Thursday, January 29, 2009

دورينجا


فى فيلم قديم لفيروز , كان فى 3 بنات عايزين يبعدوا الناس عن المشروب اللى أسمه " دورينجا " على أسم مرات أبوهم " درية " علشان هى طردتهم من البيت . فطلعوا تحذير و نشروه بيقول " دورينجا بتلحس النظر " .. بس بعد ما قريت الخبر ده  اتأكدت من القصة دى .

--

يعنى المسيحيين بيقولوا العدرا بتظهرلهم و قلنا معلش أقلية برضه و غلابة و لازم ناخدهم على قد عقلهم , سيبوهم يفرحوا برضه دى الدنيا فانية . جه المسلمين قالوا الملايكة بتظهر لهم و بتحارب معاهم , قلنا معلش صحاب بلد و أهل و أخوة و صحاب واجب و ناس تعرف ربنا و يحبوا برضه يفرجوا عن نفسهم و يهيصوا شوية , سيبوهم يروقوا نفسيهم .

انما كمان اليهود بيهيصوا ؟ . دى جديدة دى . دول ناس جم اترزعوا فى وسطينا بقالهم يدوبك 60 سنة بس , يعنى عمرهم أقل من عمر جدى و مع ذلك مخهم لدع بدرى . يبقى الموضوع مش أزمة تجديد الفكر الدينى بقى !!؟ . ده فى "إن" فى الشرق الأوسط . ده أنيل من دورينجا اللى بتلحس النظر , ده الشرق الأوسط شديد قوى , بيلحس المخ علطول .

نداء الى أهالى الأديان الكرام :

خدوا بالكم من أديانكم , ابعدوهم عن الشرق الأوسط علشان ده بيلحس المخ . مش طالباها نلاقى بوذيين بيتمشوا فى وسط البلد بيقولوا " نحن غراب عت يا بوذا .. نحن غراب عت " . و نلاقى بتوع السيخ بيقولوا إن " السيخ " بيظهرلهم . و الأسياخ دى بتطير فى كل حتة , يعنى ممكن تلبس " سيخ " بيظهر متعرفش منين و تلبسه تمام و خصوصاً إن المؤسس إسمه " ناناك " و " كبير " . أنا حذرتكم يا بتوع دورينجا يا ولاد السيخ . خدوا بالكم من أديانكم .

 

15 comments:

قلم جاف said...

دولة الدين أو الدولة الدينية نموذج مسلي وظريف .. ومن أهم عوامل "ظرافة" هذه النوعية من النماذج كما أراها هو أن أمثال "عوفاديا يوسف" على مسافة أقرب من صناعة القرار في واحة الديمقراطية "المزعومة" في إسرائيل..

دولة دينية ديمقراطية .. حاجة كدة عاملة زي المية المبلولة..

الحمد لله إن "حسان" و"أبو العزايم" ومن على شاكلاتهم على مسافة أبعد بكثير من الجيش المصري من مسافة "عوفاديا يوسف" من الجيش الإسرائيلي.. لا احنا ناقصين تسلية ولا ظرافة ولا وكسة..

~*§¦§ Appy §¦§*~ said...

منك لله يا رامز موتنى من الضحك بجد
عارف مش على البوست بس على الاغنيه اصلى مليش فى الاغاني دي خالص بس سمعتها كامله هنا عندك وانا اصلا مش عارفه انام
وصاحيه بس والله مليش فى الدماغ اللى بيقول عليها دي
ههههههههههههه

الازهرى said...

اذا ضعفت النفس استسلمت للخرافة

وهو ما يصاحب الحروب دوما
وهو ما رأيناه كذلك فى الحرب العالمية الثانية من استخدام نبوءات نوستراديموس فى الحرب النفسية بين المانيا وانجلترا

تحياتى دوما

77Math. said...

تهريج رخيص

^ H@fSS@^ said...

