Saturday, August 02, 2008

لامؤاخذه يعنى

" ... عارف  يا بشمهندس , قالولى روح للحج محمود و إن شاء الله ورقك حيخلص , سئلت عليه لغاية ما وصلت مكتبه , اول ما دخلت , فرحت قوى , لقيته راكع على السجادة و بيصلى , لامؤاخذه يعنى , خلص صلى و قام قعد على مكتبه , اديته الورق , بَص فيه و قاللى الورق ناقص يا بيه , أقوله ازاى ؟ ... يقولى حضرتك حتعرفنا شغلنا ؟ ... اقوله لأ العفو , بس ممكن تقولى ناقص إيه و انا اكمله ؟ ... مردش علىّ و عاد الكلام تانى , و قاللى الورق ناقص يا بيه . قلتله , ما هو لازم حضرتك تقولى الورق ناقص إيه ؟ أمال – لا مؤاخذه يعنى – حكمله ازاى ؟ . رد زميل قاعد على المكتب الى جانبه و قاللى يا أستاذ تعال ... رحتله يا بشمهندس , قاللى الورق ناقص ... و راح مشاورلى كده ... فهمت علطول , طلعت بريزة , و رجعت للحج محمود , قاللى الورق ناقص , طلعت بريزتين , قاللى الورق ناقص , المهم مش حطول عليك , وصلنا للورقة ام مدنى , ميت جند يا هندسة , ميت عفريت يركبوه , اخد الورق و مضاه و قاللى أطلع للأستاذ يوسف حيخلصهولك و إن شاء الله ربنا يسهلك ... بيقولى إن شاء الله ... إن شاء الله يا أبن الحرامية !!!!... المهم طلعت لسى يوسف ده ... الحمد لله طلع ما بيصليش ... ههههههه ... أديته الورق ... و هو بياخده بأيده لمحت فى أيده , لامؤاخذه يا بشمهندس , لامؤاخذه يعنى , شفت صليبكم مدقوق على أيده , بينى و بينك فرحت , قلت بس مسيحى يبقى اكيد لامؤاخذه نضيف ملوش فى مد الأيد ... ليه ؟ ... حقولك انا ليه ... قلت مسيحى لوحده وسط ناس كلهم مسلمين يبقى أكيد لامؤاخذه حيعمل نضيف علشان يعنى يبقى فُنط و مسيحى و كده , يرسم يعنى , أنت فاهمنى يعنى يا هندسة ... ههههههه .... المهم , اخد الورق و بص فيه و راح قاللى , ورقك ناقص ... يا أبن الكاااااالب !! , ورقى ناقص !!!! , طلع ما يتخيرش عن الحج محمود , طلعت البريزة , و بعدها عشرين , و اخد فى الأخر ورقة بميت بلبل , الواطى , لامؤاخذه يعنى , نسى نفسه و أنه مسيحى , هههههه , عمل رأسه براس الحج محمود الراجل المصلى التقى , هههههه , و أخد ورقة بمية زيه زى المسلم .

و الله يا بشمهندس ... و لا مسيحى نافع , لامؤاخذه يعنى , و لا مسلم نافع , أحنا شعب فرعون أبن كلب , نستحق الى بيحصل فينا , لازم يمشونا زى العبيد , يا اما يرجّعوا الأحتلال بتاع الأنجليز و يمشونا بالكرباج , زى الكلاب .

