Tuesday, January 27, 2009

زبادى خلاط

-1-

أذهب الى معرض الكتاب كل عام أربع مرات . المرة الأولى فى الأسبوع الأول من المعرض , أشاهد المعروض من الكتب و أقرر ما أشتريه , ثم اليوم التالى أذهب للشراءه . ثم بعد اسبوع حيث جديد المطابع الذى لم يلحق افتتاح المعرض , اذهب لأعرف الجديد ثم أذهب اليوم التالى لشرائه .

ذهبت الى معرض الكتاب المرة الأولى فى اسبوعه الأول . أحب أن انقل اليكم أن المعرض فى أسوأ حالاته هذا العام .

دار الشروق شبه خاوية خالية لا جديد معروض . من يقف لمساعدتك لا يعرف أسماء الكتب أو الكتاب و لا أماكن عرضها فى الجناح .

جناح مكتبة مدبولى, كل الواقفون يعانون من عصبية ما , نرفزة شديدة فى التعامل , معاملة فعلاً سيئة , لا أحد يساعدك دون غضب بادى على وجه ( أعتقد أن ذلك يرجع الى فقدان الحج مدبولى ) . لا جديد أيضاً فى ما تعرضه المكتبة .

لفت أنتباهى انا و من معى جناح الناشرين العرب . المعاملة بها نوع من التعالى على القارىء المصرى بطريقة واضحة لدرجة أن ناشر سورى قال لأحدهم : معاك فلوس أشترى , ممعكش مش لازم تقف تتفرج !! . لا تخفيض فى أسعار الكتب نهائياً . كنت اشتريت من مكتبة ديوان كتاب ميشيل فوكو قبل المعرض ب5 شهور , كتاب " تاريخ الجنون فى العصر الكلاسيكى " الكتاب كان ب70 جنيه , سئلت عليه لأحد أصدقائى فى جناح العرض , لقيته ب70 جنيه و رفض الناشر تخفيض جنيه واحد !!! . كتاب " التاريخ الجديد " لمجموعة كتاب , اشتريته قبل المعرض ب3 شهور . سئلت عليه الناشر لصديق عزيز وجدته بعد التخفيض اغلى من سعره خارج المعرض !!!!!!! . كان رد الناشر : مش عجبك متشتريهوش .

دار ميريت لم تصدر جديدها حتى الأن .

دار رياض الريس اللبنانية كالعادة شغال مع نفسه فى وادى تانى خالص .. اسعار أصداراته بعد التخفيض تتعدى ال80 جنيه !! .

-2-

قابلت الكثير من المدونين . دارت بيننا احاديث كثيرة , و خاصة بينى و بين صديقى اللدود او عدوى الصدوق ... ( بدون ذكر أسماء ) عن ثالوث قرر الكتابة عنه مجموعة من التدوينات . و هو ثالوث " الكاتب و الناشر و القارىء " . و عن المؤامرة التى ينفذها القارىء و الناشر ضد الكاتب . كان هناك اختلاف فى وجهات النظر بينى و بينه , ان من يفسد ذوق القارىء هو الكاتب و الناشر لأن القارىء لا يملك شىء و لا حول له و لا قوة فهو المتلقى الأخير , اما صديقى فقد أصر ان القارىء السيء الردىء هو من يفرض على الناشر ان يبحث عن كاتب يماثل ذهنية القارىء السىء لأن الناشر فى الأخر عايز يكسب .. اختلفنا كثيراً ... فى أنتظار تدوينتك عن الموضوع يا صديقى .

-3-

هذا المعرض شهد ظاهرة جديدة و جميلة و هى نشر كتب لكثير من المدونين , لا غبار على هذا الموضوع . بل كثافة النشر شىء مطلوب و مفيد . لكن مش معنى انك نشرت أنك بقيت أديب . أقيمت ندوة بعنوان " أدب المدونين .. صرخات شباب أم ورق كلينكس " كتب عنها كلمتين فقط الصباغ فى تغطيته للمعرض . شاهدت الفيديو الذى اعتبره البعض نصر للمدونين . رد غادة عبد العال " مدونة عايزة اتجوز " .

