Monday, August 11, 2008

و أهو كله بيرزق

---


محمود درويش مات ... الله يرحمه ... الله يرحمه .

--

حتلاقى بعض المدونين كل واحد فيهم عامل مرثية ببيت شعر  من أشعاره و لا حاجة , و شوية تانيين حاطين صورته و تحتيها وداعاً , و تالتين حيحوطولوا فيديو صوت و صورة .

و الجرايد مش حتسكت , الدستور حينزل بعدد خاص ... جريدة القاهرة حترزعنا بكام صفحة متخصصة ... غير إن الحد جى حتلاقى بتوع اخبار الأدب , حيهبدونا بملحق عسل ... الهلال و وجهات نظر اول الشهر الجى بعدد خاص ( وجهات نظر صعبانة علىّ , لسه عاملة عدد عن المسيرى , حتلاحق على مين و لا مين ؟!! ) .

الفضائيات حتدلدق بدلوها  , الجزيرة طبعاً حتنزل بتلاتة أربعة وثائقى ... العربية على إستحياء كده بحاجة برضه ... قناة النيل الثقافية حيجيبوا مذيعة متعرفش أساساً محمود درويش , و حتتكلم بلغتن عربيتن سليمتن عن أنها " بتستفقده " شخصياً ... منى الشاذلى مرثية سريعة ... الاخوة فى الحياة و المحور حيقلدوا نفس البرنامج .

طبعاً , دار الشروق حتشتغل عسل , حتنزل بالأعمال الكاملة فى طبعة ظريفة ... و مكتبة ديوان حتروح نازله بالطبعات الفاخرة بتاعة رياض الريس و المدى و الساقى , من أم الديوان الواحد ب70 جنيه ... و حتلاقى الناس أبتدت تتكلم  عن محمود درويش كأنه كان ابوها الروحى , و الى مقرلوش فى حياته حتلاقيه شايله ديوان و لا أتنين , و ماشى بسيرته الذاتية فى الشارع و تلاقوهم لما يتقابلوا , كل واحد فيهم يعزى التانى فى محمود درويش .

و اساسى حيكشف الناصريين على جرائدهم انه الناصرى الأخير ... و اليساريين حيعلنوا الحقيقة انه اليسارى الأول ...  و الأخوان , مش عارف حيعملوها أزاى , بس حيطلع أنه كان اخوانى و كان فى التنظيم السرى , انه منه لمهدى عاكف علطول , بس هم شاطرين و حيتصرفوا ... و اكيد حيطلع صديق الحزب الوطنى ... انه كان ليبرالياً وفدياً متفتحاً ... و اكيد حتندلع معركة على الهامش بين العلمانيين و الأسلامين عن توجه محمود درويش الشعرى و فى الغالب حيطلع عميل امريكانى !!! .

و حيخش حد طبعاً حيتهمنى أنى بهاجم درويش علشان أتشهر !!!

و أهو كله حيبيع و كله حيشترى , و كله حيتكلم و كله حيسمع , و ربنا ما بينساش حد و اهو كله بيرزق , و مصائب قومن عند قومن تانيين مصالحو , و أهى أيام و بنعيشها  .

الله يرحمك يا محمود , الله يرحمك .

===

مديح الظل العالى

--

صبرا- تنام. وخنجر الفاشي يصحو

صبرا تنادي.. من تنادي

كل هذا الليل لي، والليل ملح

يقطع الفاشي ثدييها – يقل الليل –

يرقص حول خنجره ويلعقه. يغني لانتصار الأرز موالا،

ويمحو

في هدوء.. في هدوء لحمها عن عظمها

ويمدد الأعضاء فوق الطاولة

ويواصل الفاشي رقصته ويضحك للعيون المائلة

ويجن من فرح وصبرا لم تعد جسدا:

يركبها كما شاءت غرائزه، وتصنعها مشيئته.

ويسرق خاتما من لحمها، ويعود من دمها الى مرآته

ويكون – بحر

ويكون – بر

ويكون – غيم

ويكون – دم

ويكون – ليل

ويكون – قتل

ويكون – سبت

تكون – صبرا.

صبرا – تقاطع شارعين على جسد

صبرا نزول الروح في حجر

وصبرا – لا أحد

صبرا – هوية عصرنا حتى الأبد.