 تخيل يا بشمهندس , الورق بس علشان يخلص عايز بتاع الف جنيه ورق و دمغات و وصولات و كده . رشاوى بقى , ما هى أسمها رشاوى مش إكراميات , ما هم بياخدوا مرتب , أكرمهم على شغلهم ؟!!! , رشاوى بس 2000 جنيه , طيب واحد سواق زيى يجيب منين ؟ , العين بصيرة و الأيد قصيرة يا هندسة , 3 الاف جنيه علشان الورق يخلص , و كله بقى طوابير , عيش طوابير و اكل طوابير , حتى البنزين بقى طوابير , علشان تدفع الرشوة تقف طابور يرضه , هههههه . و شاكرين و حامدين , ربنا يصبرنا , و ربك بيقطع من هنا و بيوصل من هنا , و أدينى ماشى حتة حتة على الورق , كل ما ربنا يكرمنى بقرشين اخلص جزء منه . فلوس ؟ ... فلوس أيه يا هندسة !!! , ربك كريم , طول ما فينا صحة و ربنا مبارك لنا فيها و قادرين نشقى و نجيب قرش , عمرى ما أمد ايدى لحد و الحمد لله , حتى لو حاكلها دقة , ربنا كبير يا بشمهندس , ربنا ده بتاع الغلابة , بتاعنا أحنا يا بشمهندس , و لامؤاخذه يعنى , لا عندنا مصنع حديد و لا عندنا عبارة , و لا بنرقص فى أغانى , و لا بنشرب خمرة و الحمد لله , و بنصلى الفرض بفرضه . ربنا يكملها بالستر و أهو بيكرمنا بناس عسل زيك كده  يهونوا علينا العيشة , الله يخليك يا هندسة , من القلب للقلب و الله يا بشمهندس , دا أحنا بينا عيش و ملح , و العشرة متهونش الا على ولاد الحرام , و أحنا و الحمد لله ولاد حلال  .

انما انت عارف إيه الى مضايقنى و خانقنى فى الموضوع بتاع الورق ده , لامؤاخذه يعنى , أزاى الواد المسيحى ده يأخد ورقة بميت جند زيه زى الحج محمود  , هو نسى نفسه و لا أيه ؟ ... ههههههههههههه .

أضحك يا بشمهندس , أضحك , محدش واخد منها حاجة , ربنا يسهلك و يسهلنا ... صدعتك معايا , الشغل فين انهاردة ؟ أطلع على فين ؟ ... "

===

عم علام يروى مشكلته مع تخليص بعض الأوراق فى أحدى المصالح الحكومية .

15 comments:

بنت القمر said...

عباس العبد
=================
مش مسلم ولا مسيحي...
ولا مسيحي حاطط راسه براس المسلم حتي في الفساد!!!
الحكايه انه مفيش اصلا نظام ولا مؤسسه تدور السوق اللي احنا فيه ده
في حاله تراخي حكومي وفساد عام
يخلي الحج محمود وابو صليب يسرقوا الشخص البائس اللي بيحكي بمنتهي للاطمئنان
فقد غابت عداله الارض
وطبعا هما قلقانين من عداله السماء
بس حلو الافيه:)
تحياتي

Fatma said...

كل الاديان بلا استثناء تحض على الاخلاق الكريمة والسلوك السوي

الملتزم بروح الدين -اي دين- هيكون انسان عنده اخلاق

دا مش معناه اللي ماعندوش دين ماعندوش اخلاق لان المحترم محترم وذو السلوك الكويس مش بالضوروة يكون مؤمن اساسا

بس كل مؤمن حقا لابد وان يكون ذو سلوك كويس
انا اقصد انك عشان تكون مؤمن حقا لابد وان تكون ذو سلوك محترم والا بل تدينك واشرب ميته

عندنا في الاسلام حديث بيقول (الدين المعاملة)

مين يفهم

حال المصريين بقى يقرف

عم مينا said...

عارف علي أد ما هي قصة تجيب اكتئاب من التدين المظهري السخيف الي وصلناله
بس بردو زي ما فيه ولاد الكلب دول.. لسة فيه مصريين زي عم علام جدعان و عندهم خفة الدم المصرية

The Alien said...

إذاي أبو صليب ياخد زي الحاج محمود؟
دي قلة أدب .. هو مش عارف مقامه
مش عارف إن الأديان دي درجات زي ما قالت المحكمة


سيبك إنت .. عم علام دا راجل زي العسل
تحياتي

Moon-baby said...

