Wednesday, March 12, 2008

حوارات

-1-

هو هيكل بيصلى ؟

نظرت اليه فى صمت و تعجب ... و اجبته

مش عارف بس ممكن يكون بيصلى و ممكن لأ ... انا معرفش

لأ , هو مش بيصلى

و رفع يده و أشار الى منتصف جبهته

لو كان بيصلى كان بان عليه

استفسرت منه

هى حتفرق فى ايه ؟ الراجل تاريخ و محلل سياسى شاطر و فاهم هو بيقول ايه و ناس كتير بتنتظر تحليلاته

ما هو لو كان بيصلى كان ربنا باركله كده , بدل ما الناس عمالة تهاجمه , كان طرح البركة فى كتبه و حبب فيه خلقه و عباده الصالحين

طيب ما أنا بحبه و بشترى كتبه

قطب جبينه بشدة

ليه ؟ هو انت من عباده الصالحين !؟

========

-2-

لا أعلم كيف وصل الحديث الى المظاهرات و لكنها قاطعتنى و قالت :

هم لاقيين ياكلوا , علشان يطلعوا مظاهرات ؟

نظرت اليها فى غباء واضح و التفت الى أبى

( بقى هى دى الى انت جايبنى اخطبها ... طييييب , لما نروح )

أجبت : ما هم بيطلعوا مظاهرات علشان مش لاقيين ياكلوا , دى مظاهرات ضد ارتفاع الاسعار ... الناس غلابة و كل شوية الحكومة بترفع الاسعار , حياكلوا منين ؟

مطت شفتيها و هزت رأسها معلنة انه ها هو حمار أخر يتقدم لخطبتها , ضمت يديها و نظرت فى وجهى المرسوم عليه ضحكة بلهاء , و قالت مستنكرة :

ما هو اصله مش معقول برضه شوية ناس مش لاقيين ياكلوا يعملوا مظاهرات , بنزل من الشغل علشان اخد الكوفى بريك بتاعى و اتغدى فى كوستا او سيلانترو , الاقى الشوارع مقفولة و مش عارف امشى بالعربية , دول كده بيعطلوا مصالح البلد .

نطقت كلمة سيلانترو بفرنسية سليمة ضامة شفتيها فى الحرف الأخير , قلت :

هو الكوفى بريك بتاع حضرتك بيخش ضمن مصالح البلد ؟

لا اعلم اذا كان هذا خيال أم حقيقى و لكنى وجدت ابى و قد احاط وسطه بالكرافت و بدأ فى الرقص مردداً ... صالح البلد , صالح البلد .

========

-3-

كنا فى تلك القاعة المخصصة للأفراح فى هذا الفندق الشهير , انا و اصدقائى نقف عند البيست - حول العروسين – نرقص و الاهل يحيطون بنا . خلفى يقف ابو العروسة و على وجهه علامات السعادة , يتمايل على انغام الاغانى و يرسل قبلاته بين لحظة و اخرى الى ابنته .

نهض ابو العريس من كرسيه و اقترب منا , وقف بجوار ابو العروسة و قال له :

مفيش اى احترام و لا عزة نفس و لا كرامة عندك خالص , عمال ترقص و تصقف و تغنى و سعيد اوى و بنتك بتتجوز

التفت اليه ابو العروسة و على وجهة علامات تعجب

ما ده فرح بنتى و لازم افرح لها و اوصلها بنفسى لغاية العريس

قطب ابو العريس جبينه

كمان توصلها للعريس , ده مفيش كرامة خالص بقى ! , جايلك قلب ازاى ؟ , انت مش عارف ان الواد ابنى بعد الفرح حياخد بنتك و يطلع بيها الاوضة و يقفل عليها و يقلعها ملط و ينيمها على السرير و حينام معاها , و محدش عارف حينام معاها ازاى !؟ , و مش بعيد بنتك تنبسط و تكيف الواد ابنى و جايز تحمل منه ... ايه معندش نخوة و لا رجولة ؟

صمت ابو العروسة و قد احمر وجهه بشدة و ارتسمت عليه علامات الغضب و حاول مناقشة ابو العريس

ط..ط... طيب ما .. طيب ما انت كمان سعيد

ضحك ابو العريس فى قوة و سخرية

طبعا , مش ابنى الى حيقلعها

ترك ابو العروسة مكانه و عاد الى كرسيه و جلس فى صمت, مطأطىء الرأس فى انكسار حتى أخر الفرح . الغريب أن أبو العريس لديه إبن – العريس – و ثلاث بنات مخطوبات .

11 comments:

محمد المصري said...