---

الأعمال الكاملة


16 comments:

زمان الوصل said...

يا سلام :)

طيب ما بسبب كل احتمالات الرزق بتاعة الناس التانيين رزقنا نحن بهذه التدوينه ..

مش قصدى أغلّس بس تخيّل المفارقه أمّا تمارس الجرائد الاسترزاق بالشكل الذى أشرت إليه فتنشأ جرائد أخرى و مدوّنات و منتديات ترزق على حس نقد الجرائد الأولى .. سبحان الرزّاق !!

The Alien said...

انا معرفوش ولا عمري قريتله حاجة
ومستغرب جدا من الضجة اللي حوالين موته
يا إما الحكاية زي ما إنت بتقول
أو إن الراجل دا مهم وعمل حاجة بجد وأنا اللي كنت نايم

تحياتي

Founoon said...

ههههههههههه

ضحكتني

بس اسمحلي اختلف معاك

بالرغم من اني مش من المنبهرين بمحمود درويش ( وان كان يعجبني بعض قصائده واحفظها عن ظهر قلب) الا اني ارى ان دا اقل واجب تجاه واحد خدم قضيته بالشكل دا

في ذاكرتي ارتبط اسمه بالقضية الفلسطينية تماما

محمود درويش احد رموز جيله

واقل واجب اللي ماسمعوش عنه في حياته ولا قروله يسمعوا ويقروا بعد وفاته حتى وان كان من باب الادعاء والمنظرة

رحم الله محمود درويش

بنت القمر said...

انت عاوز تكتب زيهم بس مكسوف تكتب زي الاخرين
وتكون مجرد واحد في الهوجه و ضمن المجاميع:))
حلوة ونجحت تكون مختلف لاني مشاركتش في المرثيه الا هنا!!
دام الغرور خطيئه الشيطان المفضله!!
تحياتي

جبهة التهييس الشعبية said...

يا عبس يا صايع
نزلت الاعمال الكاملة
جدع
طب لو جبت كتاب معذبو الارض ما تنزله عندك او نقسم الصفحات ما بيني وبينك عشان انا خلقي ضيق شوية
وبعدين النسخة اللي عندي قديمة
الا انت لقيته يا رامز؟ معذبو الارض بعت جبته؟

Abdou Basha said...

انا لم أصدم لوفاة محمود درويش
والحاجات اللي سمعتها منه معجبتنيش
ولما قريت حاجة ليه برضو معجبتنيش
**
وواضح انه كان متكلف، وعشان كده لما مات التكلف طفح في كتابات المعجبين
**
كان الله في عونك، وعوني
الأغنية الراب بتاعت فيلم دبور حلوة على فكرة، أحسن من اللي هيتكتب في الجرايد عن محمود درويش
:))
**
إمضاء : السايكوباتي الناضج

المنفي said...

بس لشو انت دايما مصر على استفزاز الدماغ؟

بس انا طلعت صايع برضو
بعد ما نزلت الرثاء في درويش
نزلت بوست تاني بعده
هل نحب درويش ام نكرهه؟

ورغم اني كنت واثق انو الجميع "هيسترزق" وينزل بوست عن درويش
الا اني شوفت انه ليس من اللائق ان نطنش الحدث

the alien
ايوة انت كنت نايم

عزة مغازى said...

يبقى استرزاق يا باشا لو حد بيشترى الجرايد وبيقرى اصلا
يعنى هو فيه حد هيشترى جورنال عشان فيه ملحق خاص عن درويش؟؟

انا فى الشغلانة الزبالة دى من خمس سنين وعمرى ما شفتا حاجة كدة حصلت
واه
انا بحب درويش
مش شايفاها حاجة نكسف يعنى

أحمد said...

لا اوت منك المرة دى
الشروق مستحيل تطبع اى حاجة لدرويش
على الاقل في الفترة الحالية ولأسباب يطول شرحها.
كمان حابب اضيف نقطة للاخ عبده باشا والين واقول لهم
ماما زمانها جايه

عم مينا said...

والله معاك حق في كل الي قلته
كله بيسترزق

أنا بصراحة عمري ما مسكت ديوان شعر لمحمود درويش و أعدت أقراه
بس بصراحة كفاية الأغاني الي غناها مرسال خليفة..
الله يرحمه

عباس العبد said...

