Monday, August 18, 2008

عالم معفنة

الساعة الثالثة صباحاً

راجع من الشغل فى العربية , سايقها عم علام و معايا الأتنين الفنيين , لقينا الشارع واقف و العربيات ماشية بطىء , افتكرنا لجنة , رحنا شَدين الحزام و طافيين السجاير , لغاية ما وصلنا للمشكلة اللى موقفة الطريق .

عربية " بى ام دبليو ثرى سيريز " واقفة بالعرض على اليمين متخرشمة خالص , عاملة حادثة منيلة بنيلة , و جنبها واقفة عربية " مرسيدس إس 240 " , و فى عربية ونش بتسحب ال" بى ام " من على الأرض , و أحنا معديين من جنبهم , لقينا راجل كبير واقف جنب شاب صغير , و الراجل الكبير وشه احمر و عمال يشخط  للشاب و عمال يشاور بايده على العربيات المعدية من جنبه , بيزعق للشاب و بيقوله :

" انت قليل الأدب , أنت عديم الاحساس , انت عديم المسئولية , و معندكش دم , منزلنى من البيت علشان عملت حدثة ... انا معرفتش أربيك , بس أرجع و أقول أنا الغلطان , أنت متستحقش النضافة , ما هو انا لو كنت جبتلك " كورولا و لا ميتسوبيشى"  زى بتاعة الغلابة و العالم المعفنة ديه , كنت أتربيت و عرفت الصح من الغلط .. !!! " .

عم علام قاعد جنبى سايق , الدم ضرب فى نافوخه و قال لى : " يعنى أنزل أخد الراجل الكبير ده قلمين على وشه و لا أعمل أيه بالظبط ؟ "

ضحكت و قلتله : " ما تسيبه يا عم علام يربى أبنه ... سيبه يعلمه الصح من الغلط "

---

آه ... أسف نسيت أقولكم حاجة

عربية الشغل الى راجعين فيها , عربية دايو موديل 2006 , يعنى أقل من بتاعة العالم المعفنة !!!!! 

30 comments:

هشام علاء said...

ههههههههههههههه

طب اذا كانت الكورولا والميتسوبيشى بتاعة العالم المعفنة

و الدايو موديل 2006 أقل من بتاعة العالم المعفنة

يبقى اللى بيركب بسكلتة ايه ظروفه؟

و اللى بيركب ميكروباصات اى تصنيفه

:D

Mohammed Gamal said...

الموقف ده شوفته بحذافيره من كام سنة, بس العربية اللي خدت الشتيمة كانت الفيات 128. دلوقتى حتى الكورولا بقت مش عاجبة. الدنيا جرى فيها ايه يا ناس؟

جبهة التهييس الشعبية said...

صح
هو كده صح
لازم يربي ابنه
ومن هنا ورايح مافيش غير الميتسوبيشي يا كلب

Bella said...

هههههههههههههه

والعالم اللى بتركب رجليها دي مش محسوبة اصلا وماحدش شايفها

حلوة قوي دي

اليومين الجايين المرسيدس ح تبقى بتاعة الناس المعفنة

خلاص بقى الطيارات الخاصة هي ح تبقى وسيلة المواصلات الاكثر انتشارا

هههههههههههههههههههه

Empress appy said...

ههههههههههههههههههههههه

اه يا كليبه عقدتوني طيب انا عربيتى تبقى مش مصنفه حتى من المعفنين اروح اعمل فيها ايه بقى حرام عليك على الصبح
فكرتنى بصديق ليه يقولى انا عاوز واحده تجيب ليه سي كلاس وانا اتخطب لها على طول

... said...

بس أنا لو كنت سمعته بيقول علي أصحاب الكورولا ناس معفنة ما كنتش هاسكت .. كنت هازعل أوي
أصل دي التارجت العائلي في الخطة العشرينية الجاية

Mukhtar Al Azizi said...

طيب اللي معاه فيات سيينا ممكن يبقي معفن ولاّ زبالة؟

De said...

انا باسوق الميتسوبيشي بتاع ماما...يعني أنا وامي متربيين جاهزين وعارفين الصح من الغلط...بغض النظر عن مقطع "العالم المعفنة"
LOOOOOOOOOOOOOOOOOOOOOOOOOL

nooon said...

طب تخيل انا سمعت عن نفس الموقف ده , بس الأب قال لابنه "انت مالكش غير شيروكي زي الرعاع"

بنت القمر said...

