطلع مش صح
طيب ازاى ؟
حرية اختيار
اتنين ممكن يرفضوا
مفيش ضمانات
و مع ذلك وافقوا

عباس العبد said...

هنا تيجى مقولة سمعتها
و احنا كمصريين بالذات بنرددها علطول
سمعتها من راهبة الصراحة
قالت
كانت بترد على سؤال
هل كانت العدرا ممكن ترفض ؟
الراهبة
قالت طبعا ممكن ترفض و ربنا نفسه ميقدرش يقولها
ليه رفضتى و لا حتى يغلطها لكن .... و سكتت
و فضلت ساكتة
قالت ايه الراهبة
قالت الاتى
لكن ربنا عارف انها كانت حتوافق
و سكتت
و بعدين قالت
لأن الى بيحب واحد ميقدرش يرفضله طلب حتى لو على رقبته
و هى دى الميزة الى عند كل الانبياء
حتقوليلى و الطاعة
حقولة الطاعة موجودة
لكن ممكن فى الطاعة العبد يتمرد
لكن فى حالة الحب مفيش تمرد
العبد ممكن يرفض لكن فى الحب .... زى ما بنقول
رقبتى سدادة
تخيلى بقى يا بنت القمر
ان الانبياء فيهم الشرطين و بقوة
طاعة \ حب .... لله
علشان كده الله جل جلاله
اختار الناس دى
لأنه عارف قد ايه هم بيحبوه و بيطيعوه
و الاتنين مع بعض مش طاعة بس و لا حب بس
لما الله طلب الطلب ده من ابراهيم
بالمصرى كده ابراهيم قاله رقبتى سدادة
و مفكرش فى لحظة واحدة
لانه عارف ان الى طلب منه الطلب ده عارف بيعمل ايه
و العدرا مفكرتش و لو للحظة
الله .... الى بتحبه و بطيعه بيطلب منها طلب
تفتكرى يكون ردها ايه ؟
لا فكرت فى فضايح و لا مصايب و لا اى حاجة
قيسى على كده اى نبى او شخص مختار
حتلاقيه وافق بدون انه يفكر
لأنه ده طلب من الله .... حب \ طاعة
الحب \ الطاعة .... للمحبوب
هو كل شىء
و بتختلف من شخص لأخر
انا بحب ربنا و بطيعه بس مش قوى
فمش حطيع كل كلامه
انتى بتحبيه اكتر فحتسمعى كلام اكتر
علشان كده الانبياء معصومين من الخطا
لأن حبهم \ طاعتهم عمياء
فمش حيخالفوا و لا يغلطوا
و فى نفس الوقت الله لم يمس الحرية الى اعطاها للانسان
و لم يجبرك على شىء
فقدريته و قضائه معرفى و ليس جبرى
هو عارف احنا بنحبه و بنطيعه قد ايه
و عارف ازاى حنتصرف فى بعض المواقف
طيب و الشيطان
هو
انك ارتضيتى بعدم الطاعة
لأن القياس الصح
يكون نقطة انطلاقه من جانب الخير الله و ليس القياس من جانب الشر
لأن الشيطان غير مكافىء او معادل
علشان نقيس عليه
دائما الخير هو ما نقيس عليه
حتى الملحد لما يجى يقيس بيقيس من ناحية الخير
الى مضيعنا فى الدين هو اهتمانا بالشر اكتر من الخير
علشان كده كل كلامنا عن الخطيئة و جهنم و عذاب القبر
اكتر من الخير
مع ان القياس لا يمكن يكون من ناحية الشر ابدا
لأن الهنا اله خير و هو الاقوى
تفتكرى اقيس من اى جنب
اظن مش محتاجة شرح بعد كده
و مستنى كلامك

بنت القمر said...

ها ارد حتت برضه علي مواطن الخلاف
_________________________________ كمان لأن الله مش محتاج ان احنا ننسبله
اى حاجة لأنه كامل و بالتالى نسب اى حاجة اليه مش حيعمل حاجة
لأن كل حاجة فى الاخر بتاعته
***************************هو مين قارن نجاح الانسان بنجاح الله ولا الاكتشافات بخلق الله
هه
مين؟؟؟
انا??
لا مش انا خااالص
انا اقصد ان الله ساعد ناس زي زويل بان منحهم الذكاء وهيئ لهم ظروف المال والعلم والسفر
وكل ده تدخل الهي مش ذكاء بشري بس وحتي لو قلت ذكاء واجتهاد
طب ربنا برضه خلق واحد ذكي وواحد غبي
واختار زويل من الاذكياء
مش ذكاء من زويل انه ذكي
شايف الحكايه جايه ازاي
ده ياخد حظ ذكا.. والاخر مياخدش عشان ده يبقا زويل او نيوتن
والتاني يبقا محصل في شركه الكهربا
اوبتاع عصير قصب
مش لما واحد يذاكر وينجح ويجيب 90 في الميه يبقا مجتهد بس لكن موفق ويد الله رعته وساعدته ووصلته لكده
وواحد تاني ذاكر وتعب ويوم الامتحان مرض ومراحش اللجنه وسقط
يبقا بعد العمل البشري في يد الله
ولا نجاح انساني خالص
ابدا في قوة الهيه بتزق واحد ووواحد لا
حاجه مهمه اوي
ربنا مش محتاج ينسب نجاحنا ليه ومش ها يستخسر فينا نفرح
طب ما انا عارفه ولا هو محتاجنا اثلا ولا كان محتاج يخلقنا ورغم كدا خلقنا
صح؟خلقنا ليه
هو اعلم
محتاج تلات اديان ليه واخري غير سماويه
ماكان عمل دين واحد
منعرفش
هو حر
الله اعلم مش كل حاجه بيعملها عشان محتاجها
لا
عشان هو عاوز كدا
طب ليه
ارجع اقولك
متدورش في فعل المشيئه
متحطش البحر في حفره
ولا اللامحدود في المحدود
تمام
يتبع-

بنت القمر said...