وجهة نظرى التدوين مش أدب الا لو المدون أديب فى الأصل .. و مش صرخات شباب .. و أكيد طبعاً مش ورق كلينكس . أنشروا زى ما انتم عايزين محدش يقدر يقولكوا لأ . لكن بجد لو سمحتم كفاية كده كلام عن " ثقافة التدوين " و " أدب المدونات " و " رؤية المدون " و " سرديات المدون " و " انطولوجيا التدوين " و " ابستمولوجيا المدون " و " زفت و قطران على دماغ المدون " و " خريات التدوين ". بجد كفاية ..لأن التدوين كده بقى مسخرة و الناس بقت تضحك علينا و قريب اللى حيقول انا مدون حيتريقوا عليه . رد غادة فى الفيديو الصراحة , حسيت انى مكسوف جداً . غادة حولت التدوين الى " مصطبة ثقافية " .. سامحينى يا غادة , انا اسف لو كلامى حيزعلك .. انتى عارفانى و انا قلتلك رأيى قبل كده فى التدوين المنشور . بعتذرلك مرة تانية .

-4-

بعض مما تيسر شرائه من المعرض

الطلبة و السياسة فى مصر – د. أحمد عبد الله رزة .. المركز القومى للترجمة – سراى 4 أمام دار ميريت للنشر

العلمانية مفاهيم ملتبسة – مجموعة من الكتاب .. دار رؤية – سراى 4ب الناشرين العرب

القانون الفرنسى – صنع الله ابراهيم .. مكتبة مدبولى

مدخل الى التفكيك - مجموعة من الكتاب .. الهيئة العامة لقصور الثقافة – سراى 19 خلف سور الأزبكية

حدتو .. ذاكرة وطن – د. أحمد القصير .. دار العالم التالت - سراى 19

اليسار فى الثقافة المصرية – مجموعة من الكتاب .. دار العالم التالت – سراى 19

حركة التاريخ .. قضايا و مفاهيم – فوزى الأخناوى .. دار العالم التالت – سراى 19

-5-

تغطية بيلا 1 و 2

تغطية مختار العزيزى

-6-

أما لماذا اسميت التدوينة " زبادى خلاط " .. فلهذا قصة طويلة .. بعدين بقى .

 

17 comments:

77Math. said...

معك حق فعلا .. هم المصريين كدا

ما يصدقوا حاجة يمسكوا فيها،ناقص يكتبوا في البطاقة انت مدون ولا لأ وكل واحد يسجل مدونته في الشهر العقاري

ومش بعيد ينطلق مشروع مدونة لكل مواطن..


بس على قد ما الكلام مؤلم .. على قد ما أراح ضميري بعدم ذهابي للمعرض !


الآن فقط سأرقد بسلام وسأنتظر حتى تأتي الكتب إلى الاسكندرية "براحتها"


قراءة سعيدة

Empress appy said...

ميرسى ربنا يبشر بالخير انا شكلى هروح اجيب مجلدات ميكى واريح دماغى
يا لهوى انا حد يقولى معاك فلوس اشترى ممعكش امشى
يا بركه دعاء الوالدين له فى الساعه دى
موضوع المدونين وادب وزفت وقطران
لا تعليق :)

شكرا على الاحباط اللى جبته من المعرض نردها لك فىالافراح يا رب

^ H@fSS@^ said...

تخيل
حتى معرض الكتاب السنة دي هنا مكنش مشجع خالص
مشتريشت غير يجيي حاجة و عشرين كتاب بس كنوع من الاستكشاف
اغلبهم كتب فراس السواح
و روايات جديدة لسه حشوف شكلها ايه
و الباقي تناتيف
بس اتدبست في موسوعة بنت هبلة
حكع فيها مبلغ و كدره

الغريب اللي انت وصفته عندك حصل هنا
خد بالك ان المعرض عندنا بيقعد 10 ايام بس
لغاية اليوم السادس مكنتش لسه شحنة كتب الوفد المصري وصلت
الرفوف فاضية و متنيلة خالص
صديقي في دار الشروق كان بيطلم
لكن حاله كان لسه افضل
فيه دار كتب مكنتش واصلاهم اي حاجة
هو كان زكي شوية و شحن حاجات معاه بشكل شخصي

مدبولي مجوش خالص المرة دي
شكلهم حيقعوا بسرعة اوي من بعد وفاة المدبولي الكبير لو ملحقوش نفسهم و حتبقى يا خسارة يا الف خسارة

رياض الريس مافيش اي جديد فيها
دار ورد شرحه
علاء الدين مافيش جديد بالنسبة لي غير حاجات فراس السواح و الباقي كله خرافات مكتبية
اذا كنت السنة اللي فاتت اتضايقت من ان نص الكتب هبلة و مالهاش قيمة او كلها ضحك على الدقون و العقول
فالسنة دي انيل بمراحل
خلاص
لا عزاء للقراء

ناهيك عن المعاملة السيئة

خلاص يا خندقي
احنا نفتح دار نشر خاصة بينا
ايه رايك؟؟

عفاف نورحازم said...