بغض النظر عن النكته صديقه انتيم جايه من الخليج دايما احكي لها عن الغلاء وازمه العيش والكلام ده بتقولي العربيات الماتريكس زي الرز في البلددي بقت زي العربيه ال128 زمان
والشقق اللي بمليون الناس بتسكنها قبل ركوب الاسانسيرات وانتهاء التشطيب طب ما الناس معاها فلوس اهي!!
في منتهي الزهو الانساني..عربيتي سوزوكي ماروتي.. تقريبا مصنفه زباله ورابيش كمان.. بس ها اغيرها وانتقل الي مرحلة العفانه قول يا رب

Empress appy said...

بنت القمر

لاااااااا اخص عليكى الماروتى رابش كده صنفتينى عااااااااا
ما انا كمان بس 2006 طيب مينفعش تطلب لها الرافه هههههههههه

Anonymous said...

مفيش حد يسلفنى ان شالله عجلة

mostafa rayan said...

ممكن يا جماعة حد يساعدنياجيب حاجة معفنة تيوتا كرولا ولا حتى ميتسوبيشي لا نسر وانا هجي على نفسي واركبها

Unknown said...

وقال أنا ياخويا ساعة ما جبت التويوتا كنت فاكر انى اتنطقت...عفانة مرة واحدة؟
طب المهم هو كان مين فيهم البى ام ولا المرسيدس؟

Alkomi said...

بالنسبة ل اتوبيس 244 في اسكندرية ايه موقعه من الادب هنا

AHMED SAMIR said...

انا خجلان من نفسي بجد
بجد مش طايق نفسي
ركب هيونداي اكسنت يا بشر
دة انا كدة مش من طائفة المخلوقات المتطورة

عم مينا said...

هاهاها
يخرب عقلك يا رامز، ضحكتني علي الصبح
الناس دي لازم تتعدم في ميدان عام علشان يكونوا عبرة

mohra said...

و بعدين بقه
دايو 2006؟؟
يعنى انا اروح انتحر انا و البعكوكه بتاعتى؟؟؟؟

عباس العبد said...

هشام
شوف يا سيدى , الى بيركب ميكروباص و بيركب بسكلتة
دول مازالوا فى العصور الوسطى , يعنى خارج الزمن
و الله المستعان
===
اوكسديد بيف
أيه الأسم ده ؟
المهم , عارف لو الى بتتشتم العربيات ال28 , مفيش مشكلة , هى أساساً صناعة مصرى , و فى ناس ما بتحبش الصناعة المصرى , لكن الكورولا , أعوذ بالله
===
جبهة
شفتى بقى التربية , هى دى التريبة الصحيحة , الكلب ده لازم يركب ميتسوبيشى علشان يتأدب
===
بيلا
لأ , طبعاً الى بيمشوا على رجليهم محترمين , لأنهم ما بيركبوش عربيات معفنة , و بعدين فعلاً كلامك صح , حيجى اليوم و المرسيدس تبقى معفنة , و الدليل انتشار الهامر و البويك تانى
===

عباس العبد said...

آبى
فين الخوخ ؟
يا ريت تكون ليها أخت , بس تجيبلى أودى , و أنا أتخطب لها علطول
===
بثينة
لأ , غير التارجت , و ربنا يستر , احسن تجيبوا بورا و لا باسات , تطلع معفنة و لا حاجة
===
مختار باشا
بدل الفيات السيينا , بتاعة سعادتك , تبقى مرسيدس يا باشا , مرشيدس , بالشين
و منورنى يا برنس
===
الى معملش حاجة
و نعم التربية فعلاً , و نعم التربية
===

عباس العبد said...

نهال
ما هى درجات , المعفنة للتويوتا , الشيروكى للرعاع
===
بنت القمر
يا رب يا أختى يا رب
===
ميرو
ربنا يعوض عليك
===
مصطفى
كان غيرك أشطر
===
م5م
هو كان المرسيدس , الله يخرب بيته
===

عباس العبد said...

محمد الكومى
ده أساسى , خارج اللعبة أساساً
===
سمير
انت كده كائن فضائى
===
عم مينا
فعلاص انا معاك , لازم الناس المعفنة تتعدم فى ميدان عام
ههههه
===
مهرا
طيب انت عندك بعكوكة , انا كله , موتورجل
أعمل انا إيه بقى ؟

حـنــّا السكران said...