بلا حاج بلا مسيحي داقق صليب...كل ده طبقة خارجية بتدي لصاحبها حصانة و صلاحيات انه-لامؤاخذه يعنى-يأرطس اللي قدامه..و احنا كشعب اي حد يبدو عليه التدين او يكلمنا في الدين و يوعظ يبقى خيرة الناس و خلاص بقى هيصعد..بس اظن ان الجيل الجديد بيرفض و بشدة اي تمثيل و محاولة للاستخفاف بعقله


و مش كل متدين محترم و مش كل محترم متدين.

تحياتي و اتمنى ان تكون بخير

بنت القمر said...

اقصد مش قلقانين من عداله السماء

عباس العبد said...

بنت القمر
الى مجننى انا شخصياً و حاجة مش عارف الاقي لها حل , هى ظاهرة الفساد و الدين .
انا معنديش مشكلة أبداً أن يبقى فى واحد حرامى هو حر , بس ما يعمليش تقى و بتاع ربنا , محدش حتفرق معاه اذا كنت حرامى و لا لأ , لكن فى بلد زى مصر ... مش عارف اقولك إيه ... فى بلد زى مصر لسه فى ناس بتحسبها من ناحية الدين , ده كويس .
تخيلى الموقف ده , نازل انا و صاحبى نشترى عربية له من سوق السيارات صاحبى داقق صليب فى ايده و صاحب العربية طلع مسيحى , و اول ما عرف صاحب العربية الى عايزه تتباع اننا مسيحيين , راح منزل 1000 جنيه علطول و قعد يقول اننا ولاد معمودية واحدة و لازم نشترى و نبيع لبعض , سئلته العربية رشة و لا عامله حادثة و لا حاجة .. يرد يقولى الكلام ده مش مهم و لازم احنا ولاد المعمودية نبقى ستر و غطا على بعض , المهم اجيله عدل على العربية و اسئله عنها يرد بالدين و المعمودية , رحت مميل على صاحبى و قلتله الراجل ده حرامى و مش مظبوط و العربية فيها حاجة , نزل 1000 من غير ما نطلب و عمال يتكلم فى الدين يبقى العربية فيها إنه , و طلع كلامنا صح عاملة حادثة بنت كلب و مرشوشة فى التوكيل و عايز يخلص منها .
===
فنون
انا متفق معاك تماما
===
عم مينا
بص عم علام ده , فى كلامه خلانى احس انى عايز ابكى بس الدموع اتشرت فى عينى لما قال أن ربنا ده بتاعنا أحنا , بتاع الغلابة , و موتنى من الضحك لما قال أن المسيحى عامل رأسه براس الحج التقى المصلى بتاع ربنا , الناس دى من غير ضحك و فرفشة تتجن و الحياة تاكلها .
===
اليان
فعلاً هو زى العسل
===
مون-بيبى
حمد الله على السلامة من البحر
===

مهندس مسلم said...

طبعا مش كل متدين محترم بس كمان مش كل متدين نصاب الا لو فيه شبه من عادل امام، ههههههههههههه

قلت في ردك على تعليق بنت القمر ان لسه فس ناس بتحسبها من ناحية الدين وده يفسر ليه النصابين اختاروا الدين عشان يتستروا وره انا شايف ده منطقي جدا.

الصح دلوقت ان احنا نتعلم ان الدين سلوك قبل ما يكون مظاهر.

Samir Saad said...

جميلة جدا
عظيم تحياتي

In Exile said...

دي أعظم حاجة قريتها في البلوج عندك يا رامز. مذهلة :)

مَلَكة said...

الحاج علام ولامؤاخذة يعني نسي إنه هو كمان ابن حلال وبياكلها بدقة وبيدفع للمرتشي رشوته يبقى مشترك في الذنب الحاج ويجعله عامر!
هتجنن من حاجة واحدة انا، ايه علاقة المسيحي والمسلم بالرشوة؟ ما الاتنين في خية واحدة وفي خيبة واحدة وفي فقع مرارة واحد والاتنين -ولامؤاخذة- تسعيرتهم واحدة.. !