انا علي فكرة مش بتكلم من منطلق ديني اسلامي خالص
ولا بقنعك بأي شيئ مجرد بفرد اوراقي علي الترابيزة ادامك
واوراقي هنا هي افكاري
اعمل كدا انت كمان

مجرد افكار عقل حائب بيدور علي حل لمشاكله واجابات لاسئلته
بيدور علي اي يقين عشان ميشتش ويضيع
يتبع

karakib said...

حبيت اسجل اعجابي بنقاشكم هذا
اسم القديس الذي وردت عنه القصه التي ذكرتها بنت القمر عن استحالة ملء حفرة صغيرة بمياه البحر
اغسطينوس

عباس العبد said...

لا يوجد يقين فى الايمان
لأن كلمة يقين مضادة فلسفيا لكلمة ايمان و هى دى النقطة الى بيلعب عليها الملاحدة و من هم ضد الاديان
طبعاانتى فاهمة قصدى و مش حنتكلم فى النقطة دى
الا لو حد جه من بره و طلب يعرف ازاى
ساعتها انتى الى حتشرحيله
مش انا
على اساس انك انتى انتى و انا انا
......
و نقطة كمان اؤكد عليها عليها و احنا متفقين عليها
لا انا بحاولاقنعك بوجهة نظرى و رأيى و لا انت بتعملى كده كمان
احنا بنمارس انسانيتنا فى اخاء و محبة كاملة
الغرض
ان احنا نعرف بعض اكتر كبشر
مش كمسلمين و مسيحيين زى ما انت قلتى
مبتكلميش من وجهة نظر اسلامية
....
ايه الهدف من المقدمة دى
الهدف انه فى نقطة خلاف الخاصة بأخر رد
" انا اقصد ان الله ساعد ناس زي زويل بان منحهم الذكاء وهيئ لهم ظروف المال والعلم والسفر "
فى ردين على الجملة دى
الاول انى موافقك فى الرأى
و ده المريح للجميع
بس مش مريح لى
الرد التنى مش مريح لأى حد
بس مريح لى
لأنى بقيس اى جملة او فكرة على مقياس ثلاثى
ايه هو ؟
معرفة الله المسبقة
مشيئة الله
حرية الانسان
و اى حاجة تتعارض مع اى واحدة من التلاتة برفضها
و الجملة الى فاتت بتتعارض مع حرية الانسان
و بالتالى برفضها
..........
نقطة اخيرة
" طب ما انا عارفه ولا هو محتاجنا اثلا ولا كان محتاج يخلقنا ورغم كدا خلقنا
صح؟خلقنا ليه
هو اعلم "
شوفى بقى
النقطة دى حتفتح باب مش حنعرف نسده
و حتى لو انا اتكلمت من وجهة نظر مسيحية و خاصة بفكر المدرسة الى انا بستريحلها
ممكن الاخوة الاورتودوكس يخشوا يرجمونى
فتخيلى بقى لو حد متعصب ممكن يقيم على الحد
شوفى ردى بالراحة كده
الله لا يفعل شىء حظ او صدفة او بلا سبب او اعتباطا او بدون احتياج
معنى كده عكس كلامك انت بتقولى انه مكنش محتاج يخلقنا
انا بقولك لك كان محتاج يخلقنا
لانه مبيعملش حاجة اعتباطا و الا تروح صفة العليم و الحكيم منه
هو فى حكيم بيعمل حاجة و هو مش محتاجها
حتقوليلى خلقنا علشان نعبده
تفتكرى الله تعالى محتاج عبادتنا
طبعا لأ
لأنه الكمال ذاته
لكن فى نفس الوقت كان محتاج انه يخلقنا
انا مبحبش كلمة احتياج عامة لأنه الاحتياج نقص و الله كامل
فأنا حغيرها
و حقول
كان فى حكمة من خلقنا
نعم كان فى حكمة
ايه هى ؟
ممكن انا و انت نشترك فى انه زى ما قلتى
هو اعلم
بس ده منط برضه للملاحدة
حتتطلبى اجابة
انا ممكن اقولك اجابة ... اخف اجابة ممكن تكتب
بس دى حتولع الدنيا
فممكن ابعتهالك على الميل
غير كده
انا متفق معاكى
لأن المنطقة دى
النقاش فيها مش حيستحمل حد يدخل غيرنا و معندهوش قدرة على الحوار
.....
نقطة "زويل " حرد عليها
بس لما اصحى من النوم
علشان انا لسه جى من الشغل
تصبحى على خير
سلام مؤقت

^ H@fSS@^ said...

انا متشكرة جدا
انا بحبكوا اوي
من امبارح و انا متابعة و الاول كنت ناوية انزل جردلي بس ملحقتش و بعدين لقيت انكوا قلتوا كل ما يمكن ان يقال
و الجمال انه مش بس الحوار متمدن و راقي
لا كمان عقلاني جدا و منطقي و جاوب على اسئلة كتيرة الواحد بيفكر فيها بس ساعات بينسى يدور لها على اسئلة
مش عارفة اعبر لكوا عن بالغ اعجابي ازاي
بس بجد انا متفاءلة جدا
وبالذات بحالة الهدوء المخيمة على الحوار
ربنا يديمها علينا نعمة و يحفظها من الزوال
تحياتي تحياتي تحياتي
ربنا يجعلها سنة خير علينا كلنا
انا عجبني ردك عن الح بو الطاعة يا عبس
بجد في الصميم
و فعلا الانبياء متميزين عننا في الحكاية بتاعت قوة الايمان
تفسيرك ليها و توضيح الراهبة ليها بجد بسيط و يصل للهدف

رغيت كتير
تحياتي

Anonymous said...

بجد أنا سعيد بالحوار ده
أول حوار من النوع ده و مايتحولش لتبادل إتهامات

بنت القمر said...