طيب و اللي معاه بي ام بس موديل قبل كام سنة ..شو موقعه من الاعراب ؟ أكيد بيكون من الناس المعفنة بس عامل نفسه بني اّدم زي الباشا اللي بيربي ابنه ..
ـ الناس اللي متل هالمخلوق الغريب ..هم أوسخ ناس على كوكب الارض ..بدون منازع ..لأنه هو شايف انه قيمته كبني اّدم و كإنسان ..تكمن في السيارة أو الفيلا أو حتى في الجزمة الإيطالية ..يعني هو حاجة بتلمع من برّا ..حاجة ..شيء ..و ليس إنسان..و ده حسب منطقه هو طبعا ..و لو انتفى وجود هذه الأشياء سيكون بنظر نفسه جزمة مش بتلمع ..جزمة قديمة ..
هو بيوقف في نص الشارع و بيقول : أنا جزمة جديدة ...بيركّز على ( جديدة ) و مش اّخد باله انه بيقول على نفسه جزمة ..و بالعربي المفشكل ..صرماية ..هو صرماية ..حتى لو ركب مركبة فضائية ..
و فعلا ..الناس دي لازم يشنقوها بميدان عام ..لأنها ضرر على البيئة قبل ما تكون ضرر عالانسان و الحضارة الانسانية .

على باب الله said...

هههههههههه

و الناس اللي عربياتها ماركة " باتا " أيه نظامها ؟

momken said...

اشتم اشتم
يا محترم يا متربى
دى الى عملهولك فى المدرسه
تشتم
ال معفنه ال
ماشى ماشى
الشتيمه تلف نتلف وترجع لصحبها

قول مسكين
بعد البنزين ماغلى شحتين
لكن معفنين

ماشى ماشى

تحياتى

admelmasry said...

غريبة الدنيا دي والله
.
.
دايما المنطق
والعقل
والصح
والغلط
والعيب
واللي مش عيب
حتي الحلال والحرام
.
.
بيختلفوا من بني ادم للتاني .. يمكن يكونوا ليهم نفس اللغة او نفس الدين .. او حتي عايشين في البلد
دا حتي ممكن يكونو اخوات
.
.
بس الفرق بينهم .. هو الماديات
.
.
هي اللي بتتحكم في ايه هو
المنطق
وايه هو العقل
وايه هو الصح
وايه هو الغلط
.
.
غريبة فعلا .. مش كدا ؟؟؟؟؟

Hypatia said...

الهيونداي الجيتز يعني تحت خط الفقر والادميه والعفانه يعني حتى محصلتش خط العفانه
يا حسره علينا حسره علينا


فى الخطه الخمسيه الجايه نيسان تيدا وبصراحه بقي بقي بقي انا شايفاها احلى من المرسيدس والبي ام :))
انا بقي شايفه بتوع المرسيدس والبي ام دول عالم معفنه وزباله انا حره بقي

الصفوه هما الفولكس "ماما" و الكامرى "بابا"

والقمه هما الاودي والميني كوبر

واحسن ناس الموتورجل والميكروباصات
:))

كانت معكم مراسلتكم من معرض سيارات الكويت نسرين بسيوني :)

Ahmed Fahmy said...

هههههههههههه
لازم ابوه يربيه بعد كدة و مايجيبلهوش غير ميتسوبيشي معفنة
يا نهار اسود يا حدعان
ده الناس مش لاقية رغيف العيش و ده يقول له تتربي
هاتوا لي الراجل ده هاتووووووووه
جرررررررررررررررررررر

عباس العبد said...

حنا السكران
اهو ده بقى كلام الناس الى بتحقد على الناس الأغنيا , انت من جواك بتغّل منهم , و حتموت يبقى عندك عربية بى أم , بس ده قدرك فى الدنيا .
احنا نتهمهم بانهم جزمة جدية , اشياء و هم يتهمونا بأننا : معفنين
حسبى الله و نعم الوكيل يا فخرى
===
على باب الله
لأ خليك كده على باب الله
ههههه
===
ممكن
ماشى يا عم المسكين
===
ادم المصرى
و لا غربية و لا حاجة
انما الدنيا مرسح كبير
===
نسرين
انا بحقد عليكى
هههههه
===
احمد
انا بقول كده برضه ... لازم يتربى .

Amr Ahmed said...

لا الواد ده
سافل سافل سافل

اه يا بلللللد

بس والله ابوه ده راجل عسل

يعني ده لو عاوز ينتقم من ابنه يركبه 128

والواد لو ركب مواصلات ينتحر بقي