التالتة معجبتنيش ، حسيتها مأفورة جداً

التانية مجرمة :) ، فكرتني بحوارنا الخالد عن خديجة والكريب بالشيكولاتة - افتكر إنك لحد دلوقتي يا رامز يا شرقاوي مكلتش كريب بالشيكولاتة ! - وبفكر أوَّل الشهر ننزل سيلانترو ناخد كوفي بريك وكريب بالشيكولاتة في طأشة واحدة

الأولانية خلتني عايز أحب على راس الراجل الفاهم اللي قلك كده ، يا رامز متحرجش نفسك .. على رأي أحمد مسيحي كاثوليكي زملكاوي .. تيجي منين تبقى من عباده الصلاحين ؟؟

أنا بحب كتابتك اللي بتكون بالطريقة دي ، وده أفضل بوست قريته في المدونة من فترة

محمود المصرى said...

بسم الله الرحمن الرحيم

بصراحة التالتة شديدة , الظاهر ان ابو العريس مخنوق من ابو العروسة فعاوز ينكد عليه , او ممكن يكون هو فكر فى الموضوع دا واللى هايحصل له مستقبلا مع بناته التلاتة فبيحاول يوضع للناس كلها علشان ماحدش يلومه لما يلاقيه زعلان يوم ما بناته تتجوز .
اسلوبك القصصى سلس وممتع تحياتى لك .

جبهة التهييس الشعبية said...

لا لا لا لا
هههههههههههههههههه
انت بتفشر صح؟ بتفشر؟ بتفشر صح؟
لعلمك اللي بيكدب بيروح النار
بس مش عارفة بقى اللي بيفشر بيروح فين
اوعى تقول مارينا

Anonymous said...

هههههههههه
الأولى جامدة لأني بجد واحد خ معايا في الحوار ده قبل كده بس المشكلة إن السؤال اللي قاللي عليه مالوش دليل ظاهر
سألني هو هيكل بيشرب خمور و لا لأ
التانية

زمان الوصل said...

التلاته عجبونى :) أحسنت ..

Alexandrian far away said...

ممممم
ممكن يجي منك
شد حيلك بس وتوع قراءاتك
وأشتغل على تكثيف اللغه شويه
وممكن تعمل حاجه كويسه

بالتوفيق
تحياتي

عباس العبد said...

محمد المصرى
جبت الكتب و لا لأ
انا جبتلك المجموعة سلم و استلم
======
محمود المصرى
منور يا باشا
ده مكنش مخنوق , فى الغالب كان عايز يولعها حريقة
========
جبهة
و حكدب ليه يا ست جبهة
انا بفشر بس
و بعدين من حقى أروح مارينا و لا كمان مينفعش
علشان انا مش من عباده المارينيين ؟؟؟
هههههه
=======
يحيى المصرى
الموقف من هيكل ده مش مفهوم ابدا
فعلا الناس بتهتم بحاجات غريبة
=======
زمان الوصل
انا رديت على سؤالك فى موضوع القارىء العادى ده
كنت كاتبه فى بوست و نشرته
فعلا حاجة غريبة جدا
=====
اسكندرانى
اكثف اللغة ازاى ؟
يعنى اسخن تحت الورقة الى بكتب عليها و لا أعمل ايه بالظبط ؟
يا اخى انت متسترش فى حتة ابدا
مفيش مرة تبل ريقى كده ؟
لازم تخش شمال و خلاص
ههههههه

The Z. said...

يعيش هيكل، يموت هيكل...انا احبه و عندي كل كتبه لكن عقلي ابن كلب و لا يحب ان يراجع التوازنات الدولية و يحللها بقراءة هيكل طبعا إلا وقت الامتحانات...
هيكل و شومسكي و ادوارد سعيد مثلث الشر الذي سيخرب بيت مستقبلي

هو هيكل يصلي؟؟؟ هههههه

مساءك جميل يا صديقي
زكرياء

Unknown said...

مدونى المفضل رامز
التلاتة أحلى من بعض...وعلى فكرة أكيد هيكل بيصلى..عشان ده فى صالح البلد..اللى الريس بيقلعها كل ليلة واحنا فرحانين

تحياتى

Alexandrian far away said...

بالظبط يا رامز
تسخن تحت الورقه بعد ما تكتب
عشان الميه الزياده تطير واللغه تتكثف
أسم الله عليك
فهمتها على طول

ربنا يخليك لمصر

أبو عمر - الصارم الحاسم said...

كله كوم وموقف ابو العريس
ده كوم تاني


لو الموقف ده حقيقي بصراحة في الحالة دي الطلاق الفوري هو التصرف الصحيح لانها منتهى الجليطة ومؤشر في منتهى السوء

معلش احيانا باتفاعل مع الكلام وبافترض انه صحيح
:)