حفصه
ماشي يا ستي متابعه في الخباثه
وسايبه الجردل بتاعك علي جنب
اما ان مفيش خناق
ونتخانق ليه اصلا
انا مؤدبه طحن
وهو محترم يبقا مفيش داع لحدف الطوب
بس
ههههههههههه
طيب وانا كمان بحبك وسعيده انك معايا علي اللاين___________________________
كراكيب
ايوة هو ده اغسطينوس
الله ينور علي سعادتك
بس كان بيقول لمين بقا؟؟
اصلي زعلانه اوي اني نسيت
هو انت مسيحي؟؟
ولا عرفت الحكايه منين؟________________-
يحيي المصري شكرا
انا مؤدبه جدا وعمري ما بحب الخناق
وممكن اتناقش شهور طول ما الاحترام موجود
غير كدا
ما ينفعش
اشكر متبعتك

بنت القمر said...

عباس باشا
انا ها اسيب حكايه محتاج اصلا ولا مش محتاج
انا قلت انه مش محتاج وانت قلت هو مش احتياج هو انه في حكمه
خلاص متفقين يعني تقريبا
بلاش النقطه دي دلوقت
سيبني بس ازنقك في سؤال
ممكن؟؟
ومتهربش مني؟
هه
عشان منقعدش نطلع من حته علي حته تانيه والمواضيع تتساب من غير نهايه
انت بتقوا ان فعل الله معرفي مش جبري
يعني صلب النقاش كان حكايه ابراهيم والفداء صح؟
انت بتقول انه كان عارف ان ابراهيم هيوافق
ومريم هتوافق
من باب الحب والطاعه
يعني حط ناس متقدرش تقول لا
ليه بقا عشان هو عاوز الاحداث تمشي بالطريقه دي
ابراهيم يوافق فيعفيه ويفدي ابنه بكبش
تمام
يعني مين بقا اللي اختار عبد نبي صالح ربنا مخترش واحد عاصي
مين اللي خلي النبي نبي والبغي بغي
مين اللي منح الهدايه والنبوة لابراهيم
مش ربنا
مين اللي خلي مريم بتوليه وطاهرة مش ربنا
يبقا فعلهم ورضوخهم لله بموافقته يا أبني
لانه لو عاوزهم يعصوا ها يخليهم يعصوا
الخيوط كلها في ايد الله
هو متحكم في كل شيئ
حتي الهدايه والعصيان بموافقته
لما ادم عصي بموافقه ربنا ها تقولي قدر معرفي
ها اقولك
لا قدر جبري
لانه اصلا قبل ما يخلقه عارف ومقرر
حط ميت خط تحت كلمه مقرر
انه ينزله الارض
تقولي بقا ينزل من السما للارض ولا ينزل من جنه الارض
ولا من انه نزل نزول منزله
ولا اي تفسير من هنا ولا هناك
اهو نزل وخلاص
نزل وانتهينا
واطردنا كلنا من وراه
ربنا كان مقرر
اننا ها ننزل وحكايه التفاحه
مجرد فصل من فصول الحكايه
يعني لو تقدر تفهمني طب لو ادم مكلش الثمرة المحرمه
وقاوم ابليس
كان ربنا ها يغير قراره انه ينزله الارض
ولا كل شيئ معد سلفا الكلمه الي مبتعجبكش
الله
ما هو قال كدا قبا ما يخلقه
مش مستني قرار ادم يعني
ها ينزل يعني ها ينزل
عشان بعد نزوله في شغل كتير
قابيل وهابيل
وبشريه ورسل بقا
ادم مجرد حلقه والشغل وراها ماشي
كل شيئ بمشيئته لانه مرتب البازل مينفعش مكعب يهرب من مكانه
افهمني
انت راكب قطر مش ها تنزل قبل المحطه
عارف انت مشكلتك ايه يا رامز؟
هتموت علي حته الحريه
هتموت
عاوز تعمل كل حاجه بمزاجك
تتوب بمزاجك وتعصي بمزاجك
وده مش حقيقي
وها افهمك ازاي يتبع

بنت القمر said...

انت بتقول متقربيش من حكايه الحريه
معلش بقا ها اقرب
مش انا حره
هههههههههههههههههههههههههههههه
انت مثلا قررت انك تهاجر امريكا وتجوز كريستين وتخلف مايكل ده قرارك وتم
عملت كده يعني تمام
طيب جه واحد للبشريه نص امريكي ونص مصري
واسمه مايكل يبقا كمان اختيارك انعكس علي ناس تانيه
ومصيرك اتربك بمصير ناس تانيه
مين سمح بده
الله
الله عاوز كدا
لو الله مش عاوزك تاخد كريستين ولا تخلف مايكل ها يخلي طلب الهجرة يترفض فتجوز ناديه وتخلف فادي
وتقعد في مصر
ركز بقا في الحته الجايه
تفتكر مصير ناديه ومن بعدها فادي او مصير كريستين ومن بعدها مايكل في ايد حضرتك
هههههههه
دا انت طيب اوي
او مغرور لا يا ابني
لازم البازل يترتب صح لو مجوزتش ناديه لازم ربنا يبعتلها نصيب تاني
وتخلف
تفتكر ربنا سايب مخاليق لسه جايين الدنيا مش محدد سلفا مين ابوهم ومين امهم
لا طبعا ربنا عارف نصيبك فين ها تجوز مين وفين وتخلف ولا لا وتخلف ايه وفين
لان الدنيا مش لعبه
في مصاير ناس مرتبطه بمصيرك
مين اصللا خلقك في التوقيت ده
انت
لا
ربنا يعني ربنا قرر يخلق حاله انسانيه
في السبعينات زيك مثلا
وقرر انها تكون ذكر وقرر انها تكون رامز
وقرر ان ابوك يكون مصري
وانه كاتوليكي
مين قرر كل ده مش انت
انت بس ركبت القطر وهو طلع بيك
صدقني انت مخترتش حاجه خاااالص
ماااااالص
دراستك ومراتك وطفلك تفوقك ونبوغك
انحرافك وهدايتك
بأيده
مش بأيدك
ليه هو عاوز كدا هو حر
متقدرش تفهم
عاوز تعترض وتعض في الارض اوكيه
تيك ات اور ليف ات
بس حتي متقدرش ت ليف ات
عارف تقدر تعمل ايه
تقول اوكيه هو عاوز كده خلاص مفيش مشاكل
ماشي طيب
هو برضه قوي ويقدر يبهدلني ويدمرني ويبدل مصيري بالاسواء
لانه قادر
اقوم اعمل ايه اروض نفسي علي التعايش مع مصيري
صعبه دي؟؟
اه
صعبه اوي بس حاول عشان مش ها تعرف تهرب
يتبع

بنت القمر said...
This comment has been removed by the author.
بنت القمر said...