بصراحه كلام مؤلم بس عادى وهو بقى ايه لسه عدل علشان نزعل على المعرض
ولو انى كنت محتاجه كتابين علشان الرساله
بس خلاص بشراك بشراك
لما الثقافه العامه الاسعار فيها اغلى من بارة المعرض
يبقى الكتب الاكاديميه سعرها هيبقى ايه
بلاش بقى خبط المشوار من اخر الشرقيه المفروسه الى القاهرة المخروسه
سيبك انت المهم انى اتغويت بيك
انت راجل تمام .....
دكتورةعفاف نور
بإعتبار ما سوف يكون ان شاء الله بعد خفض اسعار الكتب ؟؟؟

Bella said...

تغطية ممتازة يارامز

صراحة انا كنت بافكر اكتب عن ندوة ادب المدونات خصوصا اني حضرتها ولي عليها ملاحظات كتيرة
بس لو كتبت عنها ناس كتير ح تزعل

ههههههههههههههههه

فمافيش داعي بقى وخلى اللى في القلب ف القلب

حلوة الكتب اللى انت اشتريتها

ح احط لينك لتدوينتك عندي لانك ماكنتش لسه نزلت التدوينة لما انا نزلت تدوينتي

وكل معرض وانت طيب

انا مفروسة فرسة غير مسبوقة وبافكر اعمل فيكم مقلب في الهباء التدويني بس قلبي مش مطاوعني

ههههههههههه

Bella said...

على فكرة يارامز

نسيت اقولك

ياريت ياخويا الله يخليك تعمل التدوينة اللى فيها سبب اختيارك لاسم التدوينة دي زبادي في الخلاط

منتظراها

ماتغيبش علينا بقى

hartaka said...

الناشرين العرب محستش فية في تعاملهم
تعالي بالعكس دنا فاصلت مع بعضهم وخدت
بعض الكتب ارخص شوية
خصوصا مجموعة تشيكوف نزلت فيها عشرين جنية

بتهيالي لما بيحسوا ان الي بيسال مش هيشتري بيقلبوا علي الوش التاني

تحياتي

Ahmed Al-Sabbagh said...

يعنى بفرض انك عملت كتاب جمعت فيه مجموعة من مقالاتك المنشورة والتى لم تنشر .. وبعدين ايه قالولك تعالى فيه ندوة عن ادب التدوين .. وانت رحت لقيتهم بيقولوا ان الادب الذى يقدمه المدون الالكترونى ده أدب ردئ ووصفه بإنه أدب كلينكس .. تفتكر موقفك ممكن يكون ازاى ؟ ولا انت هترفض تروح الندوة اصلا ؟؟ ولا انت هترفض تعمل كتاب اصلا طالما عندك مدونة ؟؟
انت فاهمنى؟
يعنى قول لى البديل عن موقف غادة
وما تقوليش نبطل نروح ندوات او نتكلم عن أدب المدونين او الميستولوجيا التدوين وغيره
لان طالما التدوين الالكترونى ظاهرة جديدة ظهرت فى العصر ده .. يبقى لازم هتلاقى اللى يتكلم عليها ويناقشوها ويطلعوا القديم والجديد ويتريقوا ويمدحوا ويعيدو ويزيدو
ده شئ عادى يعنى متوقع انه يحصل مش حاجة اوفر
بالعكس او كان التجاهل هو رد الفعل تجاه التدوين الالكترونى كان هو اللى هيبقى شئ غريب ومحبط

أختلف معك لكنى أحترمك بشدة

Unknown said...

انت صح مينفعش يبقى التدوين ادب

وانا ومن وجهة نظرى شايفة بيساعد الاديب الناشى وبيقتل الاديب المحترف

يعنى انت تاخد التدوين سكة عشان تعرف مستواك وبعد كدة ابقى اديب

Reb said...