زمان الوصل
و لا يا سلام و لا تغلسى و لا حاجة , كلامك صح مية فى المية .
أنتى اصبتى بنكرياس الحقيقة تماماً , هو ده الى أنا عايزه , حتى الى بينقدوه و بيختلفوا معاه حيرزقوا .
حتى الى بينقد الى كتبه الأخرين , زى حالاتى , حيرزق برضه .
شفتى بقى ان ربنا ما بينساش حد , بيرزق الدودة فى بطن الجبل و بيرزقنى انا فى قلب المدونات .
سبحان الرزاق
===
اليان
مش حقدر افيدك صراحة , لأنى مبحبوش , طبعاً بقراله , بس عادى يعنى , انما نصيحتى أقراله و أحكم أنت , جايز
كل شىء جايز .
===
فنون
الله يرحمه , و جايز فعلاً ياخد حقه كاملاً بعد وفاته و يتعرف أكتر و ينتشر و دواوينه تصبح فى كل بيت , كل شىء جايز
حتى دى حتبقى من رزق دور النشر , كله بيرزق
هههههههه
====
بنت القمر
لأ , انا محبتش اشارك فى الهوجة لأنى مش من المعجبين و لا المنبهرين بشعر محمود درويش , الفكرة كلها هى زى ما قلت لزمان الوصل , كون انك تشاركى هنا بس , فده رزقى انا و الرزق يحب الخفية

عباس العبد said...

جبهتى المفضلة
قلت انزلها قبل الشروق ما تاكل الجو و لا حاجة و تنزل زى مجموعة نجيب محفوظ بألف جنيه و لا حاجة ,
شوفى للامانة , انا بعت اجيبه و وصيت 2 من أصدقائى سافوا لبنان و حلفتهم واحد على المصحف و التانى على الكتاب المقدس , انهم لو لاقوه يجيبوه , بس هم حيرجعوا على اول 9 كده , ربنا يسهل , نسختين ليه صح ؟ مش انتى بتسئلى على كده ... فى واحدة كنت جايبهالك , لأنك قلتيلى ان نسختك مدمرة , على الله بس يصدقوا
===
عبده باشا
السايكوباتى الناضج
انا عادى مع الراجل بصراحة , مش معجب موت بشعره , عادى
و للامانة العلمية و الكليبية , الأغنية حلوة جداً فعلاً دمها خفيف
و الفيلم ظريف
هههههههههههه
===
المنفى
مين الى بيلعب فى دماغ مين ؟
الى عملوا مراثى لدرويش و لا الى رد عليهم ؟
طبعاً مش من اللائق اننا نطنش درويش و خصوصاً لمحبيه , انا مش ضد الرجل و لا معاه , بس
===

عباس العبد said...

عزة مغازى
انا مش طالب منك تستعرى منه , يا ستى
بس معلومة بقى , انا بشترى الجرايد علشان ملاحقها و موضوعتها , مش علشان لى جريدة معينة بتعجبنى
و يعيش درويش علشان خاطرك بس
===
احمد
هى ماما زمانها جاية دى , قصيدة لدرويش بتنصحهم بيها و لا إيه ؟
ههههههه
منورنى يا كبيرنا
حقولك حاجة , طبعاً انا معرفش الأسباب الخاصة بالشروق , بس مهما كان سعرها حيبقى أرحم من الدور اللبنانية و السورية , انت عارف اخر ديوان له موجود فى مكتبة ديوان بكام , ب90 جنيه , يبقى نطمع فى الشروق و لا لأ ؟
و مستنيين الملحق بتاع اخبار الأدب الأسبوع الجى
===
عم مينا
منور
كفاية فعلاً أغانى مارسل خليفة , و ده ما يمنعش انك تقراله , يمكن تغير وجهة نظرك
مشرفنى يا باشا

Abdou Basha said...

الأخ اللي بيغني محمد فوزي
شكله عايش حالة حداد على الفقيد
البقية في حياتك

على باب الله said...

الله يرحمه و يحسن إلينا

عطشان said...

لا يا برنس دا انت نسيت حاجة
ادخل على نورماندى ايوا المنتدى الوسخ دا اللى مليان إرهابيين قال ايه بيقولولك إن محمود درويش ملحد و كمان عميل لليهود
فعلاً منتدى الإرهابيين العرب