كنت خايفه ان النقاش يزهق الناس مبسوطه ان في ناس متابعه
ومش زهقانه بالعكس مستمتعين وبيحترمونا
خايف من الارثوذكس
طب الحمدلله مش بيخش لك سلفيين
امال انا اعمل ايه
مش كنت اترجمت كنت ولا بلاش
_________________________-
نسيت نقطه مهمه اوي
انك لاتهدي من احببت
ولكن الله يهدي من يشاء________________________________
يعني ايه؟؟من غير تفاسير مكلكعه
وهدايه ولا الجندي
يعنب الهدايه والغوايه برضه منحه الهيه مش اختيار بشري
صح؟
يبقا احنا راكبين القطر ولا لا؟
جاوب؟
البازل مرصوص
ولالا؟
يتبع

عباس العبد said...

-1-
حرد على الناس الاول و بعدين ارد عليكى
كراكيب
انا سعيد انك سعيد و لو ليك راى يا ريت تشارك
انت و يحيى المصرى و حفصة
كل الى عايز يقول رأيه مفيش مشكلة
تمام
....
شوفى يا ست حفصة
انا طبيعى اى حد يحبنى
علشان كده انتى حبيتينى و حتموتى فى قريب
ده حتى بنت القمر بتموت فى بس مش عايزه تقول
خدى بالك من كلامها الموجه لى
حتلاقيه مبتدى كله بعزيزى
حتموت على و انا مش سائل فيها
ربنا يصبرها ... اعمل ايه ؟
....
قصة القديس اغسطينوس
انه كان ماشى على الميه بيفكر فى اسرار الهية و لا هوتية
فلقى طفل صغير ماسك جردل و عمال يجرى يملى ميه من البحر و يحطها فى حفرة
فوقفه القديس و سئله بتعمل كده ليه ؟
قاله عايز احط البحر ده كله فى الحفرة دى
القديس قاله مش ممكن
فرد الطفل و قاله و انت ازاى عايز تحط معرفة الله الغير المحدودة فى رأسك المحدودة ؟
طبعا ده بالنسبة للقديس اغسطينوس
لكن بالنسبة لقداستى الوضع مختلف
انا حفرتى اكبر شوية
ههههههه
.......

عباس العبد said...

-2-
قبل ما ارد عليكى
حقولك حاجة مهمة
ردا على تساؤلاتك التالية
" الخيوط كلها في ايد الله
هو متحكم في كل شيئ
حتي الهدايه والعصيان بموافقته "
للاسف انا مختلف معاكى كلية
ليه ؟
لأن الله لا يقدر على فعل شىء لا يملكه اصلا
لأن الله كلى الخير و كلى القدرة
لكن لأنه الحكيم العليم
لا يمكن ان قدرته تبقى مضادة للخير
الله ميقدرش يجبرنى على فعل الشر لأنه لا يملكه اصلا
لأنه لازم يكون يعرف الشر
و الشر ضعف و احتياج نتيجة نقص
يعنى انا بسرق لأنه معنديش حاجة معينة فبسرقها
و الله لا ضعيف و لا محتاج لأنه كلى الكمال
و بالتالى الله ميقدرش يجبرنى على فعل الشر لأنه ميعرفوش
هو مش مصدره
انا برتكب الشر بمعرفة الله
يعنى هو عارف انى بعمل الشر
لكن مش هو الى اجبرنى على فعله
راجعى قصة سقوط الشيطان حتلاقيه بكامل ارادة
و لما رفض يركع للانسان زى الملائكة كان " تحدى " لأرادة الله
و استحالة يكون ربنا اوعز للشيطان انه يتحداه
ملهاش معنى
فى ارادة حرة و الانسان بيقرر على اساسها
طبعا كده حنخش فى قضية الشر
و ممكن نبقى نتكلم فيها
....
-3-
شوفى يا ستى
الله خلق الطبيعة و خلق قوانين الطبيعة و خلق البشر بحرية مطلقة
و لو فرضنا مثلا ان العالم كله اصبح مؤمن بالله
و كلهم كل يوم بيصلوا
معنى كده ان لو كل يوم كل واحد طلب طلب واحد
و هم مؤمنين
معنى كده ان ربنا حيستجيب ل6 مليار طلب
المفروض انه يدخل فى سريان الطبيعة كل يوم 6 مليار مرة
طبعا هى بالنسبة لالله جل جلاله مش مشكلة
بس المشكلة انه التدخل ده ينفى الخلق
لانه المفروض من الخالق انه يلتزم بما خلقه مش كل يوم بحال و برأى و بتصرف
و بالتالى كل الى بيحصل ده نتاج تفاعل الطبيعة مع عناصرها
و اى حاجة بتحصل " خير " و مضادة للطبيعة بنقول عليها معجزة
و دى كانت للانبياء فقط
يعنى انا مجيئى و زواجى و ولادى كلها نتاج تفاعل طبيعى
و بمعرفة الهية و على ارادة حرة شخصية
لأن الله خلق الطبيعة و عارف حتبتدى منين و تروح فين
و مين حيعمل ايه و مين حيطيع و مين حيعصى
و ممكن انتى تتاذى لن واحد فى امريكا اخترع قنبلة و انتى فلاحة فى هيروشيما
فتتأذى و ده ملوش دعوة بده
لكنه تفاعل الطبيعة
و ممكن واحد تقع منه فلوس و يعدى واحد ياخدها
و يروح يلاقى جاره دخل المستشفى
فيدفع الفلوس الى لقاها فى العملية لجاره
كلها تفاعلات الطبيعة و تراتبية الخلق الالهى للطبيعة كمادة و كبشر
و كله ربنا عارفه
.....
-4-
اشرح
الله خلق الزمن و هو فوق الزمن
و بالتالى
اى حاجة حصلت و بتحصل و حتحصل هى حاضر قدامه و عارفها
يعنى الماضى و الحاضر و المستقبل هم حاضر عنده
شايف كل حاجة و عارف كل حاجة
و عارف مين حيتولد و مين جى و مين حيعصى و مين لأ
كله حاضر
انما بالنسبة لينا احنا منعرفش و بنصلى على رجاء الخير و الخاتمة الحسنة
و هو فعلا زى ما قلتى
" انك لاتهدي من احببت
ولكن الله يهدي من يشاء "
طبعا
لأن هدايتى انا لى شخص و هداية اى نبى لأى شخص
هى هداية الى الله و بالتالى الشخص المهدى
هدايته الى الله ... حيصلى لله يعنى
مش للشخص الى هداه
و بالتالى هى مشيئة الله .... ليه ؟
لانه بيرسل انبياء
لأن اكيد مشيئة الله ان كل البشر يتم هدايتهم
و بما ان الى بيهتدى بيبقى لله و تنفيذا لمشيئته الى علشانها ارسل انبياء
يبقى علشان كده الله يهدى من يشاء
الى عايز يعصى يعصى
و الى عايز يقبل مشيئة الله يقبل
لا اكراه فى الدين
....
-5-
اما بقى لو ربنا بيتحكم فى
و دخلت النار فمش حزعل بل حبقى سعيد
انى مش حشوف اله بيخلى الناس يعملوا الغلط
و بعدين يحاسبهم على افعاله هو مش افعالى انا
مش الغلط الى انا عملته ده
نتيجة فعله هو مش اختيارى انا
معنى كده ان ربنا بيحاسبنى على الى اجبرنى اعمله
و كمان يدخلنى جهنم
تسميه ايه .
و بعدين نزعل من الملحدين ....!
واحد خلانى اعمل الشر و كمان يدخلنى انا جهنم
مع ان صانع الشر مش انا !!!
.....
فهمتى حاجة