هل يمكنك مساعدتي من فضلك مع البحث عن طريق اتخاذ الاستبيان
الاستبيان ستكون متاحة حتى 16 فبراير

المسح الجديد متاح على الوصلة التالية
http://www.surveygizmo.com/s/91515/blogoma-research
فإنه لا ينبغي لك أن تأخذ أكثر من 15 دقيقة. أعتذر أن اللغة العربية هي خشنة بعض الشيء ،

عباس العبد said...

77
لو فى مدونة لكل مواطن فده شىء جميل لكن أن كل مواطن يعرف نفسه بأنه مدون هى دى المشكلة
اما لموضوع المعرض فأنا يا فندم مش مسئول , مبقاش انا السبب فى أن حضرتك مرحتيش المعرض
لازم تختبرى و تجربى , ممكن أكون غلطان
متاخديش كلامى على أنه الكلمة الأخيرة
===
آبى
لازم تروحى بنفسك
ده انطباعى انا , لازم تكتشفى الموضوع بنفسك
قراءة سعيدة
===
حفصت
دار رامزت و حفصت للنشر
اسم اورينتال خالص
ههههه

عباس العبد said...

د. عفاف
لأ , لازم تيجى
الثقافة و القراءة تستحق المشوار
===
بيلا
حكتبها بعدين لما ييجى الأذن طبعاً من الباشا الكبير
فاهمانى طبعاً
هههههههه
و بعدين مفروسة مننا ليه ؟
مش تقولى
===
هرطقة
قصدك انى كنت رايح مش حشترى ؟
الله يسامحك يا عم
الله يسامحك

عباس العبد said...

الصباغ
النشر مش دليل الأدب
مش علشان واحد نشر كتاب دمه خفيف يبقى أديب
ما فى ناس بتنزل كتب نكت
الكتاب هو كتاب و بيكون حسب ما استفدت انت منه
ثانياً
الندوة دى ما تترحش من اساسه
لأن التدوين لا هو أدب و طبعاً مش ورق كلينكس
اللى حط العنوان واحد عايز يتنطط و ... , انت فاهمنى طبعاً
ثالثاً
غادة غلطانة طبعاً
ازاى فى تستشهد بتوفيق الحكيم و رؤيته و القعيد و استعماله للغة علشان تبرر للتدوين لغته و حريته ؟
يعنى فشخرة بزيادة
عامة لما تشوف غادة اسئلها رأيى كان ايه فى الكتاب اللى هى اصدرته
رابعاً
هل التدوين ظاهرة تستحق الدراسة ؟
طبعاً بس مش بطريقة التصنيف الغريبة دى
لأن التدوين لا هو ادب و لا سياسة و فكر و لا ثقافة .. هو خليط
انت بنفسك بتكتب فى كل حاجة , حتى القصة القصيرة
معنى كده انك " كاتب " موسوعى ؟
طبعاً لأ
أكيد فى طريقة لدراسة التدوين , بس مش بالأسلوب بتاع الندوة ده
فهمت قصدى ؟
منورنى دايماً

Bella said...

ازيك يارامز باشا

الفرسة من اسعار الكتب طبعا ومنكم بالمرة

ههههههههههههههههه

اهو غتاتة كده
علشان اطلع عليكم مشروع السرد الجديد بتاعي واعمل فيكم شوية مقالب هبائية دروينية

انت مش رايح المعرض تاني؟؟


وللاخ هرطقة

الف مبروك يافندم انك عرفت تفاصل مع حد من الناشرين العرب
على الاقل تعوض فرق سهر مسرحية فاوست

هههههههههههه

بس انا متغاظة انك فاصلت في عشرين جنية

ههههههههههههههه

عموما كل معرض وانت طيب
الواحد حتى لو اتدبس في بعض الحاجات بيزعل شوية ولكن بينسى بمرور الوقت لما يروح المعرض اللى بعده ويلاقي الاسعار اتضاعفت بدون اي وجه حق فبيحس انه نفد بالكتب اللى اتدبس فيها قبل كده
هههههههههههه

تحياتي

عباس العبد said...

واحد مش فاهم حاجة
ممكن , لو فى الأصل انت أديب
مش طرئت عليك علامات "الأدابة " لو جاز التعبير و انت مدون

Alexandrian far away said...

طيب.....

عباس العبد said...

اسكندرانى
ماشى