LOOOOOOOOOOOOOOOOOOOOOOL

فعلا في ان في الشرق الاوسط
فنحن مبدعون
مخلقون
متنيلين بنيلة
الغوث الغوث
منك لله
سخسختني من الضحك
يا خندقي

kareem azmy said...

هههههههههههه
حلوة دي

ربنا يشفي الجميع
جايز يكون الصنف الأيام دي مغشوش و لا حاجة

ربنا يستر بقى

Mirage said...

إما بالنسبة لظهور العدرا

فدى حاجة انا شفتها بعنية فى اسيوط ومش محتاجة كلام او تشكيك

كونك انت مش مؤمن دى حاجة ترجعلك انت بقى

ربنا معاك

mohra said...

فى قرى ايطاليا و امريكا يتكرر نفس الكلام
لا علاقه للشرق الاوسط بالامر

ذو النون المصري said...

ههههههههههههههه
خخخخخخخخخخخخخخخخخ
عاوز اضحك علي كلامك بكل حرف من الحروف اللي ممكن نضحك بيها
تعرف ان الشرق الاوسط فعلا فيه ان
اشمعني دياناتنا في الشرق بس اللي بيشرف اهلها حاجات غريبه
ممكن تكون الارض و للا الاكل و للا شيء تاني؟؟؟؟

عباس العبد said...

قلم جاف
الحمد لله فعلاً
كانت الشعوذة وصلت لمداها جداً و كانت بقت قصص و أساطير
عوفاديا ده دمه خفيف موت
ههههههه
===
آبى
أى خدمة يا فندم
أغنية قوية جداً و مسلية جداً
ههههههه
===
الأزهرى
منورنى
أذا ضعفت النفس و عجزت عن تحقيق ذاتها
سنة 67 , كان الشحن القومى فوق طاقة المواطن المصرى للدرجة القاء دولة فى البحر , و لما كانت الصدمة فى هزيمة نظام حول الشعب الى اله نفسه . كانت ردة الفعل لازم تكون بالقوة دى , أن اله هو الى يتدخل , فكان لازم عقلية دينية بكل تجلياتها الشعبية و الأيمانية هى الى تنتشل حالة الأنكسار الفظيعة دى
كلامك تمام

عباس العبد said...

77
شكراً
===
حفصت
الله يخليكى يا جميل
نحن عباقرة الزمان
===
كريم
الصنف كان أصلى مش مغشوش
هههه

على باب الله said...

هههههههههههههه

يخيبك

عباس العبد said...

ميراج
انا لا أنكر الظهورات و لا الترائى
لأن الأنبياء و الرسل كان بيحصلهم ظهورات و ترائيات و بولس نفسه ظهرله المسيح
بس سامحنى
لازم الكنيسة تعترف رسمى بالظهور أو الترائى لأن له قواعد
ناس كتير قوى بيحلموا بالعدرا و بيقولوا انها ظهرت لهم و الكنيسة لا تعترف بكلامهم
علشان يبقى ظهور أو ترائى حقيقى لازم الكنيسة تعترف بيه و ده بياخد وقت طويل
و بعدين الظهور ملوش دعوة بالأيمان
هو انا مستنى العدرا تظهر علشان أؤمن ؟
===
مهرا
الحمد لله
ربنا يطمنك
اننا مش لوحدينا فى الجنان ده
===
ذو النون
فى الغالب
كل العوامل اللى انت ذكرتها مجتمعة و منفصلة و متصلة و متقاطعة
ربنا يرحمنا

عباس العبد said...

على باب الله
يخيبنى انا
يخيبهم هم يا عم
ههههههههههه

Alexandrian far away said...

لا تنسى يا استاذ رامز أن لليهود السبق المطلق في الأستعانه بالميتافيزيقا
فطبقا لسفر الخروج فإن الرب نفسه سار أمامهم في مسيرتهم عبلا سيناء
فإذا كان الرب نفسه قد لعب دور الدليل لهمفأيه يعني أن أم النبي يوسف وعيلته كلها تيجي تساعد الجنود

هي دي ألي وقفت معاك يعني؟