كروديات

كروديات فى الزمخشرى جمع كروديا , و الكروديا هو الشخص اللى يُضحك عليه بكامل ارادته و هو مقتنع انه يمارس احد الفضائل .

--

دلوقتى يظل السؤال قائم فى ذهنى : ايه المطلوب منى كقارىء ؟ .. السؤال ده بسئله كتير لنفسى . يعنى سكتنا للكاتب اللى مش عايز قارىء عادى و لا يراهن عليه . و متكلمناش مع الأخت اللى مش بتكتب للقارىء أصلاً بل - كما قالت – بتكتب للتاريخ !! . و محدش فتح بقه مع الأخ بتاع التيتا فى الننا . و لا حد أتخانق مع المواطن اللى أتكلم عن أنطولوجيا المناخوليا السردية , سيبناهم زى ما هم كده , و ربنا يهدى الجميع . و بنحوش من فلوسنا و بنقطع من رزقنا علشان نشترى كتب و روايات و نقراها و محدش فينا بيشتكى . و بتطلع روايات زى الزفت و كتب زى القطران و لا بنتكلم و بنقول معلش حصل خير . و ربنا حيعوضنا فى اللى جى , و ربنا حليم ستار . أحنا فى دولة بيعترف فيها مثقفيها قبل قرائها بأن مفيهاش حركة نقد محترمة . و قلنا معلش برضه , ادينا أحنا أقوى ناقد للنصوص و المفروض لينا أحترامنا . و أكيد الروائى أو المؤلف أو الكاتب بيعمل حسابنا برضه . و بنشترى الجرايد و المجلات و الكتب و الروايات و الأشعار , و اهى دنيا سبحان العاطى الوهاب , و رزق الهبل على المجانين . و كله بيرزق اخر الشهر و محدش بينام من غير عشا , سواء الكاتب او القارىء الغلبان .

انما توصل المسخرة للدرجة دى ؟!! ..  حد قرا العدد الأخير من جريدة الدستور الأسبوعى ؟

مجلة كوميكس !! . ادفع انا اتنين جنيه فى جريدة أسبوعية كلها صور و ناس بتنكت و ناس بتهرج و مواضيع متكررة و قديمة ( يا ريت حتى منقولة من مجلات تانية – دى منقولة من نفس الجريدة !! ) . و مانشيتات باللغة العامية و كُتاب ماسكين صفحات , ربنا ما يوريك فى حد عزيز عليك !! . كل واحد فيهم ماسك عامود , و لا نصاية و لا ربعاية من الصفحة و متصور و حاطط صورته , لأ و مدينا نظرة شمال , قال يعنى فاكر أنه بيكتب فى الواشنطن بوست و لا التايمز و لا الفيجارو .

يعنى أنا كنت بطلت أشترى جرايد يومية , كمان ابطل أشترى جرايد أسبوعية ؟ .

هو أبراهيم عيسى مخه ضرب و تلاقيه بيقول للمحررين : دول ناس كروديات , كده كده حيشتروا الجريدة , فخد ياد انت و هو و روقوا نفسيكو و أعملوا زى ما انتم عايزين , أكتبوا اللى نفسكم فيه , أنتم غلابة و لازم تنبسطم برضه ,  اللهم كتر من الكروديات . و تلاقيه بيقول فى سره  : أحنا جريدة معارضة و الناس بتستريح بس لما تشتريها , بتحس أنها بتعارض الحكومة اللى خنقتها . فمش حيشتروها و يقروها .. و كمان نقدملهم مادة كويسة , ده حتى يبقى قارىء طماع و قليل الأدب  .

لأ بجد عيب , دى جريدة القاهرة ( جريدة تصدر عن وزارة الثقافة ) عاملة ملف عن غزة , فوق المحترم , و أسمها جريدة حكومة , مش مستقلة  أو معارضة .

-

سامحنى يا أبراهيم عيسى , صحيح أنا اُحسب من المعارضة لكن أنا مش كروديا . أنا مش حشترى الدستور تانى , سواء يومية أو أسبوعية . و دور على حد غيرى يشتريها . أضحك على حد غيرى و قوله أنك جريدة معارضة محترمة بتقدم مادة جادة للقارىء بتحترمه , اما انا فبطلت نهائى أصدق كلامك . بفلوسها حشترى ميكى جيب , على الأقل صادقين مع أنفسهم و معايا و مش بيغشونى و بيقولولى أننا مجلة معارضة .