زي ماكنت بقول، البلد دي لو جابوا لها الف نظام مش هتنضف الا لو الناس اللي فيها قرروا ينضفوا من جوا بجد.. ماتيجي ولامؤاخذة نعمل حملة ونسميها "انضفوا"؟؟

AbdElRaHmaN Ayyash said...

انت تعرف يا ابو رامز
دي ازدواجية الشعب المصري
اللي شايف الدين ركعتين هيركعهم وللا دقن طويلة و جلابية قصيرة
و كده يبقى عمل اللي عليه !
يعني الموضوع ثقافة قبل ما يبقى حكومة
الفساد المؤسسي متمأسس من عندنا قبل ما ينزل لنا من فوق !

عباس العبد said...

ملكة
ليكى حق , انا كمان مقتنع بكده , لازم الناس هى الى تنضف من جواها , ا
كن انت التغيير الذى تريد أن تراه فى الأخرين .
ما الى جاب سيرة الدين فى كلام علام , هى العادة فى الرغى هو ما يقصدش حاجة
--
عبد الرحمن
الفساد ده تأصيل مصرى
--
روى
منورنى

mado said...

انا عايز احكي موقف علشان مررتي مفقوعة من يومين.
قريت اعلان في الوسيط مؤسسة اعلانية كبري تطلب مصممين جرافيك.كونت المفروض اروح انا واصحابي مينا ويحي.الواد مينا مجاش معنا ورحت انا ويحي.اول مدخلت علي العجل الي هيعملي انتر فيو قالي حاجة بضينة قوي.
اول حاجة قلها ليا مش انت الحمدلله مسلم بصيت ليه ومردتش بص في السي في وقري اسمي.قلي ايوا مسلم الحمدلله.قولت في سري يا ابن الشرموطة ياحمار من اولها كدا تعصب.
شاف الشغل بتاعي عجبة وقلي بس انت مش هتنفع معنا غير لو غيرت اسلوبك في الشغل قولت ليه ازي قلي علشان احنا بنعمل تصميمات اسلامية.
انا تنحت قولت لية ازي يعني مش فاهم.
ورني شغل بقي هما عملينة بوستر الحجاب قبل الحساب.وعذاب القبر .وكفرات دي في دي لمحمد حسان ومحمد حسين زفت يعقوب.
قلي احنا الصور عندنا حرام مبنستخدمش صور.لو عندك استعداد تغير طريقة شغلك علشان يبقي اسلامي ماشي.قولت ليه لا .ورخمت عليه شوية وفضلت اخنق عليه .لاني اساسا استحالة اشتغل في مكان زي دا.خرجت وقلت كويس ان مينا مجاش كان هيبقي يوم مهبب لو مينا جه وقالو مش انت الحمد لله مسلم هههههه.
المفجاة بقي وانا خارج اني لقيت كذا بوستر للمغني الفذ عادل الفار البوم جديد بعنوان (الشب الهل الهل ) بضم الهاء.
اتاري فضلية الشيخ بيعمل بوسترات مغنين ومش اي حد دا البوم الشاب الهل الهل.
دا مثال بسيط علي الازدواجية.
قمة الازدواجية وقمة الشرمطة الدينية المنتشرة في مجتمعنا.
الي بيداري ورا دقن والي بتتداري ورا نقاب والي بيداري ورا صليب.مجتمع قيمه بقت منهاره منتظر منه ايه غير التستر بالدين كل واحد يستخبه ورا الدين بتاعة.
من ضمن الحجات انو اساسا مكتب حقير لا مؤسسة اعلانية كبري ولا نيلة ونصاب وابن كلب.

TAFATEFO said...

هو الرشوه والفساد كمان ليهم علاقه بالدين؟:D

شر البلية ما يضحك فعلا .. ودايما نكت الجهلاء والأغبياء هي اللي تضحك .. لأن الجهل والغباء هم شر البلية فعلا.