^ H@fSS@^ said...

مش عارفة انا فين قلت كلمة خناق دي في كل كلامي انا مجبتلهاش سيرة خالص مالص
بس يا قمر لو تابعتي تعليقي تاني حتلاقي اني قلت ملحقتش انزل جردلي مش مش عاوزة اشارك و لما لقيت الكلام و الحوار تشعب و انا مش عارفة اقول فيه شئ التزمت الصمت لانه من الادب اني اسكت لما اسمع كلام اعلى من مستوايا بيتقال
يعني انا اكتر شئ مش بحبه اني اشارك بس عشان اسجل اسمي في دفتر الحضور و خلاص
انا فعلا مستمتعة بالحوار و بالمعلومات اللي اغلبها اول مرة اعرفه او اول مرة اعرفه بالتفصيل
فمفيش اي مجال اني اتخيل بس و لو فكرة اني اناقشكوا في الكلام الكبير ده
بس
اما انت يا عبس يا حبيبي
فانت طبعا تتحب موت موت طحن
هههههههههههههههههه
انا و قمر بنتخانق عليك
بس مكناش ناويين نذيع السر صح يا قمر؟؟
:')
بس التدوينة دي لازم تتسجل
انا عن نفسي حطبعها على ورق عشان اذاكرها بعدين
بجد يعني
انتو قلتوا كلام كتير و عميق جدا و فلسفي و فيه حاجات كتيرة انا عن نفسي كنت بتسائل عنها
التعليقات نفسها غطت على التدونية الاصلية

تحياتي و كملوا يلا عشان نعرف زيادة
تحياتي

مش حكيم said...

سلامو عليكو...
انا كنت معدى من يومين ...و فجأة وقفت هنا عندكو...

متابع زى اللى متابعين ...و مبسوط

على حسب فهمى النقطة اللى واصلها النقاش حوالين الجبرية و القدر والاختيار انا كانت وجهة نظرى ملخصة هى " الانسان مسير فى قدره و لكنه مخير فى التعامل معه"

ولا تنسوا ان الله عادل

وكان الشعراوى الله يرحمه كان بيقول اننا مخيرين فيما تميزنا به عن المخلوقات جميعا ...جماد - نبات - حيوان

يعنى انا ببساطة مش موافق مع بنت القمر اننا مجبرين ... و جايين نشهد و نتفرج وبس

أكيد العمليه أكبر من كدة...

معلومة معرفة الله المطلقة تفسر انه ازاى عارف ان فلان هيعمل كذا و فلان لأ

لكن السؤال هو:
كيف يخلق الله ابا لهبا و يعرف انه سوف يظل كافرا حتى النهاية و يتوعد له بالعذاب هو و امرأته ...وقد نزلت الايه فى حياته ايضا ...اى انه كان قادرا على ان يؤمن مثلا ليحدث فتنة و يشكك فى القراّن....
ولا هو كان لازم يقول لأ زى ابراهيم و مريم ما كانو لازم يقولو اه؟

الاجابة ببساطة
اننا من صنع الله و هو على علم بقدرات هذا الصنع
لهذا يحاسبنا...
أفسر أكتر
يعنى وجود الثواب و العقاب دليل قوى على ان قدرات الانسان تستطيع المرور خلال الحياه و الوصول الى الاخرة بالايمان و العمل الصالح

مع اختلاف كل انسان عن الاخر فى قدراته و ابتلائاته و منحه

و الله عادل يسوى بين كل هذا...ولا اسأل كيف لأن حفرتى لا تسع هذا السؤال
ولكنى اتأمل جملة الله تعالى " لا يكلف الله نفسا إلا وسعها"

تخيلو بقى ....

يعنى احنا فى امتحان "اوبن بوك" زى ما بيقولو

عارفين اننا نقدر نعدى ... و مش هنتظلم و الرسالات و الاديان السماوية نظمت كل شىء فى سير الحياه ...حتى الاكل و الشرب ... وحتى لو كان فى شىء مش منطقى ... زى اننا ما ناكلش لحم الخنزير مثلا
ولكن هل ننكر ان الله له حكمةفى كل شىء
نحاول ان نتعلم ولكن
"وما أوتيتم من العلم الا قليلا"
فلن نعرف الا فى يوم الحساب

الصبر الايمان الحب الطاعة
حاجات حلوة ...
بس الدنيا مليانه فتن ...و خلقتنا اننا لازم نتفتن ...

انما خلقتنا برضو بتقول اننا نقدر نعدى من الحياه وما فيها مؤمنين ...و عملنا صالح

و على فكرة ربنا قال انه حبب الى قلوبنا الايمان ...

يعنى كمان واخدين بونص ناحية الايمان
مش متسابين فى النص و نقدر نؤمن او نكفر

انما مسأله القدر فهى واضحه ... يمكن تكون صعبة القبول...ولكن الايمان بيحلها ... فالله عادل
" وكل شىء خلقناه بقدر" ...كل شىء مش الانسان بس

وكمان نقدر نلجأله فى اى وقت و نستشيره وندعيله يوفقنا...

اشكاليه القدر صعبة لأنها مرتبطة بالزمن فى عقولنا وزى ما رامز قال الله فوق الزمن ... بالنسبة ليا وليك و لينا كلنا اننا بنتكلم هنا ... ولسة الكلام ما خلصش ... ولسة فى بكرة ما نعرفش هيحصل ايه ...
لكن الله عليم
ولم يجبرنا ابدا على النقاش حتى فى مثل هذا الموضوع

Unknown said...

ياسلام ياسلام...وجون وجون وجون

الله عليك يا عباس..تسلم ايديك يا حبيب والديك

الله ينور يا بنت القمر
..................................
الحقيقة أنا قريت المدونة أول ما رامز كتبها وماكانش فيه ولا تعليق...وبعدين انشغلت فى عملى كام يوم رجعت النهارده لقيتها والعة...ياخوانا أنا من الصبح عمال اقرا و أفكر

عجبنى قوى استدلال رامز بكلام الراهبة عن الحب والطاعة وخيش فى دماغى
بس جه الأخ "مش حكيم" لعب فيها بحكاية أبو لهب و موضوع الأوبن بوك....طب وبعدين؟
...................................تسمحوا لى أجتهد معاكم؟

...................................
الحقيقة أنا مش ميال قوى لتصور بنت القمر عن الجبرية
ويستهوينى تصور رامز عن الاختيار النابع من الرحمة الالهية..هى صحيح فكرة مسيحية..بس الله واحد للجميع

رأيى الخاص ممكن يكون مزيج من الاتنين

عندنا فى الاسلام الغيبيات خمسة:-
ان الله :-
1- عنده علم الساعة
2- وينزل الغيث
3- ويعلم مافى الأرحام
4-وماتدرى نفس ماذا تكسب غدا
5-وماتدرى نفس بأى أرض تموت

فى رأيى تلك هى الجبريات الخمسة فى الاسلام الميلاد والموت والرزق والنماء والقيامة
وهم كما نرى الهيكل الرئيسى للحياة او ال ستراكتشر الرئيسى بلغة المهندسين

التفاصيل الداخلية للحياة واليوميات ليس بها اجبار..لماذا؟
لأن كلها تؤدى الى واحدة أو أكثر من العناصر الخمسة السابقة

يعنى انت رايح اسكندرية...ده قدر
بس تروح بقى ماشى..بالقطر..بالسوبرجيت..بالطيارة
....
بعربيتك....انت حر

وكل طريقة من دول ليها احتمالات و ملابسات تقعد انت بقى تفكر فيها و تحسبها..المهم الهدف النهائى

بلغة الهندسة يا رامز أعتقد ان كل واحد فينا له "فلو تشارت" خاص بيه...ومن كل خطوة سهم يؤدى الى متسلسلة نتائج....عظمة الخالق سبحانه انه بيدير كل ده بدقة اعجازية و بشكل يريح جميع الأطراف
يريح الكافر لأنه بيفتكر ان ده مجهوده هو فقط
ويريح المؤمن لأنه بيرمى حموله على ربنا و يقول لك خلاص ده قدر ربنا و اللى عايزه خير
ويريح العلمانى لأنه يمزج بين العقل و الدين فينتصر لعقله

بس ييجى ربنا و يدينا شوية عوامل مساعدة فى النص:-
* زى الدعاء يخفف القضاء
*ادعونى أستجب لكم
*الله محبة
* أحبوا أعداءكم وباركوا لاعنيكم

دى شوية عوامل مساعدة تريحك نفسيا وتخليك حاسس دايما انك مسنود على قوة خفية...قوة يسميها المؤمنون قوة الهية...ويسميها غيرهم ماوراء الطبيعة..لأن الكون كله بجبروته ماوصلش لمرحلة الاهتماد المطلق على ذاته
لابد أن يستند الى خالق..
...................................

طولت عليكم..ويارب أكون واضح
..................................

تحياتى و اعجابى بالتدوينة الراقية و طرفيها المحترمين

ذو النون المصري said...

كل سنه و انت طيب
كل سنه و انتم طيبين كلكم
هشارك في النقاش غدا ان شاء الله

مش حكيم said...

ام 5 ام

انا ملعبتش فيها ولا حاجة...
الموضوع ببساطة ان ابو لهب زيه زى اى كافر او مؤمن او اى انسان عموما عندة القدرة على الوصول للحقيقة و الايمان بالله و المرور خلال الاختبار

هو كان مخير طبعا...ولم يجبر على الكفر...بس دى الحادثة اللى افتكرتها اللى تدل على فكرة معرفة الله المسبقة ...و هى مش دليل ابدا غير على انه فوق فكرة الزمن م الاساس

يارب يكون كلامى مفهوم

Unknown said...

مش حكيم

أنا فاهم قصدك كويس و عجبنى قوى وهو كان طرف النقيض من استدلال رامز

عندك حق طبعا و كلامك يحمل قدر كبير من المنطق و أشكرك على التجاوب

عباس العبد said...

-1-
اعتذار للسيد
The alien
انت بخيل يا عم ولا ايه
و انا براجع التعليقات
لقيت تعليق حضرتك
و هم كلمتين
شوف يا سيدى
الى ملوش خطوط حمرا كانه بيستبيح نفسه
لأن المفروض ان انت بتعامل غيرك زى ما تحب لنفسك
فغيرك حيعاملك على انه ملوش خطوط حمرا
فحيستبيحك
اما ما هى الخطوط الحمراء
هى احترام ما يعتقد و يؤمن به الاخرين حتى لو انا مختلف معاه
بناقشه لغاية اخر نقطة مشتركة بدون اهانة او تجريح
غير كده اسمه انتهاك حقوق الاخر
و شكرا لمرورك و يا ريت تشاركنا
....
-2-
قبل ما اتكلم عايز اشاركم ببعض الافكار
انا سعيد جدا بمستوى الحوار
و سعيد اكتر ان انا و بنت القمر حققنا غرض مهم جدا
و هو الارضية المشتركة الى تبنى مش تهد
حوار بين اتنين مختلفى الديانة و الحوار مبنى على ما هو مشترك
و ليس الاختلافات لان الله واحد
و ده يبنى مش يهد
صحيح انا واخد بالى ان كل كلام بنت القمر بيبتدى ب يا عزيزى
و ده معناه انها بتموت فى
ربنا يصبرها ... لأننا ما ننفعش لبعض
....

عباس العبد said...

-3-
مشاركة تانية
الكلام ده يمكن من عشر سنين
كنا قاعدين مرة فى الكنيسة و كنا بتناقش فى موضوع
لاهوتى معقد شوية فمسكت الاربعة الى بتناقش معاهم و سلختهم
كالعادة فى وقتها
ابونا شافنى و نادانى لمكتبه و قالى
انا المفروض مشتمكش علشان انا قسيس
بس الى انت عملته ده يخلينى اقولك انك حمار كبير
ليه يا ابونا
قالى حاجة اتعلمت منها جدا لحد دلوقتى و مش ممكن اسيبها
و خصوصا ان الكاهن ده مدرسة اتعلمت منها كتير جدا
قالى
افرض انت قاعد مع واحد مسلم او بوذى او يهودى او
و دخلته فى نقاش و الراجل الى قدامك ده ايمانه بسيط
على قده ... بيصلى حسب تعاليم دينه و ميعرفش اكتر من كده
تعمل معاه ايه ؟
قلتله وقتها و بكل فخر
اتناقش معاه و ابوظها له من ناحية دينه و اشككه فى نفسه
قالى بكل فخر انت حمار
ليه ؟
لن الحوار له اصول
اولا
لازم يكون بين اتنين فى علاقة محبة بينهم و فعلا بيحبوا بعض
و خايفين على بعض و كل واحد فيهم بيحترم ايمان و معتقدات الاخر
حتى لو مختلف معاها
علشان كده فى الحوارات بين الاديان
بيجيبوا كهنة و شيوخ يتحطوا على الجرح يطيب
و لو انت مسيحى تحب الشيوخ و لو انت مسلم تحب الكهنة
لأن الناس دى بتحب الاخر فى الله و ليس طمعا فى شىء
ثانيا
لازم الحوار يكون فى المشتركات الى بينكم و ليس الاختلافات
لأن الاختلافات مش حتتحل لأن محدش حيتنازل عن دينه
و بالتالى حيبقى حوار طرشان
لكن البحث فى المشتركات بيقوى العلاقات و يزيد مشاعر احترام الاخر و محبته
و يخليك تكسبه و فى وقت زنقتك فى اى مصيبة يشيلك و يساعدك
لأنه ساعتها حيفكر فى الارث المشترك بينكم و انك حبيبه
مش حيفكر فى انك بهدلته او بهدلك فى حوار
حيفكر فيك كبنى ادم و ليس كخصم
ثالثا
و ده اهم حاجة
اياك تهاجم حد فى حوار حتى لو انت صح
و خصوصا لو الى قدامك ايمانه بسيط و ميعرفش الكلكعة الى انت تعرفها
المسيح قال " ويل لمن تأتى منه العثرات "
يعنى لو انت قاعد مع واحد ايمانه بسيط بيصلى و بيعمل خير و ميعرفش حاجة تانى
و سعادتك مثقف و قارى و مطلع و رحت " لاعبله " فى دماغه
صدقنى عمره ما حيسيب دينه و يجى لدينك
لأنه حيقرف " ايه الدين ده الى بيسمح لاتباعه انهم يسخروا من الاخرين ؟"
" ايه الدين الى مفهوش تسامح و لا قبول للاخر ده ؟"
و لأن ربنا حيجى فى صف الراجل البسيط ده و يقف ضدك
لأنه بسيط و مخلص و مؤمن بالله بدون تعقيدات و حيقف ضدك
لأنك " بتتنطط بدينك و معارفك على الاخرين " و ربنا ميقبلش كده ابدا
فاهم ؟
قلتله ... فاهم طبعا يا ابونا
قالى .... والله ما انت فاهم حاجة
و صدقونى من ساعتها و انا عمرى ما خالفت
اى حاجة من الى قالهالى
....

عباس العبد said...

-4-
بينما يتناقش اللاهوتيون , يتسلل البسطاء الى ملكوت السموات
فى قصتين عايز احكيها ليكم
الاولى
و دى منها نسختين واحدة اسلامية و واحدة مسيحية
و التانية نسخة مسيحية بس
....
الاولى
كان فى واحد راعى غنم ساكن فى جزيرة مكنش بيعرف يصلى
كله الى كان بيقوله الصبح لما يصحى
سبحانك يا رب انا عبدك .... احفظنى انهاردة
و بالليل قبل ما ينام كان بيقول
سبحانك يا رب .... احفظنى و انا نايم للصبح
حصل ان فى مركب وقفت و نزل منها شيخ ( فى النسخة المسيحية قسيس )
علشان ياخد ميه للمركب فلقى الراعى ده بيعمل كده
فقله لأ لأ لأ
دى مش صلاة ... ربنا ميقبلهاش منك
و قعد الشيخ يحفظه الركعات و الفاتحة و كذا صورة ( عندنا ابانا الذى و شوية حاجات )
و بعد 7 ايام سابه الشيخ و حس انه عمل الى عليه و الراعى مبسوط قوى
و بعدين ساعة و الشيخ فى المركب فى وسط الميه
لقى الى بينده عليه .... بص كده
لقى الراعى جى جرى " على الميه " و بيقوله يا شيخنا يا شيخنا
انا نسيت الفاتحة
بهت الشيخ و قاله
مش مشكلة مش مشكلة
ادعيلنا انت بس ادعيلنا
.....
التانية
نجار بسيط و حيد ملوش اهل
كل يوم بيروح الكنيسة الصبح و هو رايح الشغل
يقف قدام الهيكل و يقول
يا يسوع انا عبدك فلان احفظنى انهاردة
و يجى كل يوم بالليل قبل ما يروح البيت
يخش الكنيسة و يقف قدام الهيكل و يقول
يا يسوع انا عبدك فلان اشكرك انك حفظتنى انهاردة
و يروح
على كده علطول
لغاية ما شافه الكاهن و سمعه
قام قاله .... لأ لأ لأ دى مش صلاة يا ابنى
انت هتهرج مع ربنا
انت تيجى القداس من الاسبوع الجى و تحفظ ابانا الذى و قانون الايمان
و و قعد يحفظه
و بعد اربع خمس ايام
مجاش النجار ده تانى و فضل ما يجيش لفترة
فالكاهن خاف انه يكون السبب
المهم قعد يسئل عليه فعرف انه فى المستشفى
فراح يزوره علشان عارف انه ملوش اهل
فدخل للممرضة و قالها ينفع اخش
قالتله لأ ... مش وقت زيارة
قالها انا عارف بس ده و حيد و محدش بيزوره
قالتله لأ .... ده فى كل يوم واحد بيجيله مرة الصبح و مرة بالليل
و بيقعد معاه خمس دقايق و بيقوله نفس الكلام
يا فلان انا يسوع انا جى اسئل عليك .... عامل ايه ؟
مرة الصبح و مرة بالليل
فسكت ابونا و لما دخله تانى يوم
النجار قاله انا اسف يا ابونا مقدرتش اجى القداس و نسيت ابانا الذى
رد ابونا .... مش مشكلة مش مشكلة
صلى بس ان ربنا يغفر لى
.....
قصة النجار دى اتطردت بسببها من اجتماع فى الكنيسة قبل كده
انت عارفين ان المسيح كان نجار
فلما ابونا خلص الحكاية و الناس متأثرة
ضحكت و قلت
طبعا ما الاتنين من نفس الصنعة و لازم يسئلوا على بعض
ضحكوا و ابونا طردنى مش عارف ليه !؟!
....
فهمتوا قصدى و لا .... ؟!

عباس العبد said...

-5-
نرد بقى على الناس
مش حكيم
انا معاك فى كل كلمة
لكن لو تسمحلى ادخل فى خصوصية دينية
الا و هى قصة ابو لهب
انا اعتقد ان قصة ابو لهب و زى ما انت قلت
اثبات ان الله فوق الزمن و اثبات على حرية الاختيار المكفولة للبشر
لأن لو الله اجبر ابو لهب على الشر و كمان اتكلم عليه بانه هالك
يبقى نوع من انواع اظهار العضلات و السخرية من المؤمنين و حاشا لله ان الله يعمل كده
لكن الى انا شايفه ان الله بيقول انا فوق الزمن و عارف نهايتك و كمان بقولك عليها
و انت مصمم بأرادة و حرية كاملة انك تكمل فى شرك .... اعملك ايه ؟
و واضح ان حفرتك اكبر من حفرتى
و يا ريت تشاركنا اكتر
...
م5م
يا هلا يا هلا
انا معاك
بس خد بالك ان الثوابت الى انت حطيتها
دى ثوابت دينية على المستوى الانسانى مش الاسلامى بس
لأن اى حد من اول اكبر ملحد لأكبر مؤمن
لا عارف حيعمل ايه بكرة و لا حيموت فين و لا ميعاد القيامة
و لا اى حاجة
و هى دى الى بيسموها وحدانية الله
لأن الكل سواء مؤمن او لا ميعرفش حاجة من دى
و هى دليل على ان الله للجميع
عندنا اية بتقول
شمسى تشرق على الاشرار و الاخيار معا
و الى الاسلام بيسميها عالمية الاسلام
و المسيحية بتسميها الخلاص
على فكرة مفيش اختلاف بينى و لا بين بنت القمر فى اى حاجة
غير استخدام المصطلح
و نفس الفكرة بينك و بين مش حكيم الى طلع حكيم جدا
....
ذون النون
فينك يا برنس ؟
....
حفصة
متقطعيش بى اكتر من كده
24 ساعة من غير تعليق واحد
اعيش ازاى